Caishujmanta chaishujmanta cꞌuyanacushunchij

1. ¿Jesusca paipaj discipulocunamanca imatataj mandarca? (Página 1-pi tiyaj dibujota ricui).

HUAÑUNAPAJ shuj tuta faltajpimi Jesusca paipaj discipulocunamanca: ‘Ñucaca cancunataca manaraj mandashcatami mandani. Ima shinami ñuca cancunata cꞌuyarcani, chashnallataj cancunapish caishuj chaishuj cꞌuyanacuichij. Chashna cꞌuyanacujpimi, cancunataca ñuca yachacujcunataj cashcata tucuicuna rijsingacuna’ nircami (Juan 13:34, 35).

2. ¿Imamantataj caishujmanta chaishujmanta cꞌuyanacuna canchij?

² Jesusca ñuca cancunata cꞌuyashca shina cꞌuyajpimi ñucata alli catijcuna cashcata rijsingacuna nircami. Jesús nishcacunaca apostolcuna causacun punllapimi pajtarirca. Shinallataj cunan punllacunapishmi pajtaricun. Chaimantami huaquinpi sinchi cajpipish cꞌuyanacushpa catina canchij.

3. ¿Cai yachaipica imatataj yachashun?

³ Juchayujcuna cashcamantami shujtajcunataca shungumanta cꞌuyanaca sinchi can. Shina cajpipish Jesús shina cangapajmi esforzarina canchij. Cai yachaipimi cꞌuyaita charishpaca shujtajcunahuan alli causangapaj, paicunata yalli cashcata ama yuyangapaj, imallatapish cujcuna, puzachijcuna cangapajca imata ruranata yachashun. Cai yachaita liyicushpaca sinchi cajpipish huaquin huauqui panicuna cꞌuyaita ricuchinata mana saquishcatami ricushun. ¿Paicunamantaca imatataj yachai tucunchij?

SHUJTAJCUNAHUAN ALLI APANACUSHUNCHIJ

4. Mateo 5:23, 24-pi nishca shinaca ¿shuj huauqui ñucanchijhuan pꞌiñarishca cajpica imamantataj paihuan cutin alli tucuna canchij?

⁴ Jesusca shuj huauqui o pani cancunahuan pꞌiñarishca cajpica paicunahuanmi cutin alli tucuna canguichij nircami (Mateo 5:23, 24-ta liyipai). Shinallataj Jehová Diosta cushichingapajca tucuicunahuanmi alli apanacuna canguichij nishpami yachachirca. Yayitu Diosca huauqui panicunahuan alli apanacungapaj esforzarijpica cushillami sintirin. Shujtajcunahuan pꞌiñarishca cajpi, paicunahuan alli apanacungapaj mana tucuita rurajpica Jehová Diosca paita sirvishcataca mana valichingachu (1 Juan 4:20).

5. ¿Huauqui Markpajca imamantataj shujtaj huauquihuan cutin alli apanacunaca sinchi carca?

⁵ Huaquinpica shujtajcunahuan cutin alli apanacunaca sinchimi can. ¿Imamanta? huauqui Markhuanb ima tucushcata ricushun. Paimanta shuj huauqui huashalla rimacujta yachashpaca shungu nanarishcami sintirirca. Markca: “Paihuanca dimastijmi colerarcani” ninmi. Pero qꞌuipaca mana chashna comportarina cashcata cuentata cushpami cai huauquihuan cutin alli tucusha nirca. Shinapish cai huauquica paitaca mana perdonasha nircachu. Chaimi Markca: “Paica ñucahuanca mana alli tucusha ninca ¿imamantataj ñucaraj paitaca mashcana cani?” nishpa yuyarca. Chaimi superintendente de circuito huauquica Marktaca: “Canta llaquichij huauquihuan alli tucungapajca tucuita rurangui, amataj shaicungui” nishpami animarca. ¿Huauqui Markca imatataj rurarca?

6. a) ¿Huauqui Markca caishuj huauquihuan alli tucungapajca imatataj rurarca? b) ¿Colosenses 3:13, 14-pi yachachishcataca Markca ima shinataj pajtachishpa catirca?

