Jesusca pescadota japijcunamanmi ricurirca

Apostolcunapaj ñaupajpi Jesús ricurishca asha punllacuna qꞌuipallami Pedroca Galilea mama cuchapi pescanaman rirca. Tomás, Santiago, Juan, shujtaj discipulocunapishmi paihuan rircacuna. Tucui tuta linchita yacuman shitashpapish imata mana japircacunachu.

Ña pacaricujpimi shuj runa mama cucha uripi shayacujta ricurcacuna. Chai runaca: ‘¿Pescadota japircanguichijchu?’ nishpami tapurca. Chaimi paicunaca: ‘Imata mana japinchijchu’ nircacuna. Chai runaca: ‘Barcopaj alli ladoman linchita shitaichij’ nircami. Linchita shitajpimi achca pescadocuna jundashcamanta barcomanca mana llujshichi tucurcacuna. Juanca Jesús cashcata cuentata cushpami: ‘¡Paica Jesusmari!’ nirca. Chaita uyashpami Pedroca saltashcahuan nadashpa rirca. Caishujcunapish barcopi catishpami rircacuna.

Mama cucha uriman chayashpaca paicunaca nina jahuapi pescado cusaricujta, tandapish tiyacujtami ricurcacuna. Chaimi Jesusca: “Cunanlla japishca huaquin pescadocunata apamuichij” nirca. Qꞌuipaca: ‘Shamuichij, micunguichij’ nircami.

Micushca qꞌuipaca Jesusca: ‘¿Cai pescadocunata yallichu ñucata cꞌuyangui?’ nishpami Pedrota tapurca. Paica: ‘Ari amito, canta cꞌuyashcataca yachanguimi’ nircami. Shina nijpimi Jesusca: ‘Ñuca ovejacunata cuidangui’ nirca. Cutinllatajmi: ‘¿Ñucataca cꞌuyanguichu?’ nishpa tapurca. Chaimi Pedroca: ‘Ari amito, canta cꞌuyashcataca yachanguimi’ nirca. Chashna nijpimi: ‘Ñuca ovejacunata michingui’ nirca. Quimsa cutinmi Jesusca chaillatataj tapurca. Chaimi Pedroca llaquirishpa: ‘Amito canca tucuitami yachangui. Canta cꞌuyashcatapish yachanguimi’ nirca. Jesusca: ‘Ñuca ovejacunata cuidangui’ nircami. Chai qꞌuipami: ‘Ñucata catinatapish ama saquinguichu’ nirca.