Imata mana yachashpapish Diospi confiashunchij

1. a) ¿Jehová Diosca ñucanchijtaca ima shinataj rurarca? b) ¿Jehová Diosca ñucanchijtaca imamantataj chashna rurarca?

JEHOVÁ DIOSCA ñucanchijtaca alli yuyachun, alli yachachun, yachashcatapish alli pajtachichunmi rurarca. ¿Jehová Diosca ñucanchijtaca imamantataj chashna rurarca? Paica paimanta alli yachaita yachachun, paita sirvingapajpish alli decisioncunata japichunmi munan (Proverbios 2:​1-5; Romanos 12:1).

2. a) ¿Jobca imatataj cuentata curca? (Romanos 11:​33, 34; fotomantapish parlapai). b) ¿Ñucanchijpish Job shinaca imatataj cuentata cuna canchij?

² Jehová Diosca ñucanchijta yachashpa catichunmi rurashca. Shinapish mana tucuita yachai tucunchijchu (Romanos 11:​33, 34-ta liyipai). Jobpaj ejemplopi yuyashun. Jehová Diosca Jobtaca achca tapuicunatami rurarca. Chaimi Jobca tucuita mana yachashcata, humilde cana cashcata, pandata yuyacushcatapish cuentata curca (Job 42:​3-6). Ñucanchijpish humildemi cana canchij. Mana tucuita yachashcatapishmi yuyarina canchij. Jehová Diospipishmi tucui shunguhuan confiana canchij. Paica ñucanchijmanca imata yachana cashcallatami siempre yachachin. Chashnami alli decisioncunata agllai tucunchij (Proverbios 2:6).

3. ¿Cai yachaipica imatataj yachashun?

³ Cai yachaipica tucuita mana yachashcamanta ima shina sintirishcatami ricushun. Shinallataj tucuita mana yachashpapish tucuita yachaj Jehová Diospi confiana cashcatapishmi yachashun. Paica ñucanchijman imata yachana cashcatami siempre yachachin (Job 37:16).

CAI MILLAI MUNDO IMA HORA TUCURINATACA MANA YACHANCHIJCHU

4. Mateo 24:​36-pi nishca shinaca ¿imatataj mana yachanchij?

⁴ (Mateo 24:​36-ta liyipai). Cai millai mundo ima hora tucurinataca mana yachanchijchu. Jesuspish cai Allpapi cashpaca ima hora, ima punlla tucurina cashcataca mana yacharcachu.a Chaimi paipaj apostolcunamanca: “Jahua pacha Yayallami ima hora, ima punlla caicuna pajtarina cashcata ricuchingapajca autoridadta charin” nirca (Hechos 1:​6, 7). Jehová Diosca cai millai mundo tucurichunca ñami shuj punllata agllashcata charin. Chaitaca ñucanchijca mana yachai tucunchijchu.

5. ¿Cai millai mundo ima punlla tucurinata mana yachashpaca maipica ima shinataj sintirinchij?

⁵ Jesús nishca shinaca cai millai mundo tucuringacama mashna tiempota shuyana cashcataca mana yachanchijchu. Chaimantami maipica desanimarinchij. Achca huatacunata Diosta sirvijcunapajcarin chai punllata shuyanaca ashtahuan sinchimi canga. Huaquinpica ñucanchij familiapish, shujtajcunapish ñucanchij huillashca tucuri punlla manaraj chayamushcamantami burlarincuna (2 Pedro 3:​3, 4). “Tucuri punlla ima hora, ima punlla shamunata yachashpaca ashtahuan pacienciahuanmi shuyaiman, gentecuna burlarishcatapishmi ahuantaiman” nishpachari yuyanchij.

6. ¿Tucuri punlla ima hora shamunata mana yachashpapish imamantataj Diosta sirvicunchij?

⁶ Jehová Diosta tucui shunguhuan sirvingapajca tucuri punlla ima hora shamuna cashcata yachanataca mana minishtinchijchu. Jehová Diosta cꞌuyashcamanta, paipi confiashcamantami sirvicunchij. Ashtahuancarin ñucanchijca huiñai huiñaicamami Diosta sirvishun ninchij. Tucuri punlla shamujpipish paita sirvina yuyaillami causashpa catishun. Chaimantami Dios agllashca punlla ima hora shamunata mana yachashpapish mana preocuparina canchij. Chaipaj randica Jehová Dios ñucanchijta cꞌuyashcamanta imallata ruragrishcapimi yuyana canchij. Chashnami Diospajman ashtahuan cꞌuchuyashun, paita cushichingapajpishmi tucui pudishcata rurashun (2 Pedro 3:​11, 12).