⁶ Huauqui Markca huaquinpica jatun tucushca cashcata, shujtajcunata yalli cashcata yuyashcatami cuentata curca. Chaimi cambiana cashcata intindirca (Colosenses 3:8, 9, 12). Llaquichij huauquihuan cutin alli tucungapajmi paihuan parlanaman rirca. Shinallataj huaquin cartacunapimi perdonta mañashpa, cutin alli amigocuna tucushun nishpa escribirca. Huaquinpicarin uchilla regalitocunatami paiman curca. Pero cai huauquica paihuanca pꞌiñarishcallatajmi catirca. Huauqui Markca Jesús mandashcata pajtachishpami paita cꞌuyashpa, perdonashpa catirca (Colosenses 3:13, 14-ta liyipai). Huaquinpica shujtajcunaca ñucanchijhuan alli apanacungapajca mana esforzarincunachu. Shinapish Jesús shina cꞌuyashpaca paicunata perdonashpa, paicunahuan alli apanacungapajmi Jehová Diosta mañashpa catina canchij (Mateo 18:21, 22; Gálatas 6:9).

7. a) ¿Jesusca imata rurachuntaj mandarca? b) ¿Lara shuti panica imatataj chꞌimbapurarca?

⁷ Jesusca cancunata ima shinami shujtajcuna alli tratachun munanguichij, chashnallatajmi shujtajcunatapish alli tratana canguichij nircami. Shinallataj cancunata cꞌuyajcunallataca mana cꞌuyanachu canguichij. Tucuicunatami cꞌuyana canguichij nircami (Lucas 6:31-33). ¿Huaquinpica shuj huauqui o pani mana saludasha nijpica imatataj rurashun? Lara shuti panihuanmi chashna tucushca. Paica: “Shuj ñañaca ñucata mana saludashpami pasaj carca. Imamanta chaita rurashcataca mana yacharcanichu. Preocuparishca sintirishcamantami tandanacuicunamanpish rinaca sinchi carca” ninmi. Callaripica pani Laraca: “Mana ñuca culpachu. Turi ñañacunapish chai ñañaca chashna comportarijtami yachancuna” nishpami yuyarca.

8. a) ¿Pani Laraca caishuj panihuan alli apanacungapajca imatataj rurarca? b) ¿Pani Larahuan ima tucushcamantaca imatataj yachanchij?

⁸ Pani Laraca Yaya Diosta mañashca qꞌuipami mana saludaj panihuan parlanata decidirca. Imamanta mana saludashcamantami parlanacurcacuna. Parlashca huashami alli apanacui callarircacuna. Pero asha tiempo qꞌuipaca cai panica cutinmi ñaupa shinallataj comportarij callarirca. Chaimantami Laraca llaquilla sintirirca. Paica pai cambiajllapimi ñucaca cushilla sintirisha nishpami yuyarca. Pero tiempohuanca cꞌuyashpa, shungumanta pairaj perdonashpa catinatami Laraca intindirca (Efesios 4:32–5:2). Shinallataj shungumanta cꞌuyajca ‘llaquichijpipish mana yuyaipi charicunllachu. Tucui llaquita apanllami, tucuita crinllami, tucuita shuyanllami, tucuita ahuantanllami’ nishcatami yuyarirca (1 Corintios 13:5, 7). Caicunata yuyarishpami tranquila sintirirca. Asha tiempo qꞌuipami mana saludaj panica Larataca alli tratai callarirca. Huauqui panicunahuan alli causanata mashcashpa, paicunata cꞌuyajpica “sumaj causaitapish, cꞌuyaitapish cuj Diosca” ñucanchijhuanmi canga (2 Corintios 13:11).

TUCUICUNATA POR IGUAL TRATASHUNCHIJ

9. Hechos 10:34, 35-pi nishca shinaca ¿imamantataj tucuicunata igual tratana canchij?

⁹ Jehová Diospajca tucuicunami igual canchij (Hechos 10:34, 35-ta liyipai). Ñucanchijpish tucuicunata igual tratashpaca Diospaj huahuacuna cashcatami ricuchinchij. ‘Quiquin cꞌuyarij shinallataj shujtajcunatapish cꞌuyangui’ nishca mandashcatapish pajtachicushcatami ricuchishun. Shinami huauqui panicunahuanca sumajta causashun (Romanos 12:9, 10; Santiago 2:8, 9).

