YACHAI 32
Joven, bautizarishca qꞌuipa Jehová Diosta ashtahuan sirvingapaj esforzari
“Tucuipi Cristo shina cangapaj huiñashpa catishunchij” (EFESIOS 4:15).
CANTO 56 Dios yachachishcacunata cazushunchij
CAITAMI YACHASHUNa
1. ¿Achca jovencunaca imatataj rurashcacuna?
CADA huatami achca jovencuna bautizarincuna. ¿Canpish ñachu bautizarishcangui? Cashna cajpica de seguromi huauqui panicunapish, Jehová Diospish achcata cushicushcanga (Proverbios 27:11). Canca manaraj bautizarishpaca achca tiempotachari Bibliata alli estudiangapaj esforzarircangui. Caita rurashcamantami Biblia, Diospaj Shimi cashcata crircangui. Jehová Diosta alli rijsishcamanta, paita cꞌuyashcamantami paita sirvingapaj bautizarina decisionta agllarcangui. Caita rurashcamantami achcata cushicunchij.
2. ¿Cai yachaipica imatataj ricushun?
2 Manaraj bautizarishpaca achca pruebacunatachari charircangui. Chaimantachari Jehová Diosta tucui shunguhuan sirvinaca mana jahualla cashca. Qꞌuipacunacarin shujtaj llaquicunapishmi ricuringa. Satanasca Jehová Diosta sirvinata saquichun, paita cꞌuyanata saquichunmi munan (Efesios 4:14). Pero canca Jehová Diostami tucui shunguhuan sirvishpa catina cangui. Chaipajca cambaj crishcacunatami sinchiyachishpa catina cangui (Hebreos 6:1). Cai yachaipica sinchi cangapaj imata rurana cashcatami yachashun.
¿ESPIRITUALMENTE SINCHI CANGAPAJCA IMATATAJ RURANA CANGUI?
3. ¿Bautizarishca qꞌuipaca imatataj rurana canchij?
3 Bautizarishca qꞌuipaca Éfeso llajtapi causaj huauqui panicunaman apóstol Pablo cushca consejotami pajtachina canchij. Paica espiritualmente sinchi cachunmi animarca (Efesios 4:13). Apóstol Pabloca espiritualmente sinchi canataca shuj huahuahuanmi compararca. Shuj huahua huacharijpica yaya mamacunaca cushillami sintirincuna. Shinapish chai huahuaca mana chaillapi saquiringachu. Ashtahuanpish huiñashpami catinga (1 Corintios 13:11). Shinallatajmi Diosta sirvijcunapish bautizarishca qꞌuipaca chai huahua huiñaj shina espiritualmente huiñashpa, sinchiyarishpa catina canchij. Ñaupajman catingapaj imata rurana cashcata yachashun.
4. ¿Espiritualmente sinchi cangapajca imatataj rurana cangui?
4 Jehová Diosta cꞌuyashpa cati. Apóstol Pablopaj consejomi Jehová Diosta ashtahuan cꞌuyashpa catichun ayudanga (Filipenses 1:9-ta liyipai). Apóstol Pabloca Filipos llajtapi causaj huauqui panicunapaj cꞌuyai ashtahuan huiñashpa catichunmi Jehová Diostaca mañarca. Caica ñucanchijpish Diosta ashtahuan cꞌuyai tucushcatami yachachin. Chaipajca alli yachaita, alli yuyaitami minishtinchij. Shinami Jehová Dios ima shina cashcata yachashpaca paita ashtahuan cꞌuyashun, paita llaquichinatapish mana munashunchu. Ashtahuanpish pai munashca shina causangapaj, tucuipi cazungapajpishmi siempre esforzarishun.
5, 6. ¿Jehová Diosta cꞌuyashpa catingapajca imatataj ashtahuan rurana canchij?
5 Jehová Diosta ashtahuan cꞌuyangapajca paipaj Churi Jesustapishmi rijsina canchij. Jesusca paipaj Yaya ima shina cashcatami alli ricuchirca (Hebreos 1:3). Jesús ima shina cashcata yachangapajca Mateo, Marcos, Lucas, Juan librocunatami alli estudiana cangui. Chaipajca cada punlla Bibliata liyingapajmi esforzarina cangui. Jesusca tucuicunatami alli trataj carca. Chaimantami gentecunaca paihuan canata, paihuan parlanata munajcuna carca. Uchilla huahuacunatapishmi cꞌuyaihuan trataj carca (Marcos 10:13-16). Paipaj discipulocunapish paihuan cashpaca allimi sintirijcuna carca. Chaimantami paicunaca imata yuyashcataca mana manchashpalla nijcuna carca (Mateo 16:22). Jesusca paipaj Yaya shinallatajmi cꞌuyaj carca. Jehová Diosca paipajman cꞌuchuyachunmi munan. Chaimantami paita mañacushpaca imata yuyashcata, ima shina sintirishcata huillai tucunchij. Paica ñucanchijta cꞌuyashcamantami ñucanchijmanta preocuparin (1 Pedro 5:7).
