¿Yachacujcuna Diosta sirvinata agllachunca imatataj rurana canchij?

1, 2. a) ¿Huaquin yachacujcunaca ima dudacunata charishpataj mana testigo de Jehová tucuncuna? b) ¿Cai yachaipica imatataj yachashun?

CAN testigo de Jehová shina bautizarisha nishpaca ¿ima dudacunatataj charircangui? Trabajopi cambaj compañerocuna, cambaj amigocuna, cambaj familia cambaj contra tucunatachari mancharcangui. Mana cashpaca Yayitu Dios mandashcacunata mana pajtachi tucunatachari yuyarcangui. Cai laya dudacunata charishca cashpaca cambaj yachacujcunataca allimi intindingui. Maipica paicunapishmi can charishca dudacunallatataj charingacuna.

² Jesús cai Allpapi causacushca tiempopica achca gentecunaca Jesusta catingapajca dudacunata, manchaitami charircacuna (Mateo 13:​20-22). Manchaita charijpipish, dudacunata charijpipish Jesusca paicunatami ayudashpa catirca. Ñucanchij yachacujcunata ayudangapajca Jesuspaj ejemplotami catina canchij. 1) Yachacujcunamanca ima jarcaicunata charishcatami ricuchina canchij. 2) Jehová Diosta ashtahuan cꞌuyachunmi animana canchij. 3) Cambiocunata rurachunmi ayudana canchij. 4) Jarcaicunata mishachunmi yachachina canchij. Caicunamanta yachachingapajca Cushilla causai nishca librotami alli utilizanata yachana canchij. Cai yachaipimi caicunamanta yachashun.

YACHACUJ IMALLA JARCAICUNATA CHARISHCATA RICUCHUN AYUDAI

3. ¿Nicodemoca imamantataj Jesusta catinata mancharca?

³ Nicodemoca tucui judiocunamanta shuj rijsishca pushajmi carca. Jesús seis quillacunata yachachi callarishca huashami Nicodemoca Dios agllashca quishpichij Jesús cashcata yachaj chayarca (Juan 3:​1, 2). Chaita yachaj chayashpapish judiocunata manchashcamantami pacalla Jesushuan parlanacungapaj rij carca (Juan 7:13; 12:42). Nicodemoca Jesusta catij tucushpaca: “Ñuca valishca trabajota, ñuca charishca cosascunatami pirdisha” nishpami yuyashcanga.a

4. ¿Jesusca Nicodemomanca imatataj yachachirca?

⁴ Nicodemoca Moisés quillcashca leytaca allimi rijsij carca. Shinapish Nicodemoca chai leypi Jehová Dios imata rurachun nishcata pi intindichichunmi minishtirca. ¿Jesusca paitaca ima shinataj ayudarca? Jesusca paita ayudangapajmi tiempota llujchirca. Chaimi Jesusca tuta horas Nicodemohuan parlanacungapaj rij carca. Paita catij tucungapaj imata rurana cashcatapishmi yachachirca. Jesusca paipaj juchacunamanta arrepintirina cashcata, yacupi bautizarina cashcata, Diospaj Churipipish feta churana cashcatami Nicodemoman yachachirca (Juan 3:​5, 14-21).

5. ¿Yachacujta ayudangapajca imatataj rurana canchij?

⁵ Shuj yachacujca Bibliamantaca achcatachari yachanga. Shinapish Yayitu Diosta sirvingapajca achca jarcaicunatachari charinga. Por ejemplo, paica trabajashpallachari achca tiempota pasan. Mana cashpaca paipaj familiachari jarcaicunata churan. Ñucanchijpish Jesuspaj ejemplota catishpami yachacujta ayudangapaj tiempota surcuna canchij. Shuj cafecitota ubyanaman ringapaj, paseanaman ringapajmi yachacujta invitai tucunchij. Chaipica yachacujca tranquilo sintirishpami ima jarcaicunata, ima llaquicunata charishcatapish huillai tucunga. Chashnami ñucanchijta cushichinapaj randica, Yayitu Jehová Diosta cꞌuyashcamanta cambiocunata rurachun ayudai tucushun.

6. ¿Bibliapi yachashcata cambaj yachacuj pajtachichunca ima shinataj animana cangui? (1 Corintios 16:13).

