Alli huillaicuna folletohuan yachachishun
1. ¿Folleto Alli huillaicunaca ima shinataj can?
1 Julio quillapi Diospaj Mandanamanta Huillashunchij hojapica, Dios cushca alli huillaicuna folletoca, yachachingapaj alli ayuda cashcatami yacharcanchij. Bibliata yachacuj Bibliallapitaj rezachunmi cai publicacionpica versocuna mana quillcashca ricurin. Casi tucui ñucanchij publicacioncunaca ñucanchijllataj yachangapajmi rurashca can, shinapish cai folletoca shuj yachachijhuan yachangapajmi rurashca can. Chaimantami cai folletota piman saquishpaca, Bibliamanta ima shina yachana cashcata ricuchina canchij, chashnami alli huillaicunata yachanaca sumaj cashcata ricunga (Mat. 13:44).
2. ¿Alli huillaicuna folletohuanca ima shinataj punta cutin huillai tucunchij?
2 Punta cutin huillacushpa: Cashnami ni tucungui: “Noticiacunata uyashpami, achca gentecunaca shamuj punllacunapi ima tucunata manchan. ¿Shamuj punllacunapica ashtahuan allichu causashun? ¿Imatataj yuyangui? [Cutichichun saqui.] ¿Bibliapi alli huillaicuna tiyashcata yachanguichu? Huaquin tapuicunata Biblia cutichishcatami cai folletoca ricuchin”. Cai folletota cushpa, tucuri paginamanta shuj tapuita agllachun saqui. Bibliamanta ima shina yachana cashcata ricuchingapajca pai agllashca leccionpi punta parrafota rezashpa yachachi. ¿Imatataj ashtahuan rurai tucungui? Can agllashca leccionpi ricurij shuj tapuita cai folletohuan Biblia imata cutichijtami ricuchi tucungui. Internetpi jw.org paginapi chai leccionpaj shuj video tiyajpica huillacuj ratomi ricuchi tucungui.
3. Alli huillaicuna folletohuan ima shina Bibliamanta yachachinata parlai.
3 Ima shinataj cai folletohuan Bibliamanta yachachi tucunchij: 1) Yanallapi caj tapuicunata rezai yachacuj imata yachagrishcapi yuyachun. 2) Qꞌuipaca parrafota rezai. 3) Cursiva nishcapi ricurij textocunata rezai, shinallataj yanallapi caj tapuita yachacujllataj Bibliahuan cutichichunca alli yuyashpami shujtaj tapuicunata rurana cangui. 4) Chai tapuillapitaj shuj o ashtahuan parrafocuna tiyajpica 2 y 3-pi ricuchishca yuyaicunata cutin rurai, chai tapuita cutichingapaj shuj video tiyajpica yachacujman manaraj ricuchishca cashpaca yachachicushpa ricuchi. 5) Tucuchingapajca yachacuj tapuita cutichichun mañai, shinami entendicushcata yachangui.
4. ¿Cai folletohuan alli yachachij tucungapajca imataj ayudanga?
4 Cai valishca folletota alli rijsishpa, maipi cashpapish pudishpaca cai folletohuan yachachi. Cada leccionta manaraj yachachishpami canhuan yachacujpi yuyana cangui, yachacuj alli entendichunca leccionpi tiyaj versocunahuan ima shina ayudanata yuyai (Prov. 15:28; Hech. 17:2, 3). Cai folletohuan ashtahuan alli yachachij tucushpaca, Diospaj Shimita shujtajcunaman yachachinataca ashtahuanmi munangui.