10, 11. ¿Pani Ruthca shujtaj llajtamanta huauqui panicunahuan alli apanacungapajca imatataj rurarca?

¹⁰ Huaquincunapajca tucuicunata igual tratanaca sinchimi ricurin. Pani Ruthhuan ima tucushcata ricushun. Pai jovenraj cajpimi shujtaj llajtamanta caj huarmica paipaj familiata llaquichirca. ¿Chashna llaquichishcamantaca paica ima shinataj sintirirca? Ruthca: “Chai llajtamanta tucui gentecunaca cai huarmi shinallatajmi canga, chai llajtapi causaj turi ñañacunapish chashnallatajmi canga nishpami yuyarcani” ninmi. ¿Chashna ama yuyangapajca Ruthca imatataj rurarca?

¹¹ Ruthca chai llajtapi causaj Testigocunamanta parlaj Anuario librotami liyirca. Paica: “Chai llajtapi causajcunamanta allicunata yuyangapajmi esforzarircani. Shinallataj chai llajtapi sirvij turi ñañacunapish Jehová Diosta tucui shunguhuan sirvicushcata, muyundij Allpapipish tucui turi ñañacunahuan tandalla sirvicushcatami intindircani” ninmi. Asha tiempo qꞌuipaca paipish tucuicunahuan cꞌuyaj canatami intindirca. Ruthca: “Chai llajtamanta turi ñañacunahuan parlangapaj alli apanacungapajmi esforzarircani. Chashnami paicunataca alli rijsi callarircani” ninmi. ¿Ruthca ima cambiocunatataj charirca? Paica: “Tiempohuanca chai llajtacunapi causajcunamanta mana allicunata yuyanatami saquircani” ninmi.

12. ¿Sarah shuti panica ima shinataj yuyaj carca?

¹² Maijancunaca jatun tucushca cashcataca mana cuentata cuncunachu. Por ejemplo, Sarah shuti panica gentecuna maijan llajtamanta cajpipish, mashna cullquita charijpipish, ima privilegiocunata charijpipish tucuicunatami igual tratani nishpami yuyaj carca. Pero paica: “Ñucallataj tucuicunata mana igual tratacushcatami cuentata curcani” ninmi. Sarahpaj familiacunaca tucuicunami universidadman rishcacuna carca. Chaimantami paica universidadpi estudiashcacunallahuan apanacuj carca. Shuj cutinca paica shuj huauquimanca: “Ñucaca universidadta tucuchishcacunallahuanmi apanacuni. Mana estudiashcacunahuanca mana apanacunichu” nircami. ¿Pero paica ama chashna yuyangapajca imatataj rurarca?

13. ¿Sarahmantaca imatataj yachanchij?

¹³ Shuj superintendente huauquica pani Sarahtami ayudarca. Sarahca: “Cai turica Diosta sirvishcamanta, tandanacuicunapi alli comentashcamanta, Bibliamanta achcata yachashcamantapishmi felicitarca. Shinallataj paica ‘Bibliamanta ashtahuan yachacushpaca humildes, cꞌuyajcuna cangapajmi esforzarina canchij. Ñucanchijlla imatapish mana tucuita rurai tucushcatami yuyarina canchij’ nircami” ninmi. Sarahca superintendente consejashcata pajtachishpami shujtajcunata cꞌuyana, alli tratana ashtahuan valishca cashcata intindirca. Chaimantami Sarahca huauqui panicuna imamanta Jehová Diospaj valishca cashcata ricui callarirca. Ñucanchijpish achcata estudiashca cashpaca mana jatun tucunachu canchij. Ashtahuanpish tucuicunata cꞌuyashpami paicunataca alli tratana canchij (1 Pedro 2:17).

PUZACHIJCUNA CASHUNCHIJ

14. Hebreos 13:16-pi nishca shinaca ¿shujtajcunata ayudajpi, puzachijpica Jehová Diosca ima shinataj sintirin?

¹⁴ Jehová Diosca puzachijcunata, ayudajcunataca achcatami cꞌuyan (Hebreos 13:16-ta liyipai). Imapi ayudachun minishtijcunata ayudashpaca Diosta alli adorajcuna cashcatami ricuchinchij (Santiago 1:27; 2:14-17). Bibliapica puzachijcuna caichij ninmi (Romanos 12:13). Shujtajcunata puzachishpa, imallata cushpaca paicunata cꞌuyashcata, paicunapaj amigocuna tucusha nishcatami ricuchinchij. Shujtajcunata micunaman invitajpi, paicunahuan pasangapaj tiempota surcujpi, paicunamanta preocuparijpica Jehová Diosca cushillami sintirin (1 Pedro 4:8-10). Pero huaquinpica puzachijcuna, ayudajcuna canaca sinchimi can.