7. Sofonías 1:14; Mateo 24:​14-pi nishca shinaca ¿imacunatataj yachanchij?

⁷ Ñucanchij mana yachashcapi yuyanapaj randica imata yachashcallapimi yuyana canchij. Por ejemplo, Bibliapica cai tucuri punllacunapi ima tucuna cashcata, causai ima shina cana cashcatami huillan. Chai huillashcacuna pajtaricujta ricushpami 1914 huatamanta tucuri punllacunapi causacushcata yachanchij. Dios jatunta llaquichina punllapish ñalla cꞌuchuyamucujta intindinchij (Sofonías 1:14). Shinallataj Jehová Dios paipaj Gobiernomanta alli huillaicunata huillachun mandashcatapishmi yachanchij. Chaimantami tucui pudishca gentecunaman 240 llajtacunapi, 1.000 yalli shimicunapi huillacunchij (Mateo 24:14). Jehovapaj jatun punlla ima horas chayamunata mana yachashpapish cꞌuyaimantami gentecunaman cushicushpa huillashpa caticunchij.

JEHOVÁ ÑUCANCHIJMANTA IMALLATA RURAI TUCUSHCATAPISH MANA YACHANCHIJCHU

8. Eclesiastés 11:​5-pi nishca shinaca ¿imatataj mana yachai tucunchij?

⁸ (Eclesiastés 11:​5-ta liyipai). Bibliapi nishca shinaca mamapaj huijsapi huahuapaj tullucuna ima shina huiñajtaca mana yachanchijchu. Chaitaca cunan punllacamapish cientificocunaca mana tucuita intindishcacunachu. Chashnallataj Jehová Dios paipaj munaita pajtachingapaj imallata rurai tucushcataca mana tucuita yachanchijchu. Por ejemplo, maipica ñucanchij causaipica ima jarcaicunapish, llaquicunapish ñapish ricurinllami. Chai llaquicuna ricurichun Jehová Dios imamanta saquishcata, ima shina ñucanchijta ayudana cashcatapish mana tucuita yachanchijchu (Salmo 37:5).

9. ¿Jehová ñucanchijta ima shina ayudana cashcata mana yachashpaca ima dudacunatataj chari tucunchij?

⁹ Jehová ñucanchijta ima shina ayudanata mana yachashcamantami maipica dudacunata charinchij. Por ejemplo, ñucanchijca ashtahuan huillangapajca mana tanto trabajanatachari yuyacunchij. Mana cashpaca minishtirishca lugarpi huillanaman rinatachari yuyacunchij. Shinapish “¿Yayitu Diosca tucui ñuca minishtirishcacunata cungachu?” nishpachari dudai callarinchij. Shinallataj maipica Diosta ashtahuan sirvingapajmi esforzaricunchij. Pero jarcaicuna ricurishcamantami ñucanchij munashcata mana pajtachi tucunchij. Tal vez huillanapi yallitaj ocuparishca cajpipish ñucanchijhuan pi mana Bibliamanta yachasha ninchu. Mana cashpaca Diosta sirvina huasicunata shayachinapi ayudacushpaca jarcaicunatachari charinchij. Chaimantami “Jehová Diosca ñucataca mana ayudacuj yachinchu, ñucahuanca mana cushilla cangachu” nishpa dudai callarinchij.

10. ¿Dudacunata charishpaca imatataj alli yuyarina canchij? ¿Ñucanchijcunaca Jehová Diosmantaca imatataj alli yachanchij?

¹⁰ Jehová Diospaj yuyaicunaca ñucanchij yuyaicunata yalli ashtahuan allimi can (Isaías 55:​8, 9). Chaita yuyarishpami humilde canata, Diospi tucui shunguhuan confianata yachashun. Paipi confiajpica ñucanchij rurashcacunaca yalli allimi llujshinga. Shinallataj humilde cashcamantami huillanapi, Diosta sirvina huasicunata shayachinapi tucui alli llujshijpica Jehová Diosta jatunyachinchij (Salmo 127:1; 1 Corintios 3:7). Pero ñucanchij yuyashca shina imapish mana alli llujshijpica dudacunatami charinchij. Shinapish Jehová Dios tucuita ricucushcata, tucuita yachashcatami yuyarina canchij (Isaías 26:12). Tucui ñucanchij pudishcata rurashpaca Jehová Dios ayudanapimi siempre confiana canchij. Jehová Diosca ñaupa punllacunapi shina milagrocunata rurashpaca mana ayudanchu. Pero pai ñucanchijta yachachishpa catinatami seguros cana canchij (Hechos 16:​6-10).

