Carcelta cuidajca Diosmantami yacharca

Filipos llajtapica shuj demonio japishca huarmi huambrami causarca. Paica shamuj punllapi ima tucunatami adivinaj carca. Chaita ruraj cashcamantami paipaj amocunaca achca cullquita japijcuna carca. Pablopish, Silaspish chai llajtaman chayajpica huambraca: ‘Cai runacunaca jahua pachapi caj Diospajta rurajcunamari’ nishpami caparirca. Achca punllacunata chashna caparishpa catirajpimi Pabloca chai huambrapi caj demoniotaca: “Jesucristopaj shutipimi paimanta llujshichun mandani” nirca. Chashna nijpimi demonioca chai huambramantaca llujshirca.

Chai huambrapaj amocunaca cullquita ña mana japina cashcata yachashpami pꞌiñarircacuna. Chaimi Pablotapish, Silastapish japishpaca mandajcunapajman, juezcunapajman aparcacuna. Paicunapaj ñaupajpica amocunaca: ‘Cai runacunaca bullata rurashpami puricuncuna, leycunatapish mana cazusha nincunachu’ nircacunami. Chashna nijpimi juezcunaca: ‘Cunanca Pablotapish, Silastapish macashpa carcelpi churaichij’ nircacuna. Carcelta cuidajca paicunataca cárcel ucujman caj cuartomanmi aparca, paicunapaj chaquicunatapish jutcushca tablacunapimi canichishpa churarca.

Chaupi tutataca Pablopish, Silaspish Diosta alabashpami cantacurcacuna. Chaipi caj shujtaj prezucunapishmi cantacujta uyacurcacuna. Chashna cantacujpimi ñapish allpa chujchui callarirca. Sinchita chujchujpimi carcelpaj pungucunaca pascarirca. Huatashca cadenacunapish tucui prezucunamantami cacharirirca. Chaimi carcelta cuidajca cárcel ucujman caj cuartocama rishpa pungucuna pascarishca cashcata ricurca. Tucui prezucuna llujshishcata yuyashpami paipaj espadallahuantaj huañuchirinata munarca.

Chaimi Pabloca: ‘¡Ama chaita ruraichu! Tucuicunami caipi canchij’ nishpa sinchita caparirca. Chaita uyashpami carcelta cuidajca Pablopaj, Silaspaj ñaupajpi cumurirca. Qꞌuipaca: ‘¿Quishpiringapajca imatataj rurana cani?’ nishpami tapurca. Chaimi paicunaca: ‘Canpish, cambaj familiapish Jesusta crishpaca quishpiringuichijmi’ nircacuna. Chashnami Pablopish, Silaspish paiman, paipaj familiamanca Diospaj Shimimanta yachachishpa catircacuna. Qꞌuipaca paicunaca bautizarircacunami.