¿Dios ñucanchij adoracionta chasquichunca imatataj rurana canchij?

Yachai 13-pi ricushca shinaca tucui religioncunaca Diospaj ñaupajpi mana alli ricurinchu. Pero Dios munashca shina paita adorashpami cushichi tucunchij. ¿Yaya Diosca ‘ima laya adoracionta’ o ima laya religiontataj chasquin? (Santiago 1:​27, NWT, notata ricui). Biblia ima yachachishcata ricushun.

1. ¿Yaya Diosta ima shina adorana cashcataca maipitaj yachai tucunchij?

Paita ima shina adorana cashcataca Bibliapimi yachai tucunchij. Jesusca Yaya Diostaca: “Cambaj Shimica manataj llullajchu” nircami (Juan 17:17). Huaquin religioncunaca Biblia yachachishcacunata catinapaj randica gentecunapaj yachachishcacunata, paicunapaj ruraicunatami catincuna. Pero ‘Yaya Diosca paipaj mandashcacunata yangalla cashcata rurajcunataca’ mana munanchu (Marcos 7:​9-ta liyipai). Cutin ñucanchijca Bibliapi mandashcacunata yuyaipi charishpa, paipaj mandashcacunata cazushpaca Yaya Diostami cushichinchij.

2. ¿Jehová Diostaca ima shinataj adorana canchij?

Jehová Dios ñucanchijta ruraj cashcamantami paillata adorana canchij (Apocalipsis 4:11). Chaimantami santocunahuan Diosta mana adorana canchij (Isaías 42:8-ta liyipai). Ashtahuanpish paillatami cꞌuyana, adorana canchij.

Yaya Diostaca ‘jucha illaj, pai munashca shinami’ adorana canchij (Romanos 12:1). Dios munashca shina adorangapajca paipaj mandashcacunatami ñucanchij causaipi pajtachina canchij. Por ejemplo, Jehová Diosta cꞌuyajcunaca cazarashcacunaman cushca consejocunatami cazuncuna. Shinallataj drogacunamanta, fumanamanta, tragota ubyanamanta, shujtaj viciocunamantapishmi caruyancuna.a

3. ¿Imamantataj Jehová Diosta cazujcunahuan adorana canchij?

Diosta cazujcunaca cada semanami Yaya Diosta alabangapaj tandanacuna canchij (Salmo 111:1, 2). Tandanacuipica cantashpami Diosta alabanchij (Salmo 104:33-ta liyipai). Ñucanchijpurapish animanacunchijmi. Jehová Dios ñucanchijta cꞌuyashcamanta, huiñai causaita charichun munashcamantami tandanacuicunaman richun mandan.

ASHTAHUAN YACHAI

4. Jehová Diosta santocunahuan adoranaca mana allichu can

VIDEO: ¿Diosca santocunahuan adorachun munanchu? (3:26)

• ¿Ñaupa punllacunapi huaquin israelitacuna curi bizita adorashcamantaca imataj tucurca?

Huaquincunaca santocunahuan Yaya Diosta adorashpami paipaj cꞌuchullapi cashcata sintincuna. Pero ¿manachu santocunahuan Diosta adorashpaca paimanta caruyancuna? Éxodo 20:​4-6 y Salmo 106:​35, 36-ta liyipai. Qꞌuipaca cai catij tapuicunatami yachashun:

• ¿Huaquincunaca imacunallahuantaj Diosta adorancuna?

• ¿Diosca santocunahuan adoranamantaca imatataj yuyan?

• ¿Diosta santocunahuan adoranamantaca imatataj yuyangui?

5. Jehová Diosllata adorashpaca panda crishcacunatami saquishun

VIDEO: Diosmanta verdadta yachashpami cushilla cani (5:16)

Salmo 91:​14-ta liyipai. Qꞌuipaca cai catij tapuitami yachashun:

• ¿Diosta cꞌuyajpi, paillata adorajpica paica ima shinataj bendicianga?

6. Tandanacuicunapi Diosta adorashunchij

Tandanacuicunapi cantashpa, participashpami Jehová Diosta alabanchij. Ñucanchijpish animarinchij, shujtajcunatapishmi animanchij. Salmo 22:22-ta liyipai. Qꞌuipaca cai catij tapuicunatami yachashun:

• ¿Tandanacuicunapi shujtajcunata participajta ricushpaca cushicunguichu?

• ¿Tandanacuicunapi participangapaj allichirisha ninguichu?

7. Diosca shujtajcunaman imalla yachashcata huillachunmi munan

Bibliapi imalla yachashcata shujtajcunaman huillangapajmi oportunidadcunata charinchij. Salmo 9:1 y 34:​1-ta liyipai. Qꞌuipaca cai catij tapuitami yachashun:

• ¿Bibliamanta imata yachashcatataj shujtajcunaman huillasha ningui?

YUYARISHUNCHIJ

Ñucanchijta Ruraj Jehová Diosllata adorashpa, tandanacuicunapi paita alabashpa, paimanta imalla yachashcata shujtajcunaman huillashpaca paitami cushichinchij.

Yuyaringapaj tapuicuna

• ¿Dios munashca shina paita adorangapajca maipitaj yachai tucunchij?

• ¿Imamantataj Jehová Diosllata adorana canchij?

• ¿Diosta adorangapajca imamantataj paita cazujcunahuan tandanacuna canchij?

CAICUNATAPISH RICUI

Shuj huarmi santocunata adoranata saquishcamanta cushilla sintirishcata ricui.

“Bibliata yachashpami cambiashcacuna” (Huillaj, 1 de julio de 2011)

Tandanacuicunapi participangapaj huaquin yuyaicunata ricui.

“Jehová Diosta tandalla alabashunchij” (Huillaj, enero de 2019)

Shuj jovenpajca tandanacuiman rina sinchi cajpipish tandanacuicuna paita ima shina ayudashcata ricui.

Jehovami ñucata ayudashca (3:​07)

Achca gentecunaca Diostaca cruzhuanmi adorancuna. Pero ¿Diosta adorangapajca cruzta charinachu canchij?

“¿Testigo de Jehovacunaca imamantataj cruzta mana utilizanchij?” (jw.org paginapi ricui)