¿Cambaj cusa pornografía viciota charijpica imatataj rurana cangui?

• “Ñuca cusa cutin cutin shujtaj huarmicunahuan traicionacushca shinami carca”.

• “Imapaj mana valishcata, mana alaja cashcatami yuyaj carcani”.

• “Ima shina sintirishcata piman mana parlarcanichu. Ñucallami sufricurcani”.

• “Jehová Dios ñucamanta mana preocuparij cashcatami yuyaj carcani”.

Cusa pornografiata ricujpica huarmica achcatami llaquirin. Ashtahuancarin cusa achca quillacunata, huatacunata pacalla chaita ricucushca cajpica huarmica paipica ña mana confianata munangachu. Shuj huarmica: “¿Ñuca cusaca ima shujtaj cosascunallatataj pacalla ruracunga? nishpami achcata sustarij carcani” nircami.

¿Cambaj cusaca pornografía viciopi urmashcachu?a Shina cajpica cai yachaica cantaca achcatami ayudanga. Cai yachaipi tiyaj versocunata liyishpaca achcatami animaringui. Shinallataj Jehová Dios canta manataj saquishcatami cuentata cungui.b

¿IMATATAJ RURAI TUCUNGUI?

Cambaj cusa tucui imata ruracushcataca manachari controlai tucungui. Shinapish ¿chai llaquita ahuantangapaj, tranquila sintiringapajca imatataj rurana cangui?

Can culpata charishcataca mana yuyanachu cangui. Maijan huarmicunaca chashnami yuyancuna. Por ejemplo, Aliceca:c “Ñuca mana alaja cashcamantachari ñuca cusaca pornografiata ricun” nishpami yuyaj carca. Cutin Danielaca: “Ñuca cusa pornografiata ricuj cashcata yachaj chayashpaca achcatami colerarcani. Qꞌuipacarin ñuca culpamanta ñuca matrimoniopi llaquicuna tiyashcatami yuyai callarircani” nircami.

Canpish chai huarmicuna shina sintirishpaca Jehová Diospaj ñaupajpi cambaj cusa culpata charishcatami yuyarina cangui. Santiago 1:14-pica: “Cada unomi paipaj quiquin munaillataj umajpi, shuj trampata shina churajpi llaquipi urmai tucun” ninmi (Romanos 14:12; Filipenses 2:12). Caipi nishca shinaca Jehová Diosca cambaj culpa cashcataca mana yuyanchu. Ashtahuanpish can paita tucui shunguhuan sirvicushcamantami paica cushilla sintirin (2 Crónicas 16:9).

Shinashpaca can mana alaja cashcamanta cambaj cusa pornografiata ricuj cashcataca mana yuyanachu cangui. Doctorcunaca: “Pornografiapica achca pinganai, mapa cosascunami ricurin. Huaquin cusacunaca paicunapaj huarmicuna chai mapa cosascunata rurachunmi munancuna. Pero huarmicunaca chaitaca mana rurai tucuncunachu” nincunami.

Mana sustarishpallachu causana cangui. Catherineca: “Ñuca cusa imamanta pornografiata ricuj cashcatami yuyashpa pasaj carcani”. Cutin Franciscaca: “Ñuca cusa maipi cashcata mana yachashpaca achcatami preocuparini” nircami. Shinallataj tal vez cambaj cusa pornografía viciota charishcataca huaquin huauqui panicunami yachancuna. Paicuna yachashcamantachari canca achca pingaita charingui. Cutin, shujtaj huarmicunaca paicunata pi mana intindi tucushcata yuyashpami llaquilla sintirincuna.

Chashna sintirinaca normalmi can. Pero chaillapi yuyashpaca ashtahuanmi llaquiringui. Chaipaj randica Jehová Diospajman ashtahuan cꞌuchuyangapajmi esforzarina cangui. Paimi ñaupajman catichun fuerzasta cunga (Salmo 62:2; Efesios 6:10).

