YACHAI 101
Pablotaca Roma llajtamanmi aparcacuna
Pabloca paipaj tercer viajepica Jerusalencamami rirca. Chaipi huillashpami paipaj viajetaca tucuchirca. Chai llajtapimi Pablotaca carcelpi churarcacuna. Shuj tutaca Jesusca muscuipi laya ricurishpami: ‘Roma llajtaman rishpa, chaipi huillagri’ nirca. Qꞌuipaca Jerusalenmanta Cesareamanmi aparcacuna. Chaipimi Pabloca ishqui huatacunata carcelpi carca. Shuj punllaca Pabloca mandaj Festopaj ñaupajpimi: ‘¡Ñucataca César juzgachunmi mañani!’ nirca. Chaimi Festoca: ‘Cesarllataj juzgachun mañashcamantaca cantaca paipajmanmi cachasha’ nirca. Qꞌuipataca Roma llajtaman richunmi Pablotaca shuj barcopi cacharca. Paihuanca Lucaspish, Aristarcopishmi rirca.
Achca punllacunatami barcopi ricujpica shuj jatun huaira, tamya jatarirca. Chaimantami maiman mana ri pudircacuna. Tucuicunami: ‘¡Cunantajca huañushuntajmi!’ nircacuna. Shinapish Pabloca: ‘Ñucataca shuj angelmi muscuipica: “Ama manchaichijchu. Shujllapish mana huañunguichijchu. Roma llajtamanca chayanguichijtajmi” nishpa huillarca’ nircami.
14 punllacunatami achca tamya, achca huaira tiyarca. Chai qꞌuipaca ñapishmi shuj chaquishca allpata ricurcacuna. Chai allpaca Malta shuti islami carca. Chaiman chayagricujpimi barcoca mama cucha chaupipi tandarishca allpahuan chocashpa mana cuyuri tucurca. Chaimantami barcoca pꞌaquirirca. 276 gentecunamantaca partecunaca nadashpa, shujtajcunaca barco pꞌaquirishcacunapi japirishpami chaquishca allpaman chayarcacuna. Chaipi causajcunaca paicunata cunuchingapajmi ninata japichircacuna.
Quimsa quillacuna qꞌuipaca soldadocunami Pablotaca Roma llajtaman shujtaj barcopi pusharcacuna. Ña chayajpica huauqui panicunaca Pablotami ricunaman rircacuna. Paica paicunata ricushpami cushilla sintirishpa Diosta pagui nirca. Pabloca ishqui huatacunatami shuj alquilashca huasipi prezu saquirirca. Paitaca shuj soldadomi cuidarca. Gentecuna paita visitanaman rijpica Diospaj Gobiernomantapish, Jesusmantapishmi yachachirca. Shinallataj Asia Menorpi tiyaj congregacioncunaman, Judeapi tiyaj congregacioncunamanpishmi cartacunata escribirca. Jehovami achca llajtacunapi alli huillaicunata huillachun Pablotaca cachashca carca.
“Tucui imata rurashpapish Diosta sirvijcuna cashcatami ricuchinchij. Chaimantami ñucanchijca: achca pruebacunata charishpapish, llaquicunata charishpapish, ima illajlla cashpapish, llaquicunapi cashpapish ahuantanchij” (2 Corintios 6:4).