YACHAI 100

Timoteoca Pablotami ayudarca

Eunicepish, Loidapish, huahua Timoteopish.

Joven Timoteoca Listra congregacionpimi sirvirca. Paipaj yayaca griegomi carca. Cutin paipaj mamaca judiami carca. Paipaj mama Eunice, paipaj abuela Loidapish Timoteomanca uchillamantapachami Jehovamanta yachachircacuna.

Pabloca Listra llajtamanmi cutin tigrarca. Chaipimi Pabloca Timoteo huauqui panicunata cꞌuyashcata, paicunata ayudasha nishcatapish ricurca. Chaita ricushpami Pabloca Timoteotaca paihuan richun invitarca. Qꞌuipa punllacunacarin Timoteo alli yachachij cachun, alli huillaj cachunpishmi ayudarca.

Pablotapish, Timoteotapish Diospaj espiritumi maiman rinata yuyachirca. Shuj tutaca Pabloca shuj muscuipi shinami shuj runata ricurca. Chai runaca: ‘Macedonia llajtaman rishpa ayudagri’ nircami. Chaimantami Pablopish, Timoteopish, Silaspish, Lucaspish chaiman rishpa Diosmanta huillarcacuna. Chashnallataj huauqui panicuna mirarichunmi ayudarcacuna.

Macedoniapi saquirij Tesalónica llajtapica achcacunami Jesusta cati callarircacuna. Pero huaquin judiocunaca Pablotapish, paihuan rijcunatapishmi envidiarcacuna. Chaimantami millai gentecunata tandachishpa paicunata sirij sirijta aisashpa mandajcunapajman aparcacuna. Chai judiocunaca: ‘Cai runacunaca Roma llajtata mandajpaj contracunami can’ nishpa caparircacuna. Chaimi Pablopish, Timoteopish tuta paca tucushpa Berea llajtaman rircacuna.

Bereapi causajcunaca Diosmanta uyanatami munarcacuna. Chaimantami griegocunapish, judiocunapish Jesusta cati callarircacuna. Pero Tesalonicamanta huaquin judiocunaca problemacunata rurasha nishpami Bereaman shamurcacuna. Chaita yachashpami Pabloca Atenasman rirca. Cutin Timoteoca Silashuanmi huauqui panicunata animangapaj Bereapi saquirirca. Qꞌuipa punllacunaca Pabloca cutinmi Timoteotaca Tesalonicapi caj huauqui panicunata animachun cacharca. Paicunataca catirashpami llaquichicurcacuna. Qꞌuipaca Timoteotaca shujtaj congregacioncunatapish visitachun, animachunmi cacharca.

Pabloca paipaj huasipimi cadenacunahuan prezushca can. Chaipimi cartata escribichun Timoteoman dictacun.

Pabloca Timoteomanca: ‘Diosta sirvisha nijcunatami llaquichingacuna’ nircami. Jesusta catij cashcamantami Timoteoca llaquicunata aparca, carcelpipish churashca carca. Chashna jahuapish Diosta shungumanta cazushcamantami cushilla sintirirca.

Pabloca Filipos llajtapi causajcunataca: ‘Timoteotami cachagrini. Paimi Diosta ima shina sirvinata, ima shina huillanata yachachinga’ nircami. Pabloca Timoteopimi confiarca. Achca huatacunatami ishquindij Diosta sirvishpa alli amigos carcacuna.

“Pai shina allita rurajtaca pi shujtajta mana charinichu. Paimi tucui shunguhuan cancunamantaca sustarin. Caishujcunaca paicunapaj allipajllami mashcancuna. Paicunaca Jesucristo munashcataca mana mashcancunachu” (Filipenses 2:20, 21).