Shinallataj Bibliata liyina, chaipi nishcacunapimi yuyana cangui. Bibliapica huaquin huarmicuna jatun llaquicunata ima shina ahuantashcatami parlan. Pero chai huarmicunaca Jehová Diosman ima shina sintirishcata tucuita huillashca qꞌuipaca tranquilasmi sintirircacuna. Jehová Diosca paicunapaj llaquicunataca huaquinpica mana allichircachu. Pero tranquilas sintirichunmi siempre ayudarca. Por ejemplo, Anaca achca sustarishcami carca. Chaimantami Jehová Diosta rogarishpa achcata mañarca. Mañashca qꞌuipaca llaquicunata charishpapish paica tranquilami sintirirca (1 Samuel 1:10, 12, 18; 2 Corintios 1:3, 4).

Shinallataj alli sintiringapajca ancianocunapaj ayudatami mashcana cangui. Paicunaca cambajca ‘huairata miticuna shina, jatun acapanamanta paca tucuna shinami cangacuna’ (Isaías 32:2). Shinallataj canta uyashca qꞌuipaca ancianocunaca tal vez shuj panimanmi canhuan parlachun, canta ayudachun mingangacuna (Proverbios 17:17).

¿CAMBAJ CUSATACA IMA SHINATAJ AYUDAI TUCUNGUI?

“Ñuca cusa chai viciota saquichun ¿ayudai tucushachu?” nishpachari yuyangui. Huaquin huarmicunaca paicunapaj cusacunatami ayudai tucushcacuna. Bibliapi nishca shinaca ishquipura ayudanacunaca allimi can (Eclesiastés 4:9-12). Huaquin investigaj runacunaca, “cusandij huarmindij ayudanacujpica cusapajca pornografía viciota saquinaca ashtahuan jahuallami canga” nincunami.

Shinallataj cambaj cusa pornografía viciota saquisha nishcata o mana saquisha nishcatami ricuna cangui. ¿Paica chai viciota saquingapaj Jehová Diospaj, ancianocunapaj ayudata mashcashcachu? (2 Corintios 4:7; Santiago 5:14, 15). Shinallataj ¿cambaj cusaca pornografiata ama ricushpa catingapaj imata rurashcachu? Por ejemplo, ¿telefonota, computadorata ama yalli utilizangapaj o pailla cashpa chaicunata ama utilizangapaj esforzarinchu? (Proverbios 27:12). Shinallataj ¿cambaj cusaca can paita ayudachunchu munan? Cambaj cusa paita ayudachun munajllapimi paitaca ayudai tucungui.

Pero ¿ima shinataj paitaca ayudai tucungui? Por ejemplo, Feliciapaj cusa Ethanca uchillamantapachami pornografiata ricuj carca. Ethanca pornografiata ricuna munaita charishpaca utcami Feliciaman huillan. Feliciaca paitaca respetohuan, atencionhuanmi uyan. Ethanca: “Ñuca huarmimanca ima shina sintirishcata, imapi yuyacushcataca mana manchashpami tucuita huillani. Paica cꞌuyaihuanmi mapa ruraicunapi ama urmachun ñucataca ayudan. Shinallataj paica ñuca ima shina sintirishcataca siempremi tapun. Internetta alli utilizachunpish alaja consejocunatami cun” nircami. Feliciaca paipaj cusa pornografiata ricuna munaita charishcamantami huaquinpica llaquilla sintirin. Paica: “Llaquilla sintirishpapish ama yallitaj pꞌiñaringapajmi esforzarini. Yallitaj pꞌiñarishpaca ñuca cusataca mana ayudai tucushachu. Ashtahuanpish paihuan parlanacushca qꞌuipaca paipish ñucata ayudangapajmi esforzarin” nircami.

Cusandij huarmindij sumajta parlanacunami cusa chai viciota saquichun ayudanga. Shinallataj cusa imapi fallacushcata, imata ruracushcata, maipi cashcata paipaj huarmiman huillajpica paica asha ashami paipi cutin confianga.

