Josiasca Jehová Diostami cazurca

Josiasca ocho huatacunata charishpami Judá llajtata mandai callarirca. Chai tiempopica gentecunaca magiata rurashpa, yanga dioscunata adorashpami causajcuna carca. Josías 16 huatata charishpaca Dios munashca shina adorangapajmi paimanta yachasha nirca. 20 huatata charishpaca tucui yanga dioscunatapish, altarcunatapishmi tucuchi callarirca. Ña 26 huatata charishpaca Diospaj huasita allichingapajmi prepararca.

Sacerdote Hilquiasca Diospaj huasipimi Diospaj Leyta tarirca. Chaitaca Moisesmi escribishcanga. Reypaj secretario Safán runami chai Leytaca Josiaspaj ñaupajpi sinchita liyi callarirca. Josías chaita uyashpaca judiocuna achca huatacunata Diosta mana cazushcatami ricurca. Chaimi Hilquiastaca: ‘Diosca ñucanchijhuanmi yallitaj pꞌiñarishca. Imata rurana cashcata Dioshuan parlagri’ nirca. Diosca Huldá shuti profeta huarmimanca: ‘Judapi causajcunaca ñucata saquishcami. Josías humilde cashcamantami pai mandacui punllacunapica cai pueblotaca mana llaquichisha’ nircami.

Josiasca chaita uyashpami Diospaj huasiman rishpa Judapi causajcunata tandachirca. Qꞌuipaca paicunapaj ñaupajpimi Diospaj Leyta sinchita liyirca. Josiaspish, judiocunapish: ‘Shungumantami Diosta cazushun’ nircacunami.

Judiocunaca Leypi mandashca shina Pascuataca achca tiempotami mana rurashcacuna carca. Chaimi Josiasca Pascuata cada huata rurana cashcata yuyachingapajca: ‘Jehovata yuyarishpa Pascuata rurashunchij’ nirca. Qꞌuipaca achca animalcunata huañuchishpa allichichun, Diospaj huasipipish cantajcuna tiyachun nishpami mandarca. Chashnami Pascua fiestata rurarcacuna. Qꞌuipaca Levadura illaj tandata micuna fiestatami siete punllacunata rurarcacuna. Samuel causacushca punllacunamantami chashna Pascuataca mana rurashcacuna carca. Josiasca shungumantami Diospaj Leyta cazurca. ¿Canpish Diosmanta yachanata munanguichu?