Jehová Diosta sirvishpami cushilla causashcani

Shuj huata qꞌuipaca Sudáfrica llajtapi saquirij Betelpimi mushuj imprimina maquinacuna tiyanga. Chaipica voluntario shina sirvinami minishtirin nishpami huillarcacuna. Ñucaca chaipi voluntario shina sirvinatami decidircani. Ñucata chaiman richun agllashcamantami cushilla sintirircani. Canadamanta shujtaj quimsa Betelitacunata chaiman richunmi agllashcacuna carca. Paicunaca Dennis Leech, Bill McLellan y Ken Nordinmi carcacuna. Sudafricaman cachaj huauquicunaca ñucanchij ima horas tigranataca mana huillarcacunachu.

Ñuca mamitata cayashpaca “Sudafricamanmi rigrini” nishpami huillarcani. Ñuca mamitaca sinchi feta charishcamanta, Jehová Dioshuan alli apanacushcamantami ñuca decidishcataca apoyarca. Ñuca yaya mamaca caru ladoman rijpimi llaquilla sintirircacuna. Pero ishquindijmi ñucata apoyarcacuna.

SUDÁFRICA LLAJTAMANMI RIRCANI

Puntaca Brooklyn llajtapi saquirij Betelmanmi rircanchij. Chaipica quimsa quillacunatami imprimina maquinacunahuan trabajangapaj capacitacionta chasquircanchij. Qꞌuipaca Sudáfrica llajtapi Ciudad del Cabo nishca llajtamanmi barcopi viajarcanchij. Chaipajca ñucaca 20 huatacunatami charircani. Ciudad del Cabo nishca llajtaman chayashpaca amsayai horasmi shuj trenpica Johannesburgo llajtaman rircanchij. Viajacushpaca trenca tutamanta horasmi Karroo nishca pueblopi shayarirca. Chaipica achca polvo, achca rupaimi carca. Chuscundijmi ventanacunamanta asomarinacushpaca “¿cai lugarca ima shinashi can?” nishpa tapurinacurcanchij. Huaquin huatacuna qꞌuipaca Karroo nishca pueblomanmi tigrarcanchij. Chai pueblito alaja, sumaj cajtami cuentata curcanchij.

Huaquin huatacunatami La Atalaya y Despertad revistacunata imprimingapaj linotipia nishca maquinata manejashpa trabajaj carcani. Sudáfrica sucursalpica África llajtapi achca shimicunapaj, shujtaj llajtacunapi tiyaj achca shimicunapajpishmi revistacunataca imprimijcuna carca. Achca gentecuna beneficiaricujta ricushpami ñucanchijca caru ladomanta shamushca cashpapish cushilla sintirircanchij.

Qꞌuipaca ñucataca publicacioncunata imprimina, cachana, traducina trabajocunapi apoyachunmi churarcacuna. Achca ocupado cashpapish cushillami sintirircani.

ÑUCA HUARMIHUAN CAZARASHPACA PRECURSORES ESPECIALMI TUCURCANCHIJ

1968 huatapimi Laura Bowen cazararcani. Paica Betel cꞌuchullapimi causarca. Shinallataj paica precursorami carca. Traduccionpipish escribishpami ayudaj carca. Chai punllacunapica recienlla cazarashcacunaca Betelpica mana saquiri tucurcacunachu. Chaimi ñucanchijtaca precursores especiales cachun nombrarcacuna. Chaimi ñucaca asha preocupado carcani. Betelpica 10 huatacunatami sirvircani. Chaipica micunata, maipi saquirinatami charircani. Pero precursores especiales cashcamantami cada unoman 35 dolarcunata cujcuna carca. Cai cullquita chasquingapajca sucursalmanta mashna publicacioncunata saquichun nijpi, mashna horascunata, revisitacunata rurachun nijpica chaitami pajtachij carcanchij. Cai cullquica arriendopaj, micunapaj, buspaj, doctorcunapajman ringapajmi carca.

