Lotpaj huarmihuan ima tucushcata yuyari

Lotca paipaj tío Abrahanhuanmi Canaán llajtapi causarca. Paicunaca yallitaj animalcunata charishcamantami chai allpaca ña mana pajtarca. Chaimi chaillapitajca ña mana tandalla causai tucurcacuna. Chaimantami Abrahanca Lottaca: ‘Ñucamanta chꞌicanyashpa richunmi rogani. Can alli ladota rijpica ñucaca lluqui ladotami risha’. Abrahanca alli shungu runami carca.

Lotca Sodoma llajta cꞌuchullapi saquirij allpapi achca yacucuna, qꞌuihuacuna tiyashcatami ricurca. Chaimi paipaj familiahuan chaipi causanaman rirca.

Sodoma, Gomorra llajtacunapi causajcunaca millaita rurajcunami carca. Chaimantami Jehová Diosca chai llajtacunata tucuchinata decidirca. Pero Lotta, paipaj familiatapish quishpichingapajmi ishqui angelcunata cacharca. Angelcunaca: ‘¡Caimanta llujshichij! ¡Cai llajtataca Diosca tucuchigrinmari!’ nircacunami.

Pero Lotca mana utca rircachu. Chaimantami angelcunaca Lottapish, paipaj huarmitapish, ishqui ushushicunatapish maquimanta aisashpa callpashpa llujshichun ayudarcacuna. Angelcunaca: ‘¡Cancunapaj causaita quishpichingapajca callpashpa richij! ¡Ama huashaman tigrarishpa ricunguichijchu! ¡Huashaman ricushpaca huañunguichijmi!’ nircacunami.

Lotpish, paipaj ushushicunapish Zóar llajtaman chayajpica Diosca Sodoma, Gomorra llajtacunataca azufreta, ninata cachashpami tucuchirca. Lotpaj huarmica tigrashpa ricushcamantami cachi rumi tucurca. Cutin Lotpish, paipaj ushushicunapish Diosta cazushcamantami quishpirircacuna. Lotpaj huarmi Diosta mana cazushcamantaca llaquillami sintirishcangacuna. Pero paicunaca Dios nishcata uyashcamantami tranquilo sintirircacuna.