Familiapi cꞌuyaita ricuchishunchij

Ima shinami papelcunata pegangapaj gomahuan tandachinchij. Chashnallatajmi familia ucupi cꞌuyaita ricuchishpaca tandalla causashun. ¿Familia ucupi tucuicuna ima shinataj cꞌuyaita ricuchina can?

Cꞌuyaita ricuchij cusaca paipaj huarmi ima minishtishcacunatami cun (Ef 5:28, 29). Pai nishcacunatapishmi alli uyan, pai ima shina sintirishcatapish allimi intindin. Shinallataj paipaj familiatami mantinin. Yayitu Diospajman ashtahuan cꞌuchuyachunpishmi ayudan. Paipaj familiahuan cada semana Bibliamanta yachanatapish mana saquinchu (1Ti 5:8). Huarmipish paipaj cusata tucuipi respetashpa, cazushpaca cusata cꞌuyashcatami ricuchin (Ef 5:22, 33; 1Pe 3:1-6). Imapi pandarishpapish cusapish, huarmipish perdonanatami yachana can (Ef 4:32). Yaya mamacunapish paicunapaj huahuacunata alli cuidashpa, Yayitu Diosta cꞌuyachun yachachishpami cꞌuyaita ricuchincuna (Dt 6:6, 7; Ef 6:4). ¿Escuelapica huahuacunaca ima jarcaicunatataj charincuna? ¿Chai jarcaicunahuanca ima shinataj chꞌimbapuracuncuna? ¿Familia ucupi tucuicuna cushilla, tandalla cangapajca imamantataj cꞌuyaita ricuchina can?

FAMILIAPI CꞌUYAITA RICUCHISHUNCHIJ, NISHCA VIDEOTA RICUSHCA QꞌUIPACA CAI TAPUICUNATA CUTICHI:

• 

  ¿Cusaca paipaj huarmitaca ima shinataj cꞌuyaihuan cuidana can?

• 

  ¿Huarmica ima shinataj paipaj cusamanca respetota ricuchina can?

• 

  ¿Yaya mamacunaca paicunapaj huahuacunaman Bibliamanta yachachingapajca imatataj rurana can?