Joven huauquicuna, Marcospaj, Timoteopaj ejemplota catichij

1, 2. ¿Imamantataj Marcospish, Timoteopish shujtajcunataca mana ayudai tucushachu nishpa yuyai tucurcacuna?

CONGREGACIONPI achca joven huauquicuna shujtajcunata ayudangapaj esforzaricujta ricushpaca cushillami sintirinchij (Salmo 110:3). Can joven cashcamantachari Jehová Diosta ashtahuan sirvina munaita charingui. Congregacionpipish ashtahuan ayudasha ningui. Shinapish cambaj causai ima shina cagrishcata, Jehová Dios maipi sirvinaman cachanata mana yachashcamantachari manchaita charingui. Manacashpaca congregación ucupi imata rurachun mañajpica: “Chaitaca mana pajtachi tucushachu” nishpachari mana chasquircangui. Pero mana manchaita charinachu cangui. Shujtaj jovencunapishmi can shinallataj manchaita charishcacuna.

² Marcospish, Timoteopish can shinallatajmi manchaita charircacuna. Paicunaca paicunapaj causai ima shina cagrishcata mana yachashpapish, shujtajcunata ayudangapaj ashalla experienciata charishpapish shujtajcunata ayudanatami decidircacuna. Marcospi yuyashun. Paica paipaj mamahuanmi tal vez shuj sumaj huasipi causarca. Pero Pablopish, Bernabepish paicunahuan Diosmanta huillangapaj punta viajeman Marcosta invitajpica paica tucuitami saquishpa rirca (Hechos 12:​12, 13, 25). Puntaca Marcosca Antioquiamanmi rirca. Qꞌuipaca Pablohuan, Bernabehuanmi caru llajtacunapi huillanaman rirca (Hechos 13:​1-5). Pabloca Timoteotapishmi caru llajtacunapi Diosmanta huillangapaj invitarca. Chai tiempopica Timoteoca Marcos shinami paipaj yaya mamahuan causashcanga. Paica chairaj joven cashcamantami Pablohuan rinataca mana pudishachu nishpa yuyashcanga (1 Corintios 16:​10, 11; 1 Timoteo 4:12 versocunatapish ricui). Pero Pablohuan rinatami decidirca. Chaimantami Timoteoca achca bendicioncunata chasquirca (Hechos 16:​3-5).

3. a) ¿Apóstol Pablo Marcostapish, Timoteotapish achcata valorashcataca ima shinataj yachanchij? (2 Timoteo 4:​6, 9, 11; fotocunamantapish parlapai). b) ¿Cai yachaipica ima tapuicunallatataj cutichishun?

³ Marcospish, Timoteopish chairaj jovencuna cashpapish congregacionpi ima shina ashtahuan ayudanatami yacharcacuna. Paicunaca Pablopajca achca valishcacunami carca. Chaimantami Pablo ñalla huañunata yachashpaca Marcostapish, Timoteotapish paita ricunaman richun mañarca (2 Timoteo 4:​6, 9, 11-ta liyipai). ¿Apóstol Pabloca imamantataj Marcostapish, Timoteotapish achcata valoraj carca? ¿Joven huauquicunaca ima shinataj Marcospaj, Timoteopaj ejemplota cati tucuncuna? ¿Pablopaj consejocunamantaca ima shinataj beneficiari tucuncuna?

MARCOS SHINA SHUJTAJCUNATA AYUDANGAPAJ ESFORZARI

4, 5. ¿Ima shinataj Marcosca shujtajcunata ayudasha nishcata ricuchirca?

⁴ Shuj revistapi nisha shinaca shujtajcunata ayudana mana jahualla cajpipish tucui horasmi ayudashpa catina canchij. Marcosca chaitami ruraj carca. Por ejemplo, apóstol Pablo segundo viajepi huillanaman rishpaca Marcostaca mana pushashpa rircachu. Chaimantachari Marcosca dimastij llaquilla sintirishcanga (Hechos 15:​37, 38). Chashna sintirishpapish Marcosca huauqui panicunata ayudashpami catirca.

