Habacuc causashca shina causashunchij
1. ¿Imamantataj profeta Habacuc shina sintirinchij?
1 Cai pachapi millai ruraicuna ashtahuan miracujta ricushpaca ñucanchijpish Habacuc shinami sintirinchij. Paica, ¿ima nishpataj millai ruraicunata ricuchishpa catingui? nishpami Jehová Diosta tapurca (Hab. 1:3; 2 Tim. 3:1, 13). Habacuc huillashcapi, paipaj tucui causaihuan Diosta servishcapi yuyanami, Diospaj Juicio Punlla chayamungacama aguantashpa catingapaj ayudanga (2 Ped. 3:7).
2. ¿Habacuc shina Diosmanta ama caruyangapajca imatataj rurana canchij?
2 Jehovamanta ama caruyashunchij. Habacucca mana alli ruraicunamanta llaquirishpalla causanapaj randica, Dios mandashcacunata pajtachishpa, chaparashpami causarca (Hab. 2:1). Jehová Diosca Habacucmanca pai huillashcacunaca, pai munashca tiempopimi pajtaringa nircami. Shinallataj ñucamanta mana caruyajcunaca causashpami catinga nircami (Hab. 2:2-4). ¿Habacucman Dios nishca shimicunaca imatataj ñucanchijman yachachin? Diospaj Juicio Punllaca ima horashi shamunga nishpa yuyanapaj randica, chai punlla chayamunataj cashcata crinami ashtahuan valishca can. Ñucanchij crishcacunami chaparashpa causangapaj, shujtajcunamanpish huillangapaj ayudanga (Heb. 10:38, 39).
3. ¿Imamantataj cushicushpa Diosta servishpa catina canchij?
3 Cushicushpa Jehová Diosta servishunchij. Magog llajtamanta Gog nishca Jehová Diospaj llajtata llaquichijpimi, ñucanchij crishcacunaca sinchi cashcata o mana sinchi cashcata ricuchishun (Ezeq. 38:2, 10-12). Shuj llajta caishuj llajtahuan macanacujpica causaica sinchimi tucun. Macanacuita mishaj gentecunapish paicuna charishca cosascunatami chingachincuna, micunatapish ashallatami charincuna, huajchallami saquirincuna. ¿Cashna laya llaquicunata charishpaca imatataj rurashun? Habacucca llaquicunata charinata yachashpapish paica cushillami Jehová Diosta servishpa catirca (Hab. 3:16-19) Shinallataj Mandaj Diospaj cushicuimi ñucanchij llaquicunata aguantashpa catingapaj ayudanga (Neh. 8:10; Heb. 12:2, NM).
4. ¿Shamuj punllacunapica imatataj cushilla rurashpa catishun? ¿Cunan punllacunapipish imatataj cushilla rurashpa catina canchij?
4 Jehová Diosca paita servijcunataca Juicio Punllamanta quishpichishpami yachachishpa catinga (Hab. 2:14). Causarishca gentecunapish Jehová Diosmanta yachachichunmi minishtingacuna. Chaimanta maipi cashpapish, imata ruracushpapish Jehová Diosmanta, paipaj sumaj rurashcacunamantapish huillashpa catishunchij (Sal. 34:1; 71:17).