Diosca Jeremiastami predicanaman cacharca

Jehová Diosca Judá llajtapi profeta cachunmi Jeremiasta agllarca. Chaimantami judiocuna mana alli ruraicunata saquichun predicanaman cacharca. Jeremiasca: ‘Gentecunapaj ñaupajpi alli rimanallatapish manaraj yachaj huambrami cani’ nishpami cutichirca. Chaimi Diosca: ‘Ama manchaichu. Ñucami canhuan casha. Imata nichunpish ñucami yachachisha’ nirca.

Jehová Diosca Jeremiastaca Jerusalenpi ancianocunata tandachichunmi mandarca. Qꞌuipaca Diosca: ‘Paicunapaj ñaupajpi puñuta pꞌaqui. Shinallataj paicunamanca: “Jerusalenpish chashnallatajmi tucunga” nigri’ nircami. Jeremías chaita rurajpica ancianocunaca achcatami pꞌiñarircacuna. Pasjur shuti sacerdotepish Jeremiasta macashpami tablacunapi maquicunata, chaquicunata canichishpa churarca. Chaimi Jeremiasca tucui tuta mana cuyuri tucurca. Cayandij punllami Pasjurca paitaca llujshichirca. Jeremiasca: ‘Mana ashtahuan ahuantanichu, ña mana predicasha ninichu’ nircami. Pero ¿chaitachu rurarca? Mana. Alli yuyarishca qꞌuipami Jeremiasca: ‘Cambaj Shimica ñuca shungupica nina rupachij shinami tucurca. Manataj upalla saquiri tucunichu’ nircami. Chaimantami predicashpa catirca.

Achca huatacuna qꞌuipaca shuj mushuj reymi Judá llajtapi mandai callarirca. Panda huillajcunapish, sacerdotecunapish Jeremías huillashcata uyashpami achcata pꞌiñarircacuna. Chaimantami mandajcunamanca: ‘Cai runaca huañunami can’ nircacuna. Pero Jeremiasca: ‘Jehová ima nishcallatami huillacuni. Ñuca yuyaimantaca mana huillacunichu. Ñucataca yangami huañuchisha ninguichij’ nircami. Mandajcunaca chaita uyashpami: ‘Cai runaca mana huañunachu can’ nircacuna.

Jeremías huillashpa catijpica mandajcunaca achcatami pꞌiñarircacuna. Chaimi reytaca paita huañuchichun mañarcacuna. Paicuna chashna mañajpimi reyca: ‘Imatapish paihuan ruraichijlla’ nirca. Pai chashna nijpimi lodo junda jatun jutcupi huañuchun Jeremiasta shitarcacuna. Jeremiasca asha ashami lodopi pambarishpa catirca.

Palaciopi achca autoridadta charij Ébed-Mélec runaca reytaca: ‘Mandajcunaca Jeremiasta shuj jutcupimi shitashcacuna. Chaipi saquijpica huañungami’ nircami. Chaimi reyca: ‘30 cꞌaricunata pushashpa paita llujshichinaman ri’ nirca. Jeremiasca predicanataca manataj saquircachu. ¿Pai shina predicanata munanguimanchu?