6 Jesusca tucui laya gentecunatami llaquirca. Mateoca: “Michij illajlla, shitashca, llaquichishca ovejacuna shina cajta ricushpami tucui chaipi caj gentecunamanta Jesusca yallitaj llaquirirca” ninmi (Mateo 9:36). Jehová Diospishmi gentecunataca achcata cꞌuyan. Chaimantami Jesusca: ‘Ñuca Yayaca cai humildecunamanta shujllapish chingarichunca mana munanchu’ nirca (Mateo 18:14). Jesusmanta ashtahuan yachashpaca Jehová Diostami ashtahuan cꞌuyashun.
7. ¿Imamantataj experienciata charij huauqui panicunahuan apanacuna cangui?
7 Jehová Diosta ashtahuan cꞌuyangapaj, espiritualmente sinchi cangapajca experienciata charij huauqui panicunahuanmi alli apanacuna cangui. Paicunaca Jehová Diosta sirvishpami contentos sintirincuna, Diosta sirvishcamantapish manataj arrepintirincunachu. Chaimantami paicunahuan parlangapaj tiempota llujchina cangui. Proverbios 11:14-pica: ‘Achca consejajcuna tiyajpica, ima llaquipish mana japinchu’ ninmi. Ima importante decisionta agllangapajpish chai huauqui panicunahuanmi parlana cangui. Paicunami alli consejocunata cushpa canta ayudanga.
¿Evolucionpi mana crishcata escuelapi yachachingapajca ima shinataj prepararina cangui? (Párrafos 8 y 9-ta ricui).
8. ¿Dudacunata charishpaca imatataj rurana cangui?
8 Dudacunata ama charingapaj Bibliata estudiai. Satanasca Jehová Diospajman ashtahuan cꞌuchuyachun, espiritualmente sinchi cachunca mana munanchu. Chaimantami Bibliapi yachachishcacuna mana verdad cashcata crichun munan. Por ejemplo, maijancunaca evolucionpi crichunmi animangacuna. Huahuaraj cashpaca evolucionpica manachari crircangui. Pero cunanca escuelapi o colegiopimi evolucionmanta parlashpaca ciertotaj cashca shina yachachin. Chashna yachachishcamantachari canpish dudai callarishcangui. Paicunaca Dios tiyashcata yachangapajca mana nunca estudiashcacunachu. Proverbios 18:17-pica: “Alli llujshingapaj punta huillajca, mana llullashca shinami ricurin. Ashtahuanpish paihuan pꞌiñanacuj shamushpaca, llullacushcata ricuchinllami” ninmi. Chaimantami escuelapi o colegiopi yachachishcacunata crinapaj randica Diospaj Shimita alli estudiana cangui, evolucionmanta parlaj publicacioncunatapishmi alli investigana cangui. Shinallataj evolucionpi crinata saquishca huauqui panicunahuanmi parlana cangui. Parlacushpaca Diospi imamanta crishcatami tapuna cangui. Paicunahuan parlashpami Dios tiyashcataca tucui shunguhuan cringui.
9. ¿Pani Melissamantaca imatataj yachai tucungui?
9 Pani Melissataca Dios imallata rurashcacunamanta yachanami ayudarca.b Paica: “Profesorcunaca evolución ciertotaj cashca shinami yachachincuna. Chaimantami callaripica “evolucionca ciertomi canga” nishpa Diosmanta yachashpa catinataca mancharcani. Pero Jehová Diosca pai tiyashcata seguro cachunmi munan. Chaimantami “¿Existe un Creador que se interese por nosotros?” nishca librota, Obra de un Creador y El origen de la vida. Cinco cuestiones dignas de análisis nishca folletocunatapish liyircani. Chai publicacioncunata estudianami achcata ayudarca. Pero dudai callarishca horasmantami Bibliapi investigana carcani” ninmi.
10, 11. ¿Mapa munaicunata mishangapajca imatataj rurana cangui?
