Espejopi ricurij shina Bibliata estudiashunchij

Jesusta catij Santiagoca Bibliataca shuj espejohuanmi chꞌimbapurarca. ¿Imamanta? Bibliata estudiashpaca ñucanchijllataj shuj espejopi ricurij shinami ima shina cashcata ricui tucunchij (Santiago 1:​22-25). Pero ¿espejopi ricurij shina Bibliata alli estudiangapajca imatataj rurana canchij?

Bibliapi liyishcacunataca allimi intindina canchij. Shuj espejopi rato ricurishpaca imata allichina cashcataca mana cuentata cushunchu. Shinallataj Bibliata utcalla liyishpaca imapi mejorana o imapi cambiana cashcataca manachari cuentata cushun. Chaimantami Bibliataca alli intindishpa estudiana canchij.

Mejorangapaj esforzarishunchij. Bibliata estudiacushpaca shujtajcuna imapi mejorana o cambiana cashcataca mana ricunachu canchij. Cada uno imapi mejorana cashcatami ricuna canchij.

Imapi pandaricushcata cuentata cushpaca mana yallitaj llaquirinachu canchij. Shuj espejopi ricurishpa ñucanchij ñahuipi mana alli cashcacunallata ricushpaca desanimarishunmi. Pero Bibliata liyicushpa huaquin cambiocunata rurana cashcata cuentata cushpaca mana desanimarinachu canchij. Ashtahuanpish Jehová Dios ñucanchij rurai pudishcallata mañaj cashcatami yuyarina canchij (Santiago 3:17).