Naamán runapish, shuj jovencitapish

Israelmanta shuj jovencitaca Siria llajtapimi causarca. Paipaj huasimantapish, familiamantapishmi carupi carca. Sirio soldadocunami paitaca apashca carca. Cunanca soldadocunata mandaj Naamanpaj huarmita sirvijmi carca. Siriocuna yanga dioscunata adorajpipish paica Jehová Diostami adoraj carca.

Naamanca lepra ungüihuan cashcamantami paipaj aichata nanachij carca. Chai jovencitaca ayudanatami munarca. Chaimantami Naamanpaj huarmimanca: ‘Cambaj cusata alliyachichunmi shuj runata rijsini. Israelpimi Jehovapaj shuj profeta tiyan. Paipaj shutica Eliseomi can. Paimi alliyachinga’ nirca.

Naamanpaj huarmica chai jovencita ima nishcatami paipaj cusaman huillarca. Naamanca alli tucusha nishpami Israelpi causaj Eliseopajman rirca. Paica reyta shina paita chasquinatami yuyarca. Shinapish Eliseoca pai rinapaj randica paita sirvij runatami Naamanpajman cacharca. Sirvij runaca Naamantaca: ‘Jordán yacuman rishpa chaipi siete cutin pambarigri. Chashnami alli tucungui’ nishpami huillarca.

Chashna nijpica Naamanca achcatami pꞌiñarirca. Paica: ‘“Profetaca ñucata chasquishpa, paipaj maquita ñuca jahuapi caiman chaiman cuyuchishpa, paipaj Diospaj shutita nishpami mañanga” nishpami yuyarcani. ¿Manachu Siriapi tiyaj yacucunaca tucui yacucunatapish ashtahuan yalli alli can? ¿Manachu chai yacucunapi pambari tucuni?’ nishpami Eliseopaj huasimanta rirca.

Naamanta sirvijcunaca pai alli yuyachunmi ayudarcacuna. Paicunaca: ‘Jambiringapajca imatapish ruranguimanmi ¿nachu? Chai profeta rurachun mandashcaca mana sinchichu. ¿Ima nishpataj mana rurasha ninguiyari?’ nircacunami. Chaita uyashpami Naamanca Jordán yacuman rishpa siete cutin pambarirca. Chashna rurashpami alli tucurca. Chaimi achcata cushicushpa Eliseota agradicinaman tigrarca. Paica: ‘Cunanmi yachani Jehová Dios shina pi mana tiyashcata’ nircami. Naamán paipaj huasiman sano tigrashcata ricushpaca, ¿Israelmanta jovencitaca ima shinashi sintirishcanga?