⁵ Marcosca paipaj primo Bernabehuanmi Diosta ashtahuan sirvingapaj shujtaj llajtaman rirca. Casi 11 huatacuna qꞌuipa apóstol Pablo Romapi prezu cajpica Marcosca paita ayudanamanmi rirca (Filemón 23, 24). Chaimantami apóstol Pabloca Marcostaca achcata agradicirca. Pabloca: ‘Ñucata ayudashpami achcata cushichirca’ nircami (Colosenses 4:​10, 11).

6. ¿Sinchi feta charij huauquicunahuan alli amigos canaca Marcostaca ima shinataj ayudarca? (Notatapish ricui).

⁶ Marcosca jovenraj cashpapish sinchi feta charij huauquicunahuanmi tiempota pasaj carca. Chaimantami Diosta ashtahuan sirvishpa catirca. Marcosca Pablohuan Romapi cashca qꞌuipaca apóstol Pedrota ayudangapajmi Babiloniaman rirca. Chaipimi Marcosca Pedropaj alli amigo tucurca. Chaimantami Pedroca Marcostaca: “Ñuca churi” nij carca (1 Pedro 5:13). Pedroca Marcosmanca Jesuspaj causai ima shina cashcata, gentecunaman ima shina yachachishcatami huillashcanga. Qꞌuipaca Marcosca Pedro ima nishcatami paipaj libropi escribishpa churarca.a

7. ¿Shuj huauquica Marcospaj ejemplotaca ima shinataj catirca? (Fotomantapish parlapai).

⁷ Marcosca Jehová Diosta sirvinapimi ashtahuan ocuparirca. Shinallataj sinchi feta charij huauqui panicunahuanmi tandanacuj carca. ¿Joven, ima shinataj Marcospaj ejemplota cati tucungui? Congregacionpi siervo ministerial o anciano canatachari munangui. Shinapish congregacionpi chai responsabilidadcunata manaraj charishpaca ama desanimarichu. Chaipaj randica congregacionpi huauqui panicunata ayudangapaj, Jehová Diosta ashtahuan sirvingapaj esforzarishpa cati. Seung-Woo huauquipaj ejemplomanta yachashun. Cunanca paica congregacionta pushaj ancianomi can. Cai huauquica jovenraj cashpaca misma edadta charij shujtaj jovencunahuanmi compararij carca. Shujtaj jovencunata congregacionpi ashtahuan sirvichun agllashcata ricushpaca ancianocuna paita mana cuentapi charishcatami yuyarca. Chaimi pai ima shina sintirishcata ancianocunaman huillarca. Chaita yachashpa shuj ancianoca: “Pi mana ricucujpipish congregacionpi huauqui panicunata ayudangapajmi esforzarina cangui” nishpami animarca. Chaimantami cai huauquica mayorlla huauqui panicunata, shujtaj huauqui panicunatapish paipaj carropi tandanacuicunaman pushashpa ayudai callarirca. Chai tiempomanta parlashpaca Seung-Woo huauquica: “Chaipimi shujtajcunata ima shina ayudana cashcata intindircani. Huauqui panicunata ayudashpaca cushillami sintirircani” ninmi.

TIMOTEO SHINA SHUJTAJCUNAMANTA PREOCUPARINGAPAJ ESFORZARI

8. ¿Imamantataj Pabloca paita compañachun Timoteota agllarca? (Filipenses 2:​19-22).

⁸ Apóstol Pabloca paita catirashpa llaquichishca llajtacunata tigra visitangapajca mana manchaj huauquicuna compañachunmi minishtirca. Puntapica achca huatacunata Diosta sirvij Silastami agllarca (Hechos 15:​22, 40). Qꞌuipaca joven Timoteotapishmi agllarca. ¿Imamantataj Pabloca paita agllarca? Huauquicunaca Timoteomantaca allicunatami parlajcuna carca (Hechos 16:​1, 2). Shinallataj Timoteo shungumanta shujtajcunamanta preocuparij cashcatami yacharca (Filipenses 2:​19-22-ta liyipai).

