YACHAI 12
¿Bibliata yachashpa catichunca imataj ayudanga?
Bibliata estudianaca achcatami ayudan. Pero maipica Bibliata estudiashpa catinaca mana jahuallachu can. Huaquinpica Bibliata yachanata valishachu manachu valisha nishpachari yuyanchij. ¿Bibliata yachashpa catingapajca imamantataj esfuerzota rurana cangui? ¿Jarcaicuna tiyajpipish Bibliata estudiashpa catingapajca imatataj rurana cangui?
1. ¿Bibliata estudianaca imamantataj valishca can?
“Diospaj Shimica causajmi, tucuita rurai tucujmi” can (Hebreos 4:12). Bibliapica Yaya Dios ñucanchijmanta imata yuyashcata, imata sintishcatami parlan. Bibliata yachashpami Yaya Diostaca ashtahuan rijsingui, alli decisioncunatapish agllangui, esperanzatapish charingui. Ashtahuancarin Diospaj alli amigo tucushpami cushilla causangui.
2. ¿Bibliapi yachachishcacuna valishca cashcataca imamantataj cuentata cuna canchij?
Bibliapi yachachishcacunaca orotapish yalli valishcami can. Chaimantami Bibliapica: ‘Mana llullaj shimitaca randishpa ama tigra cꞌatungui’ nin (Proverbios 23:23). Bibliapi yachachishcacuna achca valishca cashcata intindishpaca ima jarcaicuna tiyajpipish chai yachachishcacunata estudiashpa catingapajmi esfuerzota rurana canchij (Proverbios 2:4, 5-ta liyipai).
3. ¿Bibliata yachashpa catichunca Jehová Diosca imatataj ruranga?
Tucui poderta charij Jehová Diosca cambaj amigo cashcamantami can ima shina cashcata alli rijsin. Chaimantami paimanta ashtahuan yachachun ayudasha nin. Yaya Diosca “allita ruranatapish, allita munanatapish” cushami nin (Filipenses 2:13-ta liyipai). Chaimanta estudiana munaita charichun o imalla yachashcata causaipi pajtachichunpish paimi ayudanga. Shinallataj Yaya Diosca jarcaicunata mishachun, shujtajcuna catirashpa llaquichijpipish fuerzata cushpami ayudanga. Bibliata yachashpa catingapajca Diosta mañai (1 Tesalonicenses 5:17).
ASHTAHUAN YACHAI
Shujtajcuna jarcaicunata churajpi o achca ocupado cashpapish Bibliata yachashpa catingapajca imata rurai tucushcatami ricushun. Jehová Diospish canta ima shina ayudai tucushcatami ricushun.
4. Bibliata estudianaca valishcami cana can
Maipica achca cosascunata rurana cashcamantami Bibliata estudiangapaj tiempota mana charinchij. Pero ¿imatataj rurai tucungui? Filipenses 1:10-ta liyipai. Qꞌuipaca cai catij tapuicunatami yachashun:
¿Cambajca imataj alli cajcuna o valishcacuna can?
¿Bibliata estudiana importante cashcataca ima shinataj ricuchi tucungui?
Shuj baldepi allpata churashpa qꞌuipaman rumicunata churajpica rumicunaca ña mana yaicunchu.
Pero rumicunataraj churajpica allpaca casi tucuimi yaicun. Chashnallataj ñucanchij causaipi imacuna ashtahuan valishca cashcata puntapi churashpaca shujtaj ruraicunapajpish tiempotami charishun.
Tucuicunami Diosta rijsinata, paita adoranata minishtinchij. Bibliata yachashpaca Yaya Diostami rijsinchij. Mateo 5:3-ta liyipai. Qꞌuipaca cai catij tapuitami yachashun:
¿Bibliata estudianata puntapi churashpaca ima shinataj causashun?
5. Shujtajcuna jarcajpipish yachashpa cati
Huaquincunaca Bibliata estudianata saquichunmi imatapish ningacuna. Francesco shutimanta yachashun. VIDEOTA ricui. Qꞌuipaca cai catij tapuicunatami yachashun:
¿Francesco paipaj familiaman, paipaj amigocunaman Bibliata yachacushcata huillajpica imatataj rurarcacuna?
¿Paipajca Bibliamanta yachashpa catinaca imamantataj alli carca?
2 Timoteo 2:24, 25-ta liyipai. Qꞌuipaca cai catij tapuicunatami yachashun:
¿Bibliata yachacushcamantaca cambaj familia, cambaj amigocunaca imatataj yuyancuna?
¿Cai versocunapi nishca shinaca, Bibliata yachachun pi jarcajpica imatataj rurana cangui? ¿Imamantataj chaita rurana cangui?
6. Jehová Dios canta ayudanapi cri
Jehová Diosta ashtahuan rijsishpaca paita cazushpami cushichishun. Shinapish huaquinpica Dios munashca shina cambiocunata ruranaca sinchimi canga. Pero Jehová Diosmi canta ayudanga. VIDEOTA ricui. Qꞌuipaca cai catij tapuicunatami yachashun:
¿Jim runaca Dios munashca shina causangapajca imatataj rurana carca?
¿Pai rurashca cambiocunamantaca imatataj ashtahuan munarcangui?
Hebreos 11:6-ta liyipai. Qꞌuipaca cai catij tapuicunatami yachashun:
¿Jehová Diosca ‘paita mashcajcunaman’ o paita rijsingapaj tucuita rurajcunamanca imatataj cunga?
¿Bibliata yachashpa catingapaj imallata ruracushcata ricushpaca Yaya Diosca ima shinashi sintiringa?
HUAQUINCUNACA: “¿Imapajtaj Bibliata estudiacungui?” nishpami tapuncuna.
¿Chashna tapujpica imatataj cutichinguiman?
YUYARISHUNCHIJ
Bibliata estudiana mana fácil cajpipish yachanata mana saquishpaca cushillami causangui. Jehová Diospi shunguta churajpica paillatajmi bendicianga.
Yuyaringapaj tapuicuna
¿Biblia yachachishcacunataca imamantataj valorangui?
¿Imacuna ashtahuan valishca cashcata intindishpaca imatataj rurana cangui?
¿Bibliata estudiashpa catingapajca imamantataj Diosta ayudahuai nishpa mañana cangui?
CAICUNATAPISH RICUI
Huaquin gentecunaca alli yuyashpa paicunapaj tiempohuan imata rurashcata ricui.
“Ñucanchij tiempohuan imata ruranata alli yuyashun” (Rijchari, febrero de 2014)
Shuj huarmica Diostami cazusha nirca. Pero pai imallata ruracushcataca paipaj cusaca mana intindircachu. Jehová Dios ima shina ayudashcata ricui.
Yaya Diosta cazunata mana saquishpa shuj huarmi paipaj cusata Diosta sirvichun ima shina ayudashcata ricui.
Testigo de Jehovacunaca pandarishca cashcatami yuyarcani (6:30)
Huaquincunaca testigo de Jehovacunaca familiatami chꞌicanyachin nincunami. Pero ¿chaica ciertochu can?
“¿Testigo de Jehovacunaca familiata chꞌicanyachinchu?” (jw.org paginapi ricui)