⁶ Yachacujca Bibliapi yachashcacunata pajtachingapajca animotami minishtin. Chaimantami Yayitu Jehová Dios ayudanapi confiachun yachachina canchij (1 Corintios 16:​13-ta liyipai). ¿Paicunataca ima shinataj yachachina canchij? ¿Escuelapi cashpaca cambaj profesor ima shina cachuntaj munarcangui? ¿Nachu pacienciata ricuchichun munarcangui? “Canca valinguimi, allitami rurashcangui” nichunpishmi munarcangui. Canmi chai yachachij shina cana cangui. Chaipajca Dios imata rurachun munashcatami yachachina cangui. Ashtahuancarin Yayitu Dios cambiocunata rurachun paillataj ayudaj cashcatami intindichina cangui.

YACHACUJCUNA JEHOVÁ DIOSTA ASHTAHUAN CꞌUYACHUN AYUDAI

7. ¿Jesusca paita catijcunamanca Jehová Diosta ashtahuan cꞌuyachunca imatataj yachachirca?

⁷ Jesusta catijcunaca Diosta cꞌuyashcamantami paita cazunata munajcuna carca. Chaita yachashcamantami Jesusca Jehová Dios cꞌuyaj Yaya cashcata cutin cutin yachachirca. Por ejemplo, Jesusca: “Jehová Diosca paipaj huahuacunaman allicunata cuj yaya shinami can” nishpami yachachirca (Mateo 7:​9-11). Jesusta uyajcunaca shuj cꞌuyaj yayataca manachari charircacuna. Chaimantami Jesusca shuj alli ejemplota churashpa Jehová Dios shuj cꞌuyaj Yaya cashcata intindichirca. Jesusca mana allita rurashcamanta arrepintirij churita shuj cꞌuyaj yaya cushicuihuan chasquishcamantami parlarca. Chaita uyashpaca achca gentecunaca dimastij cushillami sintirishcangacuna. Chashna yachachishpami Jesusca paita catijcunataca Jehová Diosta ashtahuan cꞌuyachun ayudarca (Lucas 15:​20-24).

8. ¿Yachacuj Jehová Diosta ashtahuan ashtahuan cꞌuyachunca imatataj cutin cutin yachachina canchij?

⁸ Canpish cambaj yachacujtaca Jehová Diosta ashtahuan cꞌuyachunmi ayudai tucungui. Chaipajca yachacujman yachachicushpaca Jehová Dios cꞌuyaj, llaquij, paita ayudaj, paita cuidaj, perdonaj Dios cashcatami yachachina cangui. Jesús ñucanchijmanta huañushcata yachachicushpapish Jehová Dios paita cꞌuyashcamanta chai sumaj regalota cushcatami yachachina cangui (Romanos 5:8; 1 Juan 4:10). Yachacujca Jehová Dios paita achcata cꞌuyashcata intindishpaca paipish Jehová Diostami ashtahuan ashtahuan cꞌuyai callaringa (Gálatas 2:20).

9. ¿Michaelca imata yachaj chayashpataj bautizarinata decidirca?

⁹ Indonesia llajtamanta caj huauqui Michaelmanta yachashun. Huahuaraj cashpami Bibliamanta yachai callarirca. Shinapish mana bautizarircachu. 18 huatacunata charishpami paica shujtaj llajtaman rishpa camionta manejashpa trabajai callarirca. Tiempo qꞌuipaca Indonesiaman tigrashpami cazarashpa shuj ushushita charirca. Shinapish cutin tigrami shujtaj llajtapi pai solo trabajanaman rirca. Pai shujtaj llajtaman rijpica paipaj huarmipish, paipaj ushushipish Bibliamantami estudiai callarircacuna. Biblia yachachishcatapishmi pajtachi callarircacuna. Michaelpaj mama huañujpimi paica paipaj yayata cuidangapaj Indonesiaman tigrarca. Chaipimi Bibliamanta cutin estudiai callarirca. Shuj punllaca Cushilla causai nishca libropaj yachai 27-tami yachacurca. “Ashtahuan yachai” nishca partepica Jesús ñucanchijmanta huañushcatami yacharca. Chaita yachacushpaca Jehová Dios paipaj Churi huañujpi dimastij sufrishcatami cuentata curca. Jehová Dios paita dimastij cꞌuyashcata cuentata cushpami achcata huacai callarirca. Chaimi paipaj causaipi cambiocunata rurashpa bautizarinata decidirca.