9. ¿Ima shinataj Timoteoca shujtajcunamanta sustarij cashcata ricuchirca?

⁹ Timoteoca apóstol Pablota compañai callarishca horasmantami shujtajcunamanta achcata sustarishcata ricuchirca. Chaimantami Pabloca Berea llajtapi mushuj huauqui panicunata animachun Timoteota saquirca (Hechos 17:​13, 14). Silaspish chai llajtapimi carca. Chaimantami Timoteoca Silasmanta achcata yachashcanga. Qꞌuipaca Pabloca Tesalonicapi huauqui panicunataca sinchiyachichunmi Timoteota cacharca (1 Tesalonicenses 3:2). Achca huatacuna pasajpipish Timoteoca huauqui panicunatami cꞌuyashpa catirca. Bibliapica Timoteoca ‘huacajcunahuan huacaj’ cashcatami nin (Romanos 12:15; 2 Timoteo 1:4). ¿Joven huauquicunaca Timoteopaj ejemplotaca ima shinataj cati tucuncuna?

10. ¿Woo Jae huauquica shujtajcunamanta preocuparingapajca imatataj rurai callarirca?

¹⁰ Woo Jae shuti huauquica shujtajcunamanta sustarinatami yacharca. Jovenraj cashpaca paipajca mayorlla huauqui panicunahuan parlanaca sinchimi carca. Chaimantami Tandanacuna Huasipi ta rato saludashpa rijlla carca. Chaimi shuj ancianoca cꞌuyaihuan cashna nishpa consejarca: “Mayorlla huauqui panicunahuan parlanacui callaringapajca paicunata imamanta valorashcatami nina cangui. Shinallataj paicuna imamanta preocuparishca cashcatami yuyana cangui” nircami. Woo Jae chai consejotami catirca. Paica congregacionta pushaj ancianomi can. Woo Jae huauquica: “Cunanca chꞌican chꞌican edadta charijcunahuanca parlai tucunillami. Shinallataj shujtajcuna ima problemacunahuan chꞌimbapuracushcata intindishcamantami paicunata ima shina ayudanata yachani” ninmi.

11. ¿Jovencunaca huauqui panicunamanta sustarishcata ricuchingapajca imatataj rurana can? (Fotomantapish parlapai).

¹¹ Jovencuna, cancunapishmi shujtajcunamanta sustarishcata ricuchi tucunguichij. Por ejemplo, tandanacuicunapi tucuicunahuan parlangapaj esforzari. Shinallataj paicuna ima laya cashcata alli tapushpaca allimi uyana cangui. Chaita rurashpami paicunata ima shina ayudanata yachangui. Por ejemplo, shuj mayorlla cusa huarmi JW Library^® aplicacionta mana utilizai tucujpica paicunatami ayudai tucungui. O paicuna pihuan predicanata mana charijpica paicunahuanmi llujshi tucungui. Canraj shujtajcunata ayudajpica shujtaj huauqui panicunapishmi cambaj ejemplota catisha ningacuna.

PABLOPAJ CONSEJOCUNATA CATINGAPAJ ESFORZARI

12. ¿Jovencunaca Pablo Timoteoman cushca consejocunamanta beneficiaringapajca imatataj rurai tucuncuna?

¹² Timoteoca Pablopajca shuj churi shinami carca. Chaimantami Pabloca alli causachun, alli predicachun Timoteomanca consejocunata curca (1 Timoteo 1:18; 2 Timoteo 4:5). ¿Pablo Timoteoman cushca consejocuna cantapish ayudachunca imatataj rurai tucungui? Primera y Segunda a Timoteo cartacunatami liyi tucungui. Liyicushpaca chai cartacunata Pablo canman cachashcata, chai consejocuna canta ima shina ayudai tucushcatami yuyana cangui. Cunanca huaquin consejocunata ricushun.