15, 16. a) ¿Maijancunaca imamantataj mana puzachincuna? b) ¿Editca puzachij cangapajca imatataj rurarca?

¹⁵ Maijancunaca caita chaita yuyashcamantami puzachinata manchancuna. Viuda pani Editpish chashnami yuyarca. Paica manaraj Testigo cashpaca shujtajcunahuanca mana tanto parlajchu carca. Pani Editca shujtajcunami ashtahuan charin, ñucaca mana puzadata cui tucunichu nishpami yuyaj carca.

¹⁶ Editca Testigo tucushca qꞌuipami puzachij cangapaj esforzarirca. Paica: “Tandanacuna Huasitami shayachicurcacuna. Chaimi shuj ancianoca ¿ishqui semanacunata shuj cusa huarmita puzachi tucunguichu? nishpa tapurca. Ñucaca Sarepta llajtamanta viuda huarmita Jehová ima shina bendiciashcatami yuyarircani” ninmi (1 Reyes 17:12-16). Editca cai cusa huarmita puzachinatami decidirca. ¿Puzachishcamantaca ima bendicioncunatataj chasquirca? Paica: ‘Cai cusa huarmica ishqui quillacunatami saquirirca. Chaimantami paicunahuanca alli amigocuna tucurcani’ ninmi. Cunanca precursora, huauqui panicunahuanpish alli apanacujmi can. Huillanaman llujshishpaca paipaj huasipi imallatapish carangapajmi invitan. Paica: “Shujtajcunata puzachishpa, ayudashpaca cushillami sintirini. Achca bendicioncunatapishmi chasquishcani” ninmi (Hebreos 13:1, 2).

17. ¿Huauqui Lukeca imatataj cuentata curca?

¹⁷ Puzadata cunata yachashpapish ¿ashtahuan puzachijcuna cangapajca imatataj rurana canchij? Lukemanta, paipaj huarmimantapish yachashun. Paicunaca yaya mamata, familiacunata, amigocunata, superintendente huauquita, paipaj huarmitami huasiman invitajcuna carca. Shinapish Lukeca: “Ñucanchijhuan alli apanacujcunallata invitacushcatami cuentata curcani” ninmi. ¿Paicunaca shujtajcunatapish invitangapajca imatataj rurarcacuna?

18. ¿Lukepish paipaj huarmipish ashtahuan puzachijcuna cangapajca imatataj rurarcacuna?

¹⁸ Lukepish paipaj huarmipish Jesús nishcacunata yuyarishpami alli puzachijcuna canata yacharcacuna. Jesusca: “Cancunata cꞌuyajcunallata cꞌuyashpaca, cancuna japina cashcataca imata mana japinguichijchu” nircami (Mateo 5:45-47). Paicunaca Jehová Dios shinallataj tucuicunahuan mana mitsa canatami intindircacuna. Chaimantami shujtaj huauqui panicunata invitangapaj esforzarircacuna. Lukeca: “Shujtaj huauqui panicunata invitashpaca paicunahuanca cushillami sintirinchij. Paicunahuan alli apanacushpaca Jehová Dioshuanpish allimi apanacunchij” ninmi.

19. a) ¿Jesusta alli catijcuna cashcataca ima shinataj ricuchinchij? b) ¿Huauqui panicunata tucui shunguhuan cꞌuyangapajca imatataj rurana canchij?

¹⁹ Cai yachaipi ricushca shinaca shujtajcunata cꞌuyashpaca paicunahuan tranquilo causanatami mashcashun. Shinallataj tucuicunatami igual tratashun. Shujtajcunatapish puzachijcuna, ayudajcunami cashun. Huauqui panicunata tucui shunguhuan cꞌuyangapaj ima jarcachunca mana saquinachu canchij. Chashnami cushilla causashun. Jesusta alli catijcuna cashcatapishmi ricuchishun (Juan 13:17, 35).