¿Yacharcanguichu?

¿Ñaupa punllacunapica mayordomocunaca imatataj rurajcuna carca?

ÑAUPA punllapica mayordomocunaca amopaj huasipi, chagrapi sirvijcuna pajtachichunmi ricujcuna carca.

Egiptopi Jacobpaj churi José esclavo cajpica paipaj amoca paipaj huasipi mayordomo cachunmi churarca. Paipaj amoca “tucui pai imalla charishcacunataca Josepaj maquipimi churarca” (Génesis 39:2-6). Qꞌuipaca Josepish Egiptopi jatun mandaj tucushpaca paipaj huasipimi shuj mayordomota churarca (Génesis 44:4).

Jesuspaj punllacunapipish haciendata charijcunaca carupimi causajcuna carca. Chaimantami shuj mayordomota paicunapaj allpacunapi cada punlla trabajajcunata ricuchun churajcuna carca.

¿Mayordomoca imallatataj ruraj carca? Apostolcunapaj punllacunapica Romamanta shuj yachaj runaca: “Mayordomoca trabajanata ña alli yachaj, trabajadorcuna alli pajtachijta ricuj, alli trataj runami cana can. Shinallataj mayordomoca tucuitami ña yachani nishpaca mana yuyanachu can. Ashtahuan yachana munaitami charina can” nircami.

Bibliapica huauquicuna panicuna imata ruracushcataca ñaupa tiempopi mayordomocuna imata rurashcahuanmi chꞌimbapuran. Por ejemplo, apóstol Pedroca Jesusta catijcunataca: ‘Cancuna charishca chꞌican chꞌican rurai tucunahuan caishuj chaishujpaj alli mayordomo shina allita ruraichij’ nishpami animarca (1 Pedro 4:10).

Jesuspish paita catijcunaman yachachicushpaca shuj mayordomomantami parlarca (Lucas 16:1-8). Ashtahuanpish jahua pachapi mandanamanta huillashpaca shuj mayordomo o alli cazuj alli yuyaiyuj sirvij huauquicunata agllana cashcatapishmi huillarca. Cai huauquicunaca tucuri punllacunapimi caracuj shina huauqui panicunaman Bibliamanta yachachicun (Mateo 24:45-47, QC, 1989; Lucas 12:42). Paicunaca muyundij Allpapi huauqui panicunapaj feta sinchiyachingapajmi publicacioncunata rurancuna. Chaimantami paicunataca achcata agradicinchij.