10 Mana alli munaicunamanta caruyai. Jovenyajpica cꞌarihuan, huarmihuan siririna munaicunamanta jarcarinaca mana jahuallachu can. Maipica chashna mana allita rurachunmi obligasha ningacuna. Satanasca chai juchapi urmachunmi munan. ¿Chai juchapi ama urmangapajca imatataj rurana cangui? (1 Tesalonicenses 4:3, 4-ta liyipai). Jehová Diostami mañana cangui. Mañacushpaca can ima shina sintirishcatami tucuita parlana cangui. Chai juchapi ama urmangapaj, fuerzata charingapajpishmi mañana cangui. (Mateo 6:13). Jehová Diosca canta perdonangapajca listomi can (Salmo 103:13, 14). Bibliapi tiyaj yuyaicunapishmi cantaca ayudanga. Pani Melissaca mapa yuyaicunata saquingapajmi achcata esforzarirca. Paica: “Bibliata cada punlla liyinami mapa yuyaicunamanta jarcarichun ayudarca. Shinallataj Jehová Diosmantapish ama caruyachun, paita sirvingapajpish esforzarina cashcata intindichunmi ayudarca” ninmi (Salmo 119:9).
11 Mana jahualla cajpipish cambaj taita mamahuanmi parlana cangui. Melissaca: “Ñuca taita mamahuan parlangapajmi Jehová Diosta ayudahuai nishpa mañarcani. Ñuca taitahuan ima tucucushcata parlashpaca tranquilami sintirircani. Chashna rurashcamantami Jehová Diospish contento sintirishcanga” ninmi.
12. ¿Alli decidingapajca imataj ayudanga?
12 Biblia yachachishcacuna canta ayudachun saqui. Tiempohuanca canllatajmi alli decisioncunata agllana cangui. Pero cai ratoca manaraj achca experienciata charinguichu. ¿Jehová Diosmanta ama caruyangapajca imatataj rurana cangui? (Proverbios 22:3). Kari shuti pani alli decisioncunata japingapaj imata rurashcata ricushun. Paica: “Shuj leypi ima nishcata ruranapaj randica Jehová imata yuyashcatami intindircani” ninmi. Bibliata liyicushpaca: “¿Caica Jehová Diosmantaca imatataj yachachin? ¿Allita rurangapajca ima shinataj ñucataca ayudan? ¿Bibliapi yachachishcacunata catishpaca ima shinataj causasha?”nishpami tapurina cangui (Salmo 19:7; Isaías 48:17, 18). Bibliata liyishpa, Biblia yachachishcacunapi cutin cutin yuyashpaca alli decisioncunata agllashpami Jehová Diosta cushichingui. Jehová Dios imata yuyashcata intindishpacarin imata rurangapajpish mana shuj leyta minishtinguichu. Shinami espiritualmente sinchi cashcata ricuchingui.
¿Shuj joven panica ima laya amigocunatataj agllarca? (Párrafo 13-ta ricui).
13. ¿Imamantataj alli amigocunata charina cangui?
13 Jehová Diosta sirvijcunahuan apanacui. Alli amigocunata charinami espiritualmente sinchi cachun ayudanga (Proverbios 13:20-ta liyipai). Pani Sarahuan ima tucushcata ricushun. Paica Jehová Diostaca ña mana cushilla sirvicurcachu. Pero paipaj amigocunami achcata ayudarca. Saraca: “Shuj ñañitahuanmi Huillaj revistata preparangapaj tucui semanacuna tandanacuj carcani. Cutin shujtaj amigaca tandanacuicunapi comentachunmi animaj carca. Paicuna ayudashcamantami Bibliata estudiana, Diosta mañana importante cashcata cuentata curcani. Caita rurashcamantami Jehová Diospajman ashtahuan cꞌuchuyashpa cutinllataj paita cushilla sirvi callarircani” ninmi.
14. ¿Huauqui Julienca alli amigocunata charingapajca imatataj rurarca?
14 ¿Alli amigocunata charingapajca imatataj rurana cangui? Julien shuti ancianoca: “Jovenraj cashpaca predicacionman llujshishpami alli amigocunata tarircani. Paicunaca siempremi cushilla carcacuna, ñucatapish cushilla huillachunmi ayudarcacuna. Paicunahuan purishpami tiempo completopi sirvinata yuyai callarircani. Shinallataj ñuca edadta charij amigocunallahuan tandanacushcamanta shujtaj alli amigocunata charina oportunidadta chingachicushcatami cuentata curcani. Betelman rishpapish alli amigocunatami tarircani. Paicunami alli diversioncunata agllachun ayudarca, chashna rurashcamantami Jehová Diospajman ashtahuan cꞌuchuyarcani” ninmi.
