Jatun estatuapaj ñaupajpica mana cumurircacunachu

Rey Nabucodonosorca jatun estatuata muscushca qꞌuipaca: ‘Orohuan shuj diosta ruraichij’ nishpami mandarca. Chai diostaca Dura pambapimi churarca. Shinallataj chaipimi importante gentecunata, Sadracta, Mesacta, Abednegotapish tandachirca. Reyca: ‘Trompetacuna, arpacuna, jatun flautacunata tocashcata uyashpaca cai diospaj ñaupajpimi cungurina canguichij. Mana chaita rurajpica nina rupacuj hornopimi shitasha’ nircami. ¿Quimsa hebreo jovencunaca chai diospaj ñaupajpi cumurishcangachu? O ¿Jehová Diosllatachu adorashcangacuna?

Musicata tocachun rey mandajpica tucuicunami yanga diospaj ñaupajpi cumurishpa adorarcacuna. Pero Sadrac, Mesac, Abednegoca mana adorarcacunachu. Chaita ricushpami huaquin cꞌaricunaca reymanca: ‘Quimsa hebreocunaca cambaj diosta mana adoracuncunachu’ nircacuna. Chaimi Nabucodonosorca paicunata cayanaman cachashpaca: ‘Ñuca diosta adorachunmi cutin mandani, mana cazujpica nina rupacuj hornomanmi shitasha. Ñuca maquimantaca maijan dios mana quishpichingachu’ nirca. Pero paicunaca: ‘Ñucanchij Jehová Diosmi quishpichinga. Mana quishpichijpipish jatun reylla, cambaj diostaca mana adorashunchu’ nircacunami.

Nabucodonosorca achcata pꞌiñarishpami paita sirvijcunataca: ‘¡Hornotaca siete cutinhuan yalli rupajyachichij!’ nishpa mandarca. Qꞌuipaca soldadocunataca: ‘Cai jovencunata huatashpa hornoman shitaichij’ nircami. Horno yallitaj rupacushcamantami quimsa hebreocunata ninapi shitaj soldadocunaca huañurca. Qꞌuipaca Nabucodonosorca hornota ricujpica chai ucupi chuscu runacuna puricujtami ricurca. Achcata mancharishpami paita ayudajcunataca: ‘¿Manachu quimsa runacunallata ninaman shitarcanchij? Ñucaca chuscutami ricuni. Shujca angelmi yuyachin’ nircami.

Nabucodonosor hornoman ashtahuan cꞌuchuyashpaca: ‘¡Jatun Diosta sirvijcuna, llujshimuichij!’ nishpami caparirca. Nina chaupimanta quimsandij llujshimujpica mana ima tucushcata ricushpami tucuicuna mancharircacuna. Churanapish, cuerpopish, ajchallapish mana rupashcacunachu carca. Cushnillamanpish mana ashnacurcacunachu.

Nabucodonosorca: ‘Sadracpaj, Mesacpaj, Abednegopaj Diosca jatunmari. Paipaj angelta cachashpami quishpichirca. Paicunapaj Dios shinaca shujtaj diosca mana tiyanchu’ nircami.

Quimsa hebreocunaca ima llaqui japijpipish Jehovallatami adorashun nircacuna. ¿Paicuna shina casha ninguichu?