Discipulocunaca achca llajtacunapimi predicarcacuna

Apostolcunaca Jesús mandashca shinami alli huillaicunata muyundij Allpapi predicarcacuna. Huata 47-pica Antioquiamanta huauquicunaca Pablotapish, Bernabetapish Diosmanta predicachunmi cacharcacuna. Ishquindijmi Asia Menorpi tiyaj llajtacunaman rircacuna. Chaipimi Derbe, Listra, Iconio llajtacunapi cushilla predicarcacuna.

Pablopish, Bernabepish tucuicunamanmi predicajcuna carca. Paicunaca charijcunaman, pobrecunaman, jovencunaman, yuyajcunamanmi predicarcacuna. Chaimi achcacunaca Jesusta cati callarircacuna. Paicunaca Chipre llajtata mandaj Sergio Paulomanpishmi Diosmanta predicarcacuna. Pero shuj brujoca paicunatami ama huillachun jarcasha nirca. Chashna jarcasha nijpimi Pabloca: ‘Jehová Diosca cantaca llaquichingami’ nirca. Chai ratomi paica ciego saquirirca. Mandaj Sergioca chaita ricushpami Jesusta cati callarirca.

Chashnallataj mercadocunapi, ñancunapi, sinagogacunapi huasin huasin rishpami Pablopish, Bernabepish predicarcacuna. Shuj punllaca Listrapimi mana purij tucuj runata jambircacuna. Chaita ricushpami dioscuna cashcata yuyashpa gentecunaca paicunata adorashun nircacuna. Chaimi Pablopish, Bernabepish: ‘Diosllatami adorana canguichij. Ñucanchijca cancuna shinallataj runacunallami canchij’ nircacuna. Pero huaquin judiocuna shamushpami gentecunataca Pablopaj contra churarcacuna. Chaimantami gentecunaca Pablomanca rumicunahuan shitarcacuna. Ña huañushca cashcata yuyashpami canlla puebloman sirijta aisashpa paitaca shitarcacuna. Chai ratomi huaquin huauquicuna shamushpa puebloman cutin yaicuchircacuna. Qꞌuipaca Pabloca Antioquiamanmi tigrarca.

Pabloca huata 49-pimi huauqui panicunata cutin ricungapaj Asia Menorman rirca. Qꞌuipaca Europaman rishpami Atenas, Éfeso, Filipos, Tesalónica llajtacunapi, shujtaj ladocunapipish predicarca. Paihuanca Silaspish, Lucaspish, Timoteopishmi rircacuna. Paicunaca mushuj huauqui panicunatami chꞌican chꞌican congregacioncunapi tandachircacuna. Chashnami paicunataca Diosta alli sirvichun animarcacuna. Corinto llajtapipish huauqui panicunata animangapajmi Pabloca shuj huata chaupita saquirirca. Shinallataj predicashpa, yachachishpami purirca. Cartacunatapish quillcashpami congregacioncunaman cacharca. Carpa huasicunatapish rurashpami trabajarca. Qꞌuipaca Antioquiamanmi tigrarca.

Huata 52-pica cutinmi Pabloca Asia Menorman tigrarca. Caihuanca ñami quimsa cutin caiman tigrashca carca. Paica janaj ladota rishpami Filipos llajtaman chayarca. Qꞌuipaca Corinto llajtamanmi rirca. Cutin Efesopica huaquin huatacunatami milagrocunata rurashpa, yachachishpa, congregacioncunatapish ayudashpa purirca. Chashnallataj shuj escuelapi tiyaj tandanacuna ucupimi punllanta yachachirca. Chaimi achcacunaca Pablo yachachishcata uyashpa Jesusta catijcuna tucurca. Ña achca ladocunapi Diosmanta predicashpami Jerusalenman Pabloca tigrarca.