Shinaca ¿canpish cambaj cusata ayudai tucunguichu? Paita ayudangapajca tal vez ishquindijmi cai yachaita estudiai tucunguichij. Caita estudiashca qꞌuipaca ¿cusaca imata rurangapajtaj esforzarina can? Pornografiata ama cutin ricungapaj y paipaj huarmi cutin paipi confiachunmi esforzarina can. Shinallataj cusaca can cai temamanta paihuan parlasha nishcamantaca mana pꞌiñarinachu can. Ashtahuanpish can ima shina sintirishcata intindingapajmi esforzarina can. Pero ¿canpish imatataj rurana cangui? Cambaj cusata apoyangapaj, paipi cutin confiangapajmi esforzarina cangui. Shinallataj ishquindijmi gentecuna imamanta pornografiata ricuj cashcata, chai viciopi ama urmangapaj imata rurana cashcata alli intindina canguichij.d

“Cai temamanta ñuca cusahuan parlashpaca ñucaca achcatami pꞌiñarisha” nishpachari yuyangui. Shina cajpica cambaj cusahuan parlanacucushpa shuj ancianopish chaipi cachunmi mañai tucungui. Pero canhuan, cambaj cusahuan alli apanacuj ancianotami ayudachun mañana cangui. Paimi cancuna alajata parlanacuchun ayudanga. Cambaj cusa pornografiata ña mana ricujpipish paipi cutin confianaca cambajca sinchichari canga. Pero esforzarishpami catina cangui. Cambaj cusa asha asha cambiajta ricushpaca cushillami sintiri. Shuj punlla cutin ishquindij cushilla causanatami yuyaipi charina cangui (Eclesiastés 7:8; 1 Corintios 13:4).

¿CAMBAJ CUSA CUTIN CHAI VICIOPI URMAJPICA IMATATAJ RURANA CANGUI?

Cambaj cusa cutin pornografía viciopi urmajpica “paica shungumantaca mana arrepintirishcachu, mana nunca cambiangachu” nishpaca mana yuyanachu cangui. Shuj viciota saquinaca sinchimi can. Maijancunaca tucui vidami chai viciota saquingapaj esforzarincuna. Tal vez cambaj cusaca achca huatacunata pornografiata mana ricushca qꞌuipami cutin chaipica urmanga. Pero ama cutin urmangapajca paica ashtahuan cuidadotami charina can. Shinallataj paica “chai viciopica ña mana nunca urmashachu” nishpaca mana yuyanachu can (Proverbios 28:14; Mateo 5:29; 1 Corintios 10:12). Cambaj cusaca paipaj yuyaita cambiangapaj, mapa ruraicunata millanayachingapajmi esforzarishpa catina can. Por ejemplo, paica pornografiata ricuna, paipaj charishcacunata japirishpa mapata ruranatami millanayachina can (Efesios 4:23; Salmo 97:10; Romanos 12:9). Cambaj cusa chai cambiocunata rurasha nijpica tal vez chai mapa viciotami saqui tucunga.e

Cambaj cusa chai viciota manataj saquisha nijpica seguramente llaquilla, pꞌiñarishcami cangui. Pero tranquila sintiringapajca tucuitami Diospaj maquipi saquina cangui (1 Pedro 5:7). Shinallataj Bibliata estudiashpa, chaipi nishcacunapi yuyashpami catina cangui. Jehová Diostapish shungumanta mañashpami catina cangui. Chashnami paipajman ashtahuan cꞌuchuyangui. Isaías 57:15-pica Jehová Diosca: “Ñucaca llaquihuan cajcunahuan, mana jatun tucushcacunahuanmi causani. Mana jatun tucushcacunata, shungu pꞌaquirishcacunata jatarichingapajmi paicunahuan causani” ninmi. Shinashpaca Jehová Diosta sirvishpa catingapaj, ancianocunapaj ayudata mashcangapaj esforzarishpa cati. Shinallataj cambaj cusa nunca mana cambianataca mana yuyanachu cangui (Romanos 2:4; 2 Pedro 3:9).