Ñucanchijtaca shuj grupopi sirvichunmi cacharcacuna. Cai lugarca Durban cꞌuchullapimi saquirirca. Chai llajtapica Indiamanta yallitaj gentecunami causarca. 1875 huatapimi cai gentecunapaj ñaupa familiacunataca azucarta rurana fabricapi trabajachun obligashcacuna carca. Pero ñucanchij chai llajtaman chayajpica ña mana chashna trabajacushcacunachu carca. Pero paicunaca paicunapaj culturata, paicunapaj micunataca mana saquishcacunachu carca. Paicuna inglés shimita parlajpimi ñucanchijpajca paicunaman huillanaca fácil carca.

Chai punllacunapica precursores especialescunaca quillapica 150 horascunatami predicana carcanchij. Chaimi ñuca huarmisitahuanca punta punllapi 6 horascunata predicangapaj decidircanchij. Revisitacunata, Bibliamanta yachacujcunata mana charishcamantami huasin huasin predicai callarircanchij. Chaipica achca rupaimi tiyarca. Ñami achca tiempota huillashcata yuyashpami relojta ricurcani. Pero recién 40 minutosllami pasashca carca. Chaimi ñucaca “¿cai 150 horastaca pajtachi tucushunchu?” nishpa tapurircani.

Qꞌuipaca predicangapajca allimi organizarcanchij. Cada punllami micungapajca tanditata, sopitata, cafecitota apaj carcanchij. Ña shaicurishpaca ñucanchij carritohuanmi shuj yura ucupi samarij carcanchij. Chaimi Indiamanta huahuitocunaca elevaringapaj cꞌuchuyajcuna carca. Qꞌuipaca ishqui o quimsa horasta huillashca huasha tiempo rato pasashcatami cuentata curcanchij.

India llajtamanta gentecunaca respetajcuna, cꞌuyajcuna, imatapish cujcuna, Diosta cꞌuyajcunami carca. Paicunaman predicajpica achcacunami alli uyashpa chasquircacuna. Paicunaca Jehová Diosmanta, Jesusmanta, Bibliamanta, shamuj punllapi sumaj causai tiyanamanta, huañushcacuna causarinamantami yachanata munajcuna carca. Shuj huata huashallami ña 20 yachacujcunata charircanchij. Paicunamanta maijan shuj familiahuanca micunitatami yanuj carcanchij. Cashna gentecunaman predicashcamantami cushilla sintirircanchij.

Qꞌuipaca ñucataca superintendente de circuito cachunmi agllarcacuna. Costapi saquirij congregacioncunatami visitana carcanchij. Chaica océano Índico cꞌuchullapimi saquirirca. Cada semana shuj congregacionta visitashpaca shuj familiapaj huasipimi saquirij carcanchij. Chaimi huauqui panicunahuanca predicanaman llujshij carcanchij, animanacuj carcanchij. Paicunaca ñucanchijtaca paicunapaj familiata shinami tratajcuna carca. Ñucanchijca paicunahuan huillanaman llujshishpa, huahuacunahuan pasashpa, animalitocunahuan pasashpaca cushillami sintirij carcanchij. Chashnami ishqui huatacunata Diosta cushilla sirvircanchij. Shuj punllaca ñucanchijtaca cutin Betelman tigrachunmi cayarcacuna. Chaimi ñucaca: “Caipi predicashpaca cushillami sintirinchij. Pero maipi sirvinaman nijpica chaiman rishunllami” nircani.

