Dios canta bendiciachun mañai

Diosca paihuan parlachunmi ñucanchijtaca rurashca. Ñucanchijca ima shina sintirishcatami paiman parlai tucunchij. Profeta Davidca: “Quiquinca mañashcata uyanguimi. Tucuicunami quiquinpajmanca shamungacuna” nircami (Salmo 65:2). Pero Dios ñucanchijta uyachun, ñucanchijta bendiciachunca ¿ima shinataj mañana canchij?

SHUNGUMANTA PARLAI, HUMILDE CAI

Salmo 62:8-pica: “Tucui shunguhuan paipaj ñaupajpi mañaichigari” ninmi. Yaya Diosta mañacushpaca ñucanchij ima shina sintirishcatami shungu ucumanta huillai tucunchij. Chashna mañachunmi Yaya Diosca munan.

DIOSTACA PAIPAJ SHUTITA NOMBRASHPA MAÑAI

Diostaca Tucuita ruraj, Cꞌuyaj Dios nincunami. Pero Diosca shuj shutitami charin. Paica: “Ñucaca Jehovami cani. Chaimi ñuca shutica” ninmi (Isaías 42:8, NWT ) Diospaj Shimipica Jehová shutica 7 mil cutincunami ricurin. Achca profetacunaca Diospaj shutita nombrashpami mañarcacuna. Profeta Abrahamca: ‘Jehová Dioslla canhuan parlashpa catichun saquihuai’ nishpami mañarca (Génesis 18:30, NWT ). Ñucanchijpish Jehová Diospaj shutita nombrashpami paita mañana canchij.

CAMBAJ PROPIO SHIMIPI DIOSTA MAÑAI

Ima shimipi Diosta mañajpipish paica ñucanchij ima yuyashcata, ima shina sintirishcataca allimi yachan. Bibliapica: ‘Diospaj ñaupajpica tucuicuna chai shinallatajmi canchij. Maijan llajtapi causaj cashpapish Taita Diosta manchashpa allita rurajtami Taita Diosca alli nin’ ninmi (Hechos 10:34, 35).

Shinapish Yaya Dios bendiciachunca mana mañashpallachu saquirina canchij. Catij yachaicunapimi imata ashtahuan rurana cashcata ricushun.