13. ¿Diosta tucui shunguhuan adorangapajca imatataj rurana canchij?

¹³ “Ejerciciota ruraj shina Diosta tucui shunguhuan adorangapaj sinchita esforzari” (1 Timoteo 4:7b). Pabloca Jehová Diosta tucui shunguhuan sirvichun, paita cushichichunmi Timoteotaca consejarca. Ñucanchijcunapish chai consejota cazungapajmi sinchita esforzarina canchij. Chaimantami Pabloca: ‘Ejerciciota ruraj shina sinchita esforzari’ nirca. Chaita nishpaca carrerapi callpaj runacunapimi yuyacurca. Callpaj runacunaca carrerata ganangapajca ejerciciota rurashpa sinchitami esforzarincuna. Ñucanchijcunapish Jehová Dioshuan alli apanacungapajca cai callpaj runacuna shinami sinchita esforzarina canchij.

14. ¿Imamantataj cada punlla Bibliata liyina cangui? Shuj ejemplota churashpa parlapai.

¹⁴ Jehová Diospajman ashtahuan cꞌuchuyangapajca cada punllami Bibliata liyingapaj esforzarina cangui. ¿Chaitaca ima shinataj rurai tucungui? Marcos 10:17 al 22-ta liyicushcata yuyai. Chaipica Jesusca shuj charij jovenhuanmi parlarca. Chai jovenca Jesús Mesías cashcatami crirca. Pero Jesusta catingapajca mana achca feta charircachu. Chashna cajpipish Jesusca paitaca cꞌuyashpami catirca. Chaimantami alli decisionta japichun chai joventaca cꞌuyaihuan consejarca. Chaita liyishpaca, ¿canca Jehová Diosmantaca imatataj yachai tucungui? Jehová Dios chai joventa achcata cꞌuyashcatami yachai tucungui. ¿Imamanta? Jesusca paipaj Yaya shinami chai joventa cꞌuyashcata ricuchirca (Juan 14:9). Cunanca chai jovenpaj causaipi yuyashpa, cambaj causaipi yuyashpa cashna tapuri: “¿Jehová Diospajman ashtahuan cꞌuchuyangapaj, shujtajcunata ashtahuan ayudangapajca imatataj rurai tucuni?”.

15. ¿Imamantataj jovencunaca alli ejemplo cangapaj esforzarina can? (1 Timoteo 4:​12, 13).

¹⁵ ‘Diosta tucui shunguhuan sirvijcunapajmi alli ejemplo cana cangui’ (1 Timoteo 4:​12, 13-ta liyipai). Apóstol Pabloca Timoteotaca alli liyij cachun, alli yachachij cachun nishpami consejarca. Shinallataj cꞌuyaita ricuchichun, sinchi feta charichun, limpio causaita charichunpishmi nirca. ¿Imamantataj Timoteoca chaicunata rurangapaj esforzarina carca? Shujtajcunapaj alli ejemplo cangapajmi chaicunataca rurana carca. Ruraicunami ñucanchij nishcacunatapish ashtahuan valishca can. Caipi yuyai. Canca shuj conferenciatami cugringui. Chaipica huillanapi ashtahuan participanamantami parlana cangui. Huauqui panicunaman chaimanta yachachingapajca cambaj ejemplohuanmi ricuchina cangui ¿nachu? Canraj huillanapi ashtahuan participangapaj esforzarijpica shujtajcunapishmi chaita rurasha ningacuna (1 Timoteo 3:13).

16. a) ¿Joven huauquicunaca 1 Timoteo 4:​12-pi nishcacunataca ima shinataj pajtachi tucuncuna? b) ¿Jovencunaca paicunapaj rimaihuan shujtajcunapaj alli ejemplo cashcataca ima shinataj ricuchi tucuncuna?