11. ¿Jehová Diosmantaca imatataj yachanchij?

¹¹ Jehová Diosca cꞌuyaj, cashcata ruraj, yachaisapa cashcatami yachanchij. Ñucanchijcuna paita sirvingapaj esforzaricujta ricushpa, huauqui panicunatapish ayudajta ricushpaca achcatami valoran. Shinallataj paita tucui shunguhuan mashcajcunamanpish allicunata cushpami bendician (Hebreos 11:6).

CAYA PUNLLA IMA TUCUNATAPISH MANA YACHANCHIJCHU

12. Santiago 4:​13, 14-pi nishca shinaca ¿imatataj mana yachanchij?

¹² (Santiago 4:​13, 14-ta liyipai). Huaquinpica tucuicunatami llaqui punllacunapish, ima jarcaicunapish japi tucunlla (Eclesiastés 9:11). Chaimantami ñucanchij imata rurasha nishcacuna pajtarinata o caya punlla ima tucunataca mana yachanchij.

13. ¿Caya ima tucunata mana yachashcamantaca ima shinataj sintirinchij?

¹³ Caya punlla ima tucunata mana yachashcamantami maipica imapish sinchi ricurin. Chaicunallapi yuyacushcamantachari huaquinpica cushilla causanata saqui tucushun. Shinallataj huaquinpica mana yuyashcapimi ima llaquicunapish japi tucunlla. Ñucanchij munashcacunapish mana pajtarijpimi maipica llaquirishpa desanimari tucushun (Proverbios 13:12).

14. ¿Cushilla causangapajca imatataj rurana canchij? (Fotomantapish parlapai).

¹⁴ Ñucanchij causaipi llaquicunata charishpapish Yayitu Diostaca tucui shunguhuan cꞌuyashcamantami paita sirvinchij. Bibliapica llaquicuna ama japichun Yayitu Dios tucuipi cuidaj cashcataca mana ninchu. Shinallataj shamuj punllacunapi cada uno ima tucunataca paica mana decidinchu. Ashtahuanpish Yayitu Diosca paita cazunata agllashpa cushilla causachunmi munan (Jeremías 10:23). Ñucanchijpish Santiago shinami yuyana canchij. Paica: “Jehová Diospaj munai cajpica causashunmi, caita o chaitami rurashun” nircami. Chaimantami cushilla causangapajca Diosta cazushpa causana canchij (Santiago 4:15).

15. ¿Shamuj punllacunapi imalla tucunatataj yachanchij?

¹⁵ Caya punlla ima tucunata mana yachashpapish Jehová Dios pai cusha nishcata tucuita pajtachina cashcataca allimi yachanchij. Cai Allpapi cashpa o jahua pachapi cashpa huiñai causaita charina oportunidadtami cunga. Pai nishcacunata pajtachichunca ni pi mana jarcai tucunchu. Isaías 46:​10-pica Jehová Diosca: ‘Ñucami qꞌuipa punlla imalla tucunataca, callarimantapacha tucuita huillani. Ñucaca ñaupa punllacunamantatajmi qꞌuipa punllacunapi ñuca imata ruragrishtaca manaraj chaita rurashpa huillani’ ninmi. Paica manataj llullanchu (Tito 1:2). Paica ñucanchijcuna llaquicunahuan cajpipish cushichishpa, alli yachaita cushpa, fuerzasta cushpami ayudan. Ñucanchijta cꞌuyachunpish pi mana jarcangachu (Romanos 8:​35-39). Chaimantami Jehová Dios ñucanchijta ayudanata, bendicianataca seguros canchij (Jeremías 17:​7, 8).

JEHOVÁ DIOS ÑUCANCHIJTA ALLI RIJSISHCATACA MANA TUCUITA ALLI INTINDI TUCUNCHIJCHU

16. a) ¿Yayitu Diosca imallatataj ñucanchijmantaca alli yachan? b) ¿Jehová Dios canmanta preocuparishcata yachashpaca ima shinataj sintiringui? (Salmo 139:​1-6).