15. ¿Apóstol Pabloca Timoteomanca imatataj mandarca?
15 ¿Pero Jehová Diosta sirvichun cambaj amigo mana ayudajpica imatataj rurana cangui? Apóstol Pabloca congregación ucupi mana tucuicuna Jehová Diosta alli sirvicushcatami yacharca. Chaimantami Timoteotaca paicunamanta caruyachun mandarca (2 Timoteo 2:20-22-ta liyipai). Jehová Diospaj amigo canaca achca valishcami can, chaimantami pipish paimanta caruyachichunca mana saquina canchij (Salmo 26:4).
METACUNATA CHURARI
16. ¿Ima metacunatataj churari tucungui?
16 Metacunata churari. Alli metacunata churarishpaca cambaj fetami sinchiyachingui, Diostapishmi alli sirvingui (Efesios 3:16). Por ejemplo, Bibliata cada punlla liyingapaj, Bibliamanta ashtahuan yachangapajmi esforzari tucungui (Salmo 1:2, 3). Shinallataj shungumanta Jehová Diosta mañangapajmi esforzari tucungui. Ima laya diversioncunata agllacushcata, mashna tiempota chai diversioncunapi pasacushcatapishmi alli ricuna cangui (Efesios 5:15, 16). Can espiritualmente sinchi cangapaj esforzarijpicarin Jehová Diosca cushillami sintirin.
¿Paica ima metacunatataj churarirca? (Párrafo 17-ta ricui).
17. ¿Shujtajcunata ayudashpaca ima shinataj sintiringui?
17 Shujtajcunata ayudashpaca Diosta alli sirvicushcatami ricuchingui. Jesusca: “Cujmi chasquijtapish yalli cushicun” nircami (Hechos 20:35). Cambaj tiempohuan, cambaj fuerzahuan shujtajcunata ayudashpaca cushillami sintiringui. Pero ¿ima shinataj shujtajcunataca ayudai tucungui? Por ejemplo, cambaj congregacionmanta mayorlla o ungushca huauqui panicunatami mandadocunata rurashpa ayudai tucungui. Mana cashpaca celularcunata, tabletcunata alli utilizachunmi ayudai tucungui. Ña bautizado cashpaca huauqui panicunata ashtahuan ayudangapajmi, siervo ministerial cangapaj esforzari tucungui (Filipenses 2:4). Shinallataj Diospaj Gobiernomanta alli huillaicunata huillashpami shujtajcunatapish cꞌuyashcata ricuchi tucungui (Mateo 9:36, 37). Pudishpacarin Jehová Diosta tiempo completota sirvi.
18. ¿Tiempo completopi sirvinaca ima shinataj espiritualmente sinchi cachun ayudan?
18 Tiempo completopi sirvinata agllashpaca cambaj fetami sinchiyachingui. Por ejemplo, precursor tucushpaca Escuela para Evangelizadores del Reinomanmi ri tucungui. Mana cashpaca Betelpi o Tandanacuna Huasicunata shayachinapimi ayudai tucungui. Kaitlyn shuti joven precursora ima nishcata ricushun. Paica: “Bautizarishca qꞌuipalla turi ñañacunahuan llujshishpaca paicunamantami achcata yacharcani. Paicunapaj ejemplota catishpami Bibliamantaca ashtahuan alli estudiai tucurcani. Shinallataj Bibliamanta ashtahuan alli yachachinatapishmi yacharcani” ninmi.
19. ¿Yayitu Diosta ashtahuan sirvinata agllashpaca ima shinataj causangui?
19 Jovenmantapacha Yayitu Diosta sirvinata agllashpaca achca bendicioncunatami charingui (1 Juan 2:17). Chaimantami canca alli, cushilla causangui. Allicunata ruranata agllashcamantami llaquicunapipish mana urmangui (Proverbios 16:3). Shinallataj canca cambaj ejemplohuanmi congregacionpi tiyaj mayorllacunatapish, jovencunatapish achcata ayudangui (1 Timoteo 4:12). Ashtahuanpish Jehová Diosta alli sirvishcata yachashpaca cushillami sintiringui (Proverbios 23:15, 16).
CANTO 88 Mandaj Dios cambaj ñanta rijsichihuai
a Shuj joven bautizarijpica tucuicunami contentos sintirinchij. Pero recienlla bautizarijcunaca espiritualmente sinchi cangapajmi esforzarina cancuna. Cai yachaipica recienlla bautizado jovencunata ima shina espiritualmente sinchi cachun ayudai tucushcatami yachashun.
b Cai yachaipica huaquin shuticunatami cambiashcanchij.