Moisesca Diosta sirvinatami decidirca

Jacobpaj familiacunataca israelitacuna nishpami Egiptopica rijsijcuna carca. Jacobpish, Josepish huañushca qꞌuipaca shujtaj faraonmi mandai callarirca. Paica israelitacuna egipciocunata yalli sinchi tucucujta ricushpami mancharirca. Chaimantami israelitacunataca esclavocunata rurarca. Paicunataca ladrillocunata rurachun, allpapi sinchita trabajachunmi obligarca. Egipciocuna yallitaj llaquichijpipish israelitacunaca ashtahuanmi mirashpa catircacuna. Chaita ricushpami faraonca israelitacunapaj llullu cꞌari huahuacunata huañuchichun mandarca. Chaimantami israelitacunaca achcata mancharishcangacuna.

Jokébed shuti israelita huarmica sumaj huahuatami charirca. Huahuata cuidangapajmi shuj canasta ucupi churashpa Nilo yacu uripi tiyaj carrizo chaupipi churarca. Chai huahuapaj pani Miriamca paihuan ima tucujta ricungapajmi chai cꞌuchullapi saquirirca.

Faraonpaj ushushica yacupi armangapajmi uriyashca carca. Chaipimi shuj canastata ricurca. Chai canasta ucupica shuj llullu huahua huacacujta ricushpami llaquirirca. Chaimi Míriam cꞌuchuyashpaca: ‘¿Cai huahuata chuchuchishpa huiñachichunca shuj huarmita cayamuchun ninguichu?’ nirca. Paica: “¡Ari, mashcamugri!” nircami. Chaimi Miriamca paipaj mamallatataj pushamugrirca. Jokébed chayajpica faraonpaj ushushica: ‘Cai huahuata huiñachishpa cui, pagashallami’ nircami.

Huahua ña huiñajpica Jokebedca faraonpaj ushushimanmi entregarca. Paica Moisés shutitami shutichirca. Paipaj huahuata shinami huiñachirca. Moisesca faraonpaj huahua shina cashcamantami tucui pai munashcata charirca. Pero Diostaca nunca mana cungarircachu. Moisesca israelita cashcata yachashcamantami Jehová Diosta sirvinata decidirca.

40 huatacunata charishpami Moisesca paipaj llajtata ayudasha nirca. Shuj punllaca egipcio runa shuj israelitata macacujtami ricurca. Chaita ricushpami Moisesca chai runataca tucui fuerzahuan huajtashpa huañuchirca. Chaimi arena allpapi pambarca. Chaita yachaj chayashpami faraonca Moisesta huañuchisha nirca. Chaimantami Madián llajtaman miticushpa rirca. Chaipica Diosmi paita cuidarca.