¹⁶ (Salmo 139:​1-6-ta liyipai). Jehová Diosca ñucanchijmantaca tucuitami yachan. Paica ñucanchijcuna imata yuyashcata, imata sintishcata, imatapish imamanta rurashcataca allimi intindin. Paica ñucanchij shungu ucupi ima tiyashcatapish allimi yachan. Caita, chaita imamanta nishcatapish allimi yachan. Paica imata rurashcatapish, imamanta chaita ruragrishcatapish allimi yachan. Chai tucuita yachashcamantami rey David nishca shinaca Yayitu Diosca ñucanchijta ayudangapaj siempre listo can. ¿Tucuita Ruraj, Tucui poderta charij, Jatun Dios canmanta preocuparishcata yachashpaca ima shinataj sintiringui? Ñucanchijpish rey David shinami sintirinchij. Paica Salmo 139:​6-pica: ‘Chashna yachashcaca ñucapajca yallitaj mancharinamari. Yallitaj jatun yachaimari. Mana intindi tucunichu’ nircami.

17. ¿Imamantataj maipica Jehová Dios ñucanchijta alli rijsishcata crinaca sinchi can?

¹⁷ Ñucanchijca chꞌican chꞌican culturacunapi, chꞌican chꞌican crishcacunahuanmi huiñashcanchij. Chaimantachari Jehová Dios cꞌuyaj cashcata, ñucanchijmanta preocuparij cashcata crinaca asha sinchi ricurin. Mana cashpaca ñaupa punllacunapi pandarishcamantami huaquinpica llaquilla sintirinchij. Shinallataj maipica David shina sintirishpami Yayitu Jehová Dios ñucanchijmanta carupi cashcata yuyashun (Salmo 38:​18, 21). Huaquincunaca Jehová Dios munashcata rurangapajmi shungumanta esforzaricuncuna. Shinapish ñaupa causaita saquinaca maipica sinchimi can. Chaimantachari “¿Mana allicunata saquina ñucapaj sinchi cajpipish Diosca imamantataj chaicunata saquichun mañan?” nishpa tapurinchij.

18. ¿Jehová Diosca ñucanchijta alli rijsishcamantaca cada uno ima shina cai tucushcatataj yachan? (Fotomantapish parlapai).

¹⁸ Jehová Diosca ñucanchij rijsirishcatapish yalli allimi rijsin. Ñucanchijcuna pandarijlla cashcata cuentata cujpipish paica ñucanchij imallapi alli cashcata ricushpami ñucanchijtaca cꞌuyan. Chaimantami Jehová Dios ñucanchijta alli rijsishcata intindina canchij. Jehová Dios ñucanchij pandarishcacunata ricushpapish imamanta pandarishcata, ñucanchij ima shina sintirishcataca allimi intindin (Romanos 7:15). Jehová Diosca ñucanchijcuna cꞌuyaj, perdonaj, ayudaj, alli shungu, allita ruraj cai tucushcataca allimi yachan. Chaita intindishpaca Yayitu Diosta cushicuihuan sirvinataca manataj saquishunchu.

19. ¿Jehová Diosmantaca imallatataj yachanchij?

¹⁹ Jehová Dios cꞌuyaj cashcataca allitami yachanchij (1 Juan 4:8). Yayitu Dios cushca mandashcacunaca ñucanchijpajllataj alli cashcata ricushpami pai cꞌuyaj cashcata yachanchij. Shinallataj huiñai causaita charichun munashcamantami paipaj cꞌuyashca Churita ñucanchijmanta huañuchun curca. Chaimantami juchayujcuna cashpapish Diosta sirvi tucushcata seguros canchij (Romanos 7:​24, 25). 1 Juan 3:​19, 20-pi nishca shinaca “Dios ñucanchij shunguta yalli cashcata, pai tucuita yachashcatapish” yuyarinami canchij. Jehová Diosca ñucanchijta tucuimanta yalli alli rijsishcamantami ñucanchijcuna pai munashcata rurai tucushcataca seguro can.

20. ¿Ama yallitaj preocuparingapajca imatataj rurana canchij?

²⁰ Ña ricushca shinaca Jehová Diosca imata yachanata minishtishcallatami yachachin. Pai yachachishcata humildadhuan chasquishpaca imata mana yachashcacunamantaca mana preocuparishunchu. Chaipaj randica Dios imata yachachishcacunallami ñucanchijpajca valishca can. Chashnami Jehová Diospi tucui shunguhuan confiashcata ricuchishun. Yayitu Diosca ‘ima panda yuyaita mana charinchu’ (Job 36:4). Ñucanchijcuna tucuita mana intindishpapish Yayitu Jehová Dios shamuj punllacunapi ashtahuan yachachishpa catinatami seguros canchij. Jehová Dios para siempre yachachishpa catinata intindishpaca dimastij cushillami sintirinchij (Eclesiastés 3:11).