YACHACUJ CAMBIOCUNATA RURACHUN AYUDAI

10. ¿Jesusca Jehová Diospi confiashpa huillanapi ocuparichunca paita catijcunataca ima shinataj ayudarca? (Lucas 5:​5-11; fotomantapish parlapai).

¹⁰ Jesuspaj punta discipulocunaca Dios agllashca quishpichij Jesús cashcatami cuentata curcacuna. Chaita yachashpapish paipaj discipulocunaca callaripica trabajanallapimi yuyajcuna carca. Por ejemplo, Pedropish, Andrespish, Santiagopish, Juanpish pescadocunata cꞌatushpami shuj alli negociota charijcuna carca (Marcos 1:​16-20). Chai negociota charijta ricushpami Jesusca chai tucuita saquishpami paita catichun nirca (Mateo 4:​18, 19). Chaita rurangapajca Jehová Diospimi confiana carcacuna. ¿Paita catijcuna Jehová Diospi confiachunca Jesusca ima shinataj ayudarca? Jesusca shuj milagrota rurashpami Jehová Dios paicunata, paicunapaj familiata cuidana cashcata ricuchirca (Lucas 5:​5-11-ta liyipai). Chaimi Pedropish, Andrespish, Santiagopish, Juanpish paicunapaj familiata de seguro cuidashpa catircacuna. Shinapish Jehovapi confiashcamantami Jesusta catinapi, huillanapi ashtahuantajca ocuparircacuna.

11. ¿Yachacuj Jehová Diospi ashtahuan confiachunca imatataj parlana cangui?

¹¹ Ñucanchijcunaca Jesús shinaca mana milagrocunata ruranchijchu. Shinapish ñucanchij causaipi Jehová Diosta punta lugarpi churashcamanta pai ima shina ayudashcatami yachacujman parlai tucunchij. Por ejemplo, canca negociota charishcamanta, cambaj animalitocunata charishcamantachari tandanacuiman ringapajca mana tiempota charircangui. Chaimantami tandanacuiman rina punllapica utca desocuparingapaj huaquin cambiocunata rurana carcangui. Chai cambiocunata rurashcamanta Yayitu Dios canta ima shina ayudashcata, ima shina bendiciashcatami yachacujman parlana cangui. Chashnami yachacujtaca Jehová Diospi ashtahuan confiachun ayudangui.

12. a) ¿Yachacujman yachachingapajca imamantataj chꞌican chꞌican huauqui panicunata apana cangui? b) ¿Cambaj yachacuj Jehová Diospi ashtahuan confiachunca imatataj rurana cangui? Shuj ejemplomanta parlai.

¹² Cambaj yachacujta yachachingapajca chꞌican chꞌican jarcaicunata charishca huauqui panicunatami apana cangui. Paicuna Bibliamanta ima shina yachai callarishcata, Jehová Diosta punta lugarpi churangapaj ima shina jarcaicunata mishashcatami cambaj yachacujman parlachun mañana cangui. Shinallataj Cushilla causai nishca libromanta yachachicushpaca “Ashtahuan yachai”, “Caicunatapish ricui” nishca partecunapimi huaquin videocunata cambaj yachacujhuan ricuna cangui. Por ejemplo, yachai 37-ta yachachicushpaca Diosca ima illashcata cujmi nishca videotami ricuchina cangui. Caicunata rurajpica yachacujca Jehová Diospi ashtahuan confianatami yachanga.

YACHACUJ JARCAICUNATA MISHACHUN AYUDAI

13. ¿Jesusca paita catijcuna jarcaicunata chꞌimbapurachunca ima shinataj ayudarca?

¹³ Jesusca paita catijcunataca familia ucupipish jarcaicunata charina cashcatami cutin cutin advirtirca (Mateo 5:11; 10:​22, 36). Pai huañungapaj ashalla punllacuna faltajpicarin Jesusca paita catijcunamanca: “Cancunatami catirashpa llaquichingacuna, huañuchingacunapish” nircami (Mateo 24:9; Juan 15:20; 16:2). Shinallataj huillashpa catichunca contracunahuan ama rimanacuchun, paicunata ama tigra llaquichichunpishmi yachachirca.

14. ¿Ñucanchij yachacujcuna jarcaicunahuan chꞌimbapurachunca callarimanta imatataj yachachina canchij? (2 Timoteo 3:12