¿Jobca pitaj carca?

Uz llajtapimi Diosta adoraj Job runa causarca. Paica jatun familiayuj, yallitaj charij runami carca. Pobrecunata, viudacunata, yaya mama illaj huahuacunatapishmi ayudaj carca. ¿Alli runa cashpapish llaquicunata charishcangachu?

Job mana yachajpipish Diablomi paita ricucurca. Chaimantami Diosca Diablotaca: ‘¿Ñucata sirvij Jobtachu ricucungui? Pai shinaca pi mana tiyanchu. Ñucata cazuj, allita ruraj runami can’ nirca. Shina nijpimi Diabloca: ‘Animalcunata, allpacunata cushpa bendiciajpimi cantaca cazun. Can tucuita quichujpica ña mana cantaca cazungachu’ nishpa cutichirca. Chaita nijpimi Diosca: ‘Pai imalla charishcacunaca cambaj maquipimi. Paillata ama huañuchinguichu’ nirca. Jehová Diosca Job paita cazushpa catinata yachashcamantami Diablo llaquichichun saquirca.

¿Diabloca ima shinataj Jobta llaquichirca? Puntapica, Jobpaj huagracunata, burrocunata shuhuachunmi Saba llajtamanta runacunata utilizarca. Qꞌuipaca ninata urmachishpami tucui ovejacunata huañuchirca. Camellocunata shuhuachunpishmi caldeocunata utilizarca. Animalcunata cuidajcunapishmi huañurcacuna. Chai qꞌuipaca Jobpaj huahuacuna micucujpimi huasi urmashpa paicunata huañuchirca. Chaimi Jobca yallitaj llaquirirca. Shinapish Diosta sirvinataca manataj saquircachu.

Diabloca Jobta ashtahuan llaquichisha nishpami chaqui puntamanta uma coronacama chugrichirca. Chaitaca achcatami nanachirca. Imamanta achca llaquicunata charishcata mana yachashpapish Jobca Diosta adorashpami catirca. Chaimantami Diosca cushilla sintirirca.

Qꞌuipaca Diabloca quimsa runacunatami cacharca. Paicunaca Jobtaca: ‘Ima juchata rurashpami pacacungui. Chaimi Diosca canta castigacun’ nircacunami. Chashna nijpimi Jobca: ‘Ima juchata mana rurashcanichu’ nirca. Qꞌuipaca Jehová Diosmi cai llaquicunataca churacunga nishpami yuyai callarirca. Chaimantami Dios paihuan mana alli cashcata nirca.

Elihú shuti jovenmi imata mana nishpa Job chai quimsa runacunahuan parlanacucujta uyacurca. Chaimi Elihuca: ‘Cancunaca pandarishcami canguichij. Diosca ñucanchij yuyashcatapish yalli jatunmari. Paica mana allitaca nunca mana ruranchu. Ashtahuanpish llaquicunahuan caj gentecunataca ayudanmi’ nirca.

Jehová Diosca Jobtaca: ‘¿Jahua cielotapish, allpatapish ruracujpica maipitaj carcanguiyari? ¿Canca imamantataj ñucataraj juchachisha ningui? Chai llaquicunata imamanta charishcata mana yachashcamantami chashna ningui’ nircami. Jobca pandarishca cashcata cuentata cushpami Diostaca: ‘Pandarishcanimi. Ñuca imalla nishcataca perdonahuai. Ñucaca parlashcallatami canmantaca uyarcani. Cunanmi cantaca alli rijsini. Can tucuita rurai tucuj cashcatami yachani’ nirca.

Chai tucui llaquicunata charishca qꞌuipami Diosca Jobtaca paipaj ungüitapish allichishpa, ñaupa charishcacunatapish yalli curca. Jobca achca huatacunatami cushilla causarca. Sinchi cajpipish Diosta cazushcamantami paica Jobta bendiciarca. ¿Canpish Job layachu ima llaquicunata charishpapish Diosta cazushpa catisha ningui?