¿Shamuj punllacunapi cushilla causangapajca imataj ayudanga?

Ña ricushca shinaca achcacunaca alli causanata munashpami destinopi, alli titulota charinapi, cullquipi confiashcacuna. O alli persona canatami mashcashcacuna. Pero caita rurashpaca mana rijsishca llajtaman ringapaj mana alli rurashca croquista caticuj layami can. Chashna cashpapish shamuj punllacunapi cushilla causangapaj imata rurana cashcata yachangapajca shuj alli ayudatami charinchij.

ÑUCANCHIJTA YALLI ALLI YACHAJPAJ CONSEJOCUNA

Ima decisionta agllangapajca alli yuyayujcunatami tapunata yachanchij. Shinallataj shamuj punllacunapi cushilla causangapaj imata ruranata yachangapajca ñucanchijta yalli experienciata charijpi, alli yachajpimi confiana canchij. Cai alli yachajpaj yuyaicunataca casi 3.500 huatacuna huashamanmi escribi callarircacuna. Chai yuyaicunataca Bibliapimi tarinchij.

¿Bibliapica imamantataj confiana canchij? Tucuicunata yalli alli yachajpaj yuyaicunata charishcamantami Bibliapi confianchij. Paica “uni huatacunayuj Yuyajmi” can. Paica ‘huiñaimanta huiñaicama ña tiyaj Diosmi can’ (Daniel 7:9; Salmo 90:2). Paica “jahua pachata ruraj, cai pachata ruraj Mandaj Diosmi” can (Isaías 45:18). Paillatajmi Jehová shuti cashcata huillan (Salmo 83:18, NWT ).

Bibliaca tucuita ruraj Diospaj cashcamantami shuj llajtamanta cajcuna, shujtaj llajtacunamanta cajcunata yalli cashcataca mana yachachin. Bibliapi tiyaj consejocunaca muyundij Allpapi causajcunatami ayudashca. Bibliataca achca shimicunamanmi traducishcacuna.a Chaimantami casi tucuicuna shuj Bibliata charincuna. Tucuicunami chaipi tiyaj yachachishcacunata jahualla intindincuna. Chaipi tiyaj consejocunatapishmi cati tucuncuna. Shinallataj Bibliapica cashnami nin:

‘Pi cashpapish Taita Diospaj ñaupajpica tucuicuna chai shinallatajmi can. Maijan llajtapi causaj cashpapish Taita Diosta manchashpa allita rurajtami Taita Diosca alli nin’ (HECHOS 10:34, 35).

Ima shinami shuj cꞌuyaj yayaca paipaj huahuacunata ayudan. Chai shinallatajmi Jehová Diospish cꞌuyaj Yaya cashcamantaca Bibliapaj consejocunahuan ñucanchijta ayudan (2 Timoteo 3:16). Pai ñucanchijta ruraj cashcamantami ñucanchijpaj ima alli cashcataca alli yachan. Chaimantami paipaj Shimipi tiyaj consejocunapi confiai tucunchij.

BIBLIAPIMI CONFIAI TUCUNCHIJ

Bibliaca 2.000 huatacuna huashamanmi cunan punllacunapi cai mundopi imalla tucuna cashcata, gentecuna ima laya cana cashcata ña huillarca. Chaimantami Bibliaca mana pandarij cashcata crinchij.

BIBLIACA IMALLA TUCUNA CASHCATAMI HUILLARCA

“Shuj mama llajtaca, caishuj mama llajtahuan macanacungacunami, shinallataj jatun mandajcunapurapish macanacungacunami. Chꞌican chꞌican llajtacunapi pamba chujchushpa allpa tꞌimburinacunami tiyanga. Achca yaricai, millai ungüicunapishmi tiyanga” (LUCAS 21:10, 11).

