Yachachin librohuan alli yachachishunchij

Gentecunaca Bibliapi ima nishcata yachashpaca paicunapaj causaipimi pajtachi callarincuna. Chashnami Diospaj amigo tucucushcata ricuchincuna (Sal. 1:1-3). Yachachin librota alli rijsishpami, cai librohuan yachacujcunata Diospajman ashtahuan cꞌuchuyachun ayudashun.

Callari tapuicuna. Cada capitulopimi callari tapuicuna tiyan. Chai tapuicunataca chai temallapitajmi yachashun. Chai tapuicunataca yachacujcuna yachana munaita charichunllami rurai tucunchij. Mana chai rato cutichichun mañanachu canchij. Chashnallataj chai tapuicunamanta ashalla shimicunapi imata yuyashcata parlachunmi mañai tucunchij. Mana alli cutichijpica mana pingaipi churanachu canchij. Ashtahuanpish paicuna imata cutichishcata uyashpami, imata mana entendishcata yachashun. Chashnami paicunata ima shina alli ayudanata yachashun (Prov. 16:23; 18:13).

Apéndice. Yachacujcuna shuj capitulota alli entendijpica, chai capitulopaj apéndice nishcata paillataj qꞌuipaman rezachunmi mañai tucunchij. Paicuna alli entendishcata o mana alli entendishcata yachangapajca, catij yachaipimi tapuicunata rurai tucunchij. Mana tucuita entendishca cajpica yachachicushpami ashalla minutocunapi pai rezashca apendicemanta tucuita o ashallata yachachi tucunchij. Yachachinaman manaraj rishpa ña allichirishca parrafocunata tapuicunatami yachachi tucunchij.

Bibliaca caitami yachachin nishca cuadro. Cada capítulo tucuripimi Bibliaca caitami yachachin nishca cuadro tiyan. Chai cuadropica capitulopi callarij tapuicunatami cutichin. Yachacujcuna capitulota entendishcata o mana entendishcata, shujtajcunamanpish entendichi tucushcata yachangapajmi, chaipi tiyaj yuyaicunata paicunahuan yuyarina canguichij. Shinallataj chai cuadropi tiyaj yuyaicunata, versocunata rezashca qꞌuipaca, ¿chai versocunaca ima shinataj chai yuyaicunata entendichin? nishpa tapushun (Hech. 17:2, 3).