BETELMANMI TIGRARCANCHIJ

Betelpica Departamento de Serviciopi trabajachunmi churarcacuna. Chaipica achca experienciata charij huauquicunami tiyarca. Chai tiempopica superintendente de circuito huauquicunaca congregacioncunata visitashca qꞌuipaca xhosa, zulú y shujtaj shimicunapimi sucursalmanca cartacunata cachajcuna carca. Chai cartacunata intindingapajmi Departamento de Serviciopi trabajaj secretariocunaca inglés shimiman traducijcuna carca. Chai qꞌuipaca congregacioncunata animangapaj, instruccioncunata cungapajmi sucursalmanta huauquicunaca shujtaj cartacunata quillcajcuna carca. Pero manaraj cachashpaca secretario huauquicunallatajmi chai cartacunataca inglés shimimanta congregacioncunapaj shimiman traducijcuna carca. Secretariocuna cai cartacunata traducijpimi Africamanta huauqui panicuna ima shina cashcata o imata minishtishcata yachaj chayarcanchij.

Chai tiempopica Sudafricapi mandaj gobiernoca chꞌican chꞌican razacunahuan ama tandalla causachunmi shuj leyta churarca. Chaimantami yanita huauqui panicunaca paicuna parlaj shimipi tandanacuj, huillaj carca.

Inglés shimipi parlaj congregacioncunapi sirvicushcamantami yana gentecunataca mana rijsircani. Pero Departamento de Serviciopi trabajacushcamantami cai gentecunapaj culturata, costumbreta rijsircani. Chai lugarcunapica huauqui panicunaca panda costumbrecunata, demoniocunahuan, brujianahuan chagrushca costumbrecunataca mana catijcunachu carca. Chaimantami familiacunapish comunapi causajcunapish Diosta ama sirvichun jarcarcacuna. Shinallataj huaquin comunacunapica achca gentecunami pobrecuna carca. Pero mana tanto educacionta charishpapish Bibliataca respetajcunami carca.

Huauqui panicuna libremente Diosta sirvichunmi autoridadcunapaj ñaupajpi difindishpapish ayudarcani. Diosta sirvij jovencitocuna escuelapi tiyaj religioncunapaj cantocunapi, rezanacunapi mana chagrurijpimi jovencitocunataca escuelamanta llujchijcuna carca. Cai jovencitocuna Yayitu Diosta tucui shunguhuan sirvijta ricushpaca achcatami animarircani.

Suazilandiapica huauqui panicunaca shujtaj pruebacunahuanmi chꞌimbapurarcacuna. Rey Sobhuza II huañujpica chai llajtapi causaj gentecunataca huañushcata adorangapajmi chꞌican chꞌican costumbrecunata catichun obligajcuna carca. Cꞌaricunataca uma ajchatami tucui ruturichun mandajcuna carca. Cutin huarmicunataca ajchataca uchillata utuchunmi mandajcuna carca. Pero huauqui panicunaca cai costumbrecunataca mana catircacunachu. Chaimantami paicunataca catirashpa llaquichircacuna. Paicuna Jehová Diosta tucui shunguhuan sirvijta ricushpaca ñucanchijca achcatami animarircanchij.

CUTINMI PUBLICACIONCUNATA IMPRIMISHPA AYUDARCANI

1981 huatapimi computadoracunahuan imprimishpa callaringapaj ayudachun mingarcacuna. Chai tiempopica imprimingapajmi mushuj maquinacuna tiyai callarirca. Chaimi cꞌatuj runaca mushuj maquinacunahuan imprimishpa trabajachun ñucanchijmanca mañachirca. Chai qꞌuipaca 9 linotipias maquinacunataca 5 mushuj maquinacunahuanmi cambiarcanchij. Shuj jatun impresoratapishmi randircanchij. Chashnami ñaupa punllacunata yalli publicacioncunataca rato imprimircanchij.

Computadoracunahuan imprimingapajmi MEPS nishca mushuj programata llujchircanchij. Ñuca quimsa compañerocunahuan Canadamanta Africaman rij horasca mana tanto cashna tecnología tiyarcachu. Pero qꞌuipaca ashtahuanmi tecnologiaca avanzashpa catirca (Isaías 60:17). Chaipajca ñami tucuicuna Jehová Diosta achcata cꞌuyaj precursoracunahuan cazarashcacuna carcanchij. Billpish ñucapish Betelpimi carcanchij. Ken y Dennisca paicunapaj familiacunahuanmi causacurcacuna.