BIBLIACA GENTECUNA IMA LAYA CANATAMI HUILLARCA

“Cai punllacuna tucurinapajca llaqui punllacunami shamunga. Chai punllacunapica quiquinlla alli canata munajcuna, quiquinpajlla charinata munajcuna, jatun tucushcacuna, valishca tucujcuna, Taita Diosta cꞌamijcuna, yaya mamata mana cazujcuna, mana pagui nijcuna, Taita Diosta mana rijsijcuna, rumi shungucuna, pꞌiñarishpapish manataj cungarijcuna, yangamanta juchachijcuna, mana jarcari tucujcuna, pꞌiña millaicuna, allita pꞌiñajcuna, quiquinpurallatataj llaquipi churajcuna, jahualla pꞌiñarijcuna, imapish mana caipajta yuyajcuna, Taita Diosta mashcanapaj randica aicha munaipi cushicunallatami cꞌuyangacuna” (2 TIMOTEO 3:1-4).

¿Biblia ñaupa tiempopi quillcashca cashpapish chaipi nishcacuna tucui pajtaricujta ricushpaca imatataj yuyangui? Canpish Hong Kong llajtamanta Leung shuti runa layachari yuyangui. Paica: “Bibliapi tiyaj profeciacunataca achca huatacuna huashamanmi escribishcacuna. Chaicuna tucui pajtaricujta ricushpaca shuj runalla chaicunata quillcashcataca mana yuyanichu. Bibliaca ñucanchijta yalli alli yachajmantami shamunga” ninmi.

Bibliapica achca profeciacuna pajtarishcatami ricui tucunchij.b Chaimantami Bibliaca Diospaj Shimi cashcata intindinchij. Jehová Diosca: ‘Ñucallami Dios cani. Ima shujtajca ñuca shinaca mana tiyanchu. Ñucami qꞌuipa punlla imalla tucunataca, callarimantapacha tucuita huillani’ ninmi (Isaías 46:9, 10). Chaimantami shamuj punllacunamanta Biblia ima nishcapi cri tucunchij.

BIBLIAMI CUNAN PUNLLACUNAPIPISH SHAMUJ PUNLLACUNAPIPISH AYUDANGA

Bibliapi tiyaj consejocunata catishpami alajata causangui. Cai consejocunapi yuyai.

CULLQUIMANTA, TRABAJOMANTA

“Ishqui maqui jundata trabajashcapish, yuyaita shaicuchinallami. Chaipaj randica, shuj maqui jundallata trabajashpa, ashata samarinaca ashtahuan allimari” (ECLESIASTÉS 4:6).

FAMILIAMANTA

“Quiquin cꞌuyarij shinallataj, paicunapaj quiquin huarmitapish cꞌuyachun. Huarmipish, paipaj cusata respetachun” (EFESIOS 5:33).

SHUJTAJCUNAHUAN ALLI CAUSANAMANTA

“Pꞌiñarinata saqui. Pꞌiñarinata cungari. Ima mana allita ruranataca ama chai yuyailla caichu” (SALMO 37:8).

Bibliapi nishcacunata cazushpaca allimi causangui. Shamuj punllacunapicarin cushillami causangui. Bibliaca Yaya Dios ima laya causaita cusha nishcatami huillan.

ALLI, TRANQUILO CAUSAITAMI CHARISHUN

“Yallitaj sumaj causaipimi cushicungacuna” (SALMO 37:11).

ALLI HUASITA, ALLI MICUITAMI CHARISHUN

“Huasicunatami shayachingacuna. Chaipimi causangacuna. Uvacunatami tarpungacuna. Chaipi pꞌucushcacunatami micungacuna” (ISAIAS 65:21).

UNGÜI, HUAÑUICA MANA TIYANGACHU

“Huañuipish, huacaipish, llaquipish, nanaipish ña mana ashtahuan tiyangachu” (APOCALIPSIS 21:4).

¿Chashna sumajta causangapajca imatataj rurana canchij? Catij yachaipimi caimantaca yachashun.

a Bibliata ima shina traducishcata, Biblia ima shina chꞌican chꞌican ladocunaman chayashcata yachasha nishpaca www.jw.org paginapi BIBLIAMANTA YACHAICUNA > BIBLIAMANTA, HISTORIAMANTA nishca parteman yaicui.

b Ashtahuan yachasha nishpaca La Biblia... ¿la Palabra de Dios, o palabra del hombre? nishca libropaj capítulo 9-ta ricui. Chai librotaca testigo de Jehovacunami rurarca. Chaitaca www.jw.org paginapimi españolpi ricui tucungui. Chai paginapica BIBLIOTECA > OTRAS PUBLICACIONES nishcaman yaicui.