JESÚS SHINA CAUSASHUNCHIJ
Cushicushpa alli huillaicunata huillashunchij
¿Cambajca huillanaman llujshinaca huaquinpica sinchichu can? Chashna cajpica mana canllachu chashna sintirishcangui. Achcacunami chashna sintirishcacuna. Huaquinpica gentecuna mana uyasha nishcamanta, mana alli tratashcamanta o mana rijsishcacunahuan parlana sinchi cashcamantachari desanimarinchij. Pero Jehová Diosca “cushi Dios” cashcamantami, cushicuihuan paita servichun munan (Sl 100:2; 1Ti 1:11, Traducción del Nuevo Mundo). Chaimanta cushicushpa huillangapajca quimsa yuyaicunata ricushun.
1) Alli huillaicunaca gentecunaman cushicuitami cun. Gentecunaca llaquillami causan. Chaimantami cushilla causachun alli huillaicunata huillana canchij (Isa 52:7). Shinallataj Diospaj Mandanapi Jesús imata ruragrishcata huillashpaca ñucanchijpish cushillami sintirinchij. Chaimantami huillanaman manaraj llujshishpa Dios cusha nishca bendicioncunapi yuyana canchij.
2) Alli huillaicunaca gentecunatami ayudan. Paicunapaj mana alli causaita saquishpa huiñai causaitami chari tucuncuna (Isa 48:17, 18; Ro 1:16). Huaquincunaca paicunapaj mana alli causaita mana saquisha nishpami alli huillaicunataca mana uyasha nincuna. Shinapish alli huillaicunata uyasha nijcunata mashcashpami catina canchij (Mt 10:11-14).
3) Huillashpaca tucuimanta yallica Jehová Diostami jatunyachinchij. Paimanta huillashcataca Diosca manataj cungarinchu (Isa 43:10; Heb 6:10). Chaimanta cushicuihuan huillangapajca Diostami mañana canchij. Diosca pai mingashcata alli pajtachichunca mana mitsashpami paipaj espíritu santota cun (Gál 5:22). Jehová ayudajpimi mana manchashpa huillai tucunchij (Hch 4:31). Gentecuna uyasha o mana uyasha nijpipish cushicuihuan huillashpa catishunchij (Eze 3:3).
¿Quiquinca llaquilla o cushillachu huillanata munangui? ¿Huillacushpaca ima shinataj cushilla cashcata ricuchi tucungui?
Cada quilla achca horascunata huillashpapish, ¿imamantataj Bibliata yachanataca mana saquina canchij?
¿Ima shinataj María shina cai tucunchij?
¿Quiquinca Diospaj Shimipi yuyangapajca ima horataj tiempota surcungui?
¿Alli huillaicunata huillashcamantaca imatataj ashtahuan munangui?