Diosca Jehosafattami ayudarca

Rey Jehosafatca Baal diostapish, shujtaj yanga dioscunatapishmi Judá llajtamanta tucuchirca. Dios mandashcacunata gentecuna yachachunmi munarca. Chaimantami Dios mandashcacunata tucui Judapi gentecunaman yachachichun pushajcunatapish, levitacunatapish cacharca.

Judá cꞌuchullapi caj llajtacunaca Jehová ayudaj cashcata yachashpami judiocunahuan macanacunata mancharcacuna. Chaimantami rey Jehosafatman regalocunata cujcuna carca. Pero moabitacuna, amonitacuna, Seír urcupi tiyaj pueblocunaca Judahuan macanacungapajmi rircacuna. Jehosafatca Diospaj ayudata minishtishcatami yacharca. Chaimantami tucui cꞌaricunata, huarmicunata, huahuacunatapish Jerusalenpi tandachirca. Chaimi paicunapaj ñaupajpi: ‘Jehová Dioslla can ayudajllapimi cai macanacuitaca ganashun. Imata ruranata huillahuai’ nishpa Diosta mañarca.

Diosca Jehosafat mañashcata uyashpami: ‘Ama manchaichijchu. Ñucami ayudasha. Cancunapaj puestocunapi casijlla caichij. Cancunata ima shina quishpichijta ricuichij’ nirca. ¿Ima shinataj Diosca quishpichirca?

Cayandij tutamantaca Jehosafatca cantajcunata agllashpami soldadocunapaj ñaupajpi richun churarca. Paicunaca Jerusalenmanta llujshishpami Tecoa nishca macanacuna pambaman rirca.

Cantajcunaca cushicushpami sinchita cantacurcacuna. Jehová Diosta alabashpa cantacujpimi paica paipaj pueblomanta macanacucurca. Chaimantami amonitacuna, moabitacunapish paicunapura macanacui callarircacuna. Chashnami tucuicuna huañurca. Pero Diosca judiocunata, soldadocunata, sacerdotecunatapishmi cuidarca. Judá cꞌuchullapi caj llajtacunaca Jehová paipaj pueblota cuidashcatami yacharcacuna. ¿Diosca ima shinataj paipaj pueblota cuidacun? Paica gentecunata ayudangapajca tucuitami ruran. Pipaj ayudataca mana minishtinchu.