¿Huañushpaca imataj tucunchij?

¿Quiquinpaj familia huañushcachu? Chashna llaquipi cashpaca: “¿Huañushcacunaca causashpa catingachu? ¿Ñuca huañushca familiata cutin ricushachu?” nishpachari tapurishcangui. Cai yachaipi, catij yachaipipish Biblia ima yachachishcatami ricushun.

1. ¿Huañushpaca imataj tucunchij?

Huañuitaca Jesusca dorminahuanmi compararca. ¿Imamantataj chashna compararca? Pipish dormicushpaca paipaj ladopi ima tucushcataca mana sintinchu. Chashnallatajmi huañushpaca imata mana sintinchij, ni maipi mana sufrinchij. Bibliapica: “Huañushcacunaca ña imata mana yachanchu” ninmi (Eclesiastés 9:5-ta liyipai).

2. ¿Huañushcacuna mana sufricushcata yachanaca ima shinataj ayudan?

Achca gentecunaca huañuitapish, huañushcacunatapishmi manchan. Pero Bibliapi huañushcacunahuan ima tucushcata yachanami tranquilos sintirichun ayudanga. Jesusca: ‘Mana llullami cancunataca huatashca shinamanta cacharichinga’ nircami (Juan 8:32). Huaquin religioncunaca: “Almaca mana huañunchu, causashpami catin” nincunami. Pero Bibliaca mana chashna yachachinchu. Huañushcacunaca maipipish mana sufricunchu, ñucanchijtapish mana llaquichi tucunchu. Chaimantami huañushcacuna ama pꞌiñarichun nishpaca paicunamanta mana rezana canchij, ofrendacunatapish mana cuna canchij.

Ima shinami yachacushcanchij “huañushcacunaca ña imata mana yachanchu”. Pero huaquinpica demoniocunami huañushca familia shina tucushpa gentecunahuan parlan. Chaimantami gentecunaca: “Huañushcacunahuanmi parlai tucunchij” nincuna. Shinapish paicunahuan parlanapaj randica demoniocunahuanmi parlancuna. Demoniocunahuan parlanaca peligrosomi can. Chaimantami Jehová Diosca huañushcacunahuanca mana parlachun munan (Deuteronomio 18:10-12-ta liyipai). Huañushcacunahuan ima tucushcata yachanami demoniocunamanta cuidarichun ayudan.

3. Huañushca qꞌuipaca mana causashpa catinchijchu

Gentecunaca huañushcacunamantaca chꞌican chꞌican yuyaicunatami charin. Pero chai tucui yuyaicunaca mana ciertochu can.

• ¿Can causan ladopica huañushcacunamantaca gentecunaca imatataj crin?

VIDEO: ¿Huañushpaca imashi tucunchij? (shuj partella) (1:19)

Eclesiastés 3:20-ta liyipai. Qꞌuipaca cai catij tapuicunatami yachashun:

• Cai versopi nishca shinaca ¿gentecuna huañushca qꞌuipaca imataj tucun?

• ¿Huañujpica alma o espirituca causashpa catinchu?

Bibliapica Jesuspaj amigo Lázaro huañushcamantami parlan. Lázaro huañushcamanta Jesús ima nishcata yachangapajca Juan 11:11-14-ta liyipai. Qꞌuipaca cai catij tapuicunatami yachashun:

• ¿Jesusca huañuitaca imahuantaj chꞌimbapurarca?

• ¿Chai chꞌimbapuraica huañushcacunamantaca imatataj yachachin?

• ¿Huañushcacunamanta Biblia ima yachachishcata yachashpaca ima shinataj sintiringui?

4. Huañushcacunamanta verdadta yachanami ayudan

Huañushcacunamanta verdadta yachashpami huañushcacunataca ña mana manchashun. Eclesiastés 9:10-ta liyipai. Qꞌuipaca cai catij tapuitami yachashun:

• ¿Huañushcacunaca llaquichi tucunchu?

Huañushcacunamanta Biblia ima yachachishcata yachashpaca paicunamanca ofrendacunata ña mana cushunchu. Huañushcacunamantapish ña mana imata rurashunchu. Isaías 8:19 y Apocalipsis 4:11-ta liyipai. Qꞌuipaca cai catij tapuitami yachashun:

• Huañushcacunaman ofrendata cushpa, paicunapaj ayudata mashcajpica, ¿Diosca ima shinashi sintirin?

5. Huañushcacunahuan ima tucushcata yachashpami cushilla sintirinchij

Huaquin gentecunaca: “Mana allita rurashcamantami huañushca qꞌuipaca sufrinaman rishun” nincunami. Shinapish huañushcacuna mana sufrina cashcata yachashpaca tranquilosmi sintirinchij. Romanos 6:7-ta liyipai, NWT. Qꞌuipaca cai catij tapuitami yachashun:

• Bibliapi nishca shinaca maijanpish huañushpaca paipaj juchamanta perdonashcami can. Shinaca ¿huañushcacunaca paicunapaj pandarishcacunamantaca pagacunchu?

Jehová Diosta ashtahuan rijsishpami pai huañushcacunata mana llaquichi cashcata intindishun. Deuteronomio 32:4 y 1 Juan 4:8-ta liyipai. Qꞌuipaca cai catij tapuicunatami yachashun:

• Cai versocunapi nishca shinaca ¿cꞌuyaj, llaquij, mana utca pꞌiñarij Diosca huañushcacunata llaquichichun saquinmanchu?

• Cai versocunapi huañushcacunamanta verdadta yachanaca, ¿canta ayudanchu? ¿Imamanta chashna ningui?

YUYARISHUNCHIJ

Huañujpica tucuimi chaipi tucurin. Huañushcacunaca mana sufrinchu, shujtajcunatapish mana llaquichinchu.

Yuyaringapaj tapuicuna

• ¿Huañushpaca imataj tucunchij?

• ¿Huañushcacunamanta verdadta yachanaca ima shinataj ayudan?

• Huañushcacuna mana sufricujta yachashpaca, ¿imamantataj cushilla sintirinchij?

CAICUNATAPISH RICUI

“Almamanta” Biblia ima nishcata yachai.

“¿Almaca imataj can?” (jw.org paginapi ricui)

¿Diosca millai gentecunataca infiernopi llaquichinchu?

¿Diosca infiernopi llaquichinchu? (3:07)

¿Huañushcacunataca manchanachu canchij?

¿Huañushcacunapaj espirituca llaquichinchu o ayudanchu? ¿Cai espiritucunaca ciertochu tiyan? (folleto)

Shuj runaca huañushcacunamanta verdadta yachashpami cushilla sintirirca. Paimanta yachai.

“Bibliami ñuca tapuicunataca cutichirca” (Huillaj, 1 de febrero de 2015)