Sucursalpica ashtahuan ashtahuan shimicunamanmi publicacioncunataca traduci callarircanchij. Shinallataj achca publicacioncunata imprimishpami caishuj sucursalcunaman cachaj carcanchij. Cashna trabajo ashtahuan mirarishcamantami shuj mushuj Betelta shayachina minishtirirca. Chaimi huauqui panicunaca Johannesburgopi shuj mushuj Betelta shayachircacuna. Chai Beteltaca 1987-pimi Jehová Diosman mingarcanchij. Yayitu Diospaj obra ñaupajman catichun ayudashcamanta, achca huatacunata Comité de Sucursalpi sirvishcamantami achcata cushicuni.

ESTADOS UNIDOSPI SIRVINAMANMI RIRCANCHIJ

2001 huatapica ñucataca Comité de Sucursal de Estados Unidospi sirvichunmi invitarcacuna. Sudáfrica llajtapi ñucanchij trabajota, huauqui panicunata saquina cashcamantami llaquilla sintirircanchij. Pero Estados Unidospi tiyaj Betelpi shujtaj huauqui panicunahuan sirvinata yachashpami cutin cushilla sintirircanchij.

Estados Unidospi causagrishcamantami Laurapaj mayorlla mamata cuidanaca sinchi carca. Pero Laurapaj quimsa panicunami paipaj mamataca tucuipi cuidashpa ayudarcacuna. Paicunaca: “Ñucanchijca tiempo completopi mana sirvi tucunchijchu. Pero cancuna Estados Unidospi Jehová Diosta sirvichunmi mamitataca cuidashun” nircacunami. Chashna ayudashcamantami paicunataca achcata agradicinchij.

Ñuca mamitaca viudami carca. Paica ñuca huauquihuan, ñuca huauquipaj huarmihuanmi ña 20 huatacunata Toronto, Canadá llajtapi causarca. Estados Unidosman ñuca chayashca qꞌuipallami ñuca mamitaca huañurca. Pero ñuca huauqui paipaj huarmisita ñuca mamitata huañuna horascama tucuipi cuidashcamantami shungumanta agradicini. Ñucanchij mamitacunata cuidana mana jahualla cajpipish ñucanchij familiacuna paicunata cuidangapaj tucui pudishcata rurashcamantami achcata agradicinchij.

Achca huatacunatami Estados Unidospica publicacioncunata rurangapaj ayudarcani. Cunanca chai trabajotaca mushuj tecnologiacunahuanmi rurancuna. Cai recienllaca Departamento de Compras nishcapimi trabajacushcani. Cai 20 huatacunata cai jatun sucursalpi sirvinaca alajami cashca. Cai sucursalpica 5 mil betelitacuna, 2 mil voluntarios externocunami trabajancuna.

60 huatacuna huashamanca cashna trabajanataca mana yuyashcanichu. Laura tucuipi ñucata apoyashcamantami achca huatacunata Jehová Diosta sirvishcanchij. Chꞌican chꞌican lugarcunapi huauqui panicunahuan Yaya Diosta sirvishcamantami cushilla sintirinchij. Shinallataj huaquin sucursalcunata visitashpami achca huauqui panicunatapish rijsishcanchij. Cunanca ña 80 huatacunata charishcamantami ña ashalla trabajocunata charini. Pero jovenlla huauquicunami achca trabajocunata rurai tucuncuna.

Salmota quillcaj runaca: “Mandaj Diosmi ñucanchij Diosca nij llajtaca cushichishcami” nircami (Salmo 33:12). Cai versoca ñucapajca ciertomi cashca. Jehová Diospaj pueblopi paita sirvishcamantami cushilla sintirini.