¹⁶ 1 Timoteo 4:​12-pica Pabloca jovencuna Diosta alli sirvingapaj imallata rurana cashcatami parlan. Chai versopi tiyaj yuyaimantami ashtahuan investigai tucungui. Por ejemplo, Pabloca: ‘Cambaj rimaihuanca alli ejemplomi cana cangui’ nircami. Chaita pajtachingapaj imata rurana cashcata yuyai. Cambaj yaya mamahuan causacushpaca canmanta imalla rurashcamantami agradici tucungui. Tandanacuicunapi cashpaca cambaj propio shimicunahuan comentangapajmi esforzari tucungui. Shinallataj tandanacuipi participashcamantami shuj huauquita o shuj panita felicitai tucungui. Felicitashpaca pai participashcamanta imata munashcatami ni tucungui. Chaicunata rurangapaj esforzarijpica shujtajcunaca can Diosta alli sirvicushcatami ricungacuna (1 Timoteo 4:15).

17. 2 Timoteo 2:​22-pi nishca shinaca ¿jovencunaca Diosta ashtahuan sirvingapajca imatataj rurana can?

¹⁷ ‘Jovencunapaj munaicunamanta caruyai. Ashtahuanpish cashcata ruranata mashcai’ (2 Timoteo 2:​22-ta liyipai). Pabloca Timoteotaca Diosta ashtahuan sirvichun, Diosmanta ama caruyachunmi animarca. Caita yuyai. ¿Deportecunata ruranapi, videojuegocunata pugllanapi o internetpica mashna tiempotataj pasangui? Chaicunapi achca tiempota pasashpaca Diosta ashtahuan sirvingapaj, huauqui panicunata ayudangapajca ña mana tanto tiempota charinguichu. Chaimantachari huaquin cambiocunata rurai tucungui. Chaita rurashpaca congregacionpi ayudangapajmi ashtahuan tiempota charingui. Por ejemplo, Tandanacuna Huasita allichishpami ayudai tucungui. Carritocunahuanpishmi predicai tucungui. Chaicunata ruranapi ocuparishpaca Diosta alli sirvij amigocunatami charingui. Paicunami Diosta ashtahuan sirvichun cantaca ayudangacuna.

SHUJTAJCUNATA AYUDASHPACA CUSHILLAMI CAUSANGUI

18. ¿Marcospish, Timoteopish imamantataj cushilla causarcacuna?

¹⁸ Marcospish, Timoteopish shujtajcunata ayudangapajca sinchitami esforzarircacuna. Chaimantami achca bendicioncunata charishpa cushilla causarcacuna (Hechos 20:35). Marcosca huauqui panicunata ayudangapajmi chꞌican chꞌican ladocunaman rirca. Shinallataj paica Jesuspaj causaimantami Marcos libropi escribirca. Cutin Timoteoca mushuj congregacioncunata callarichishpa huauqui panicunata animashpami Pablota ayudarca. Marcospish, Timoteopish Jehová Diosta ashtahuan sirvingapajmi sinchita esforzarircacuna. Chaimantami Jehová Diosca cushilla carca.

19. ¿Imamantataj joven huauquicunaca Pablopaj consejocunata catina can?

¹⁹ Pablo quillcashca cartacunata liyishpaca Timoteota achcata cꞌuyashcatami cuentata cunchij. Cai cartacunata escribichunca Jehová Diosmi Pabloman yuyaita curca. Joven, chai cartacunata liyishpami Jehová Dios canta cꞌuyashcata, cushilla causachun munashcata cuentata cungui. Chaimanta Pablopaj consejocunata catishpa huauqui panicunata ayudangapaj esforzari. Chaita rurashpami cunan punllapish, shamuj punllacunapish alli causaita charingui (1 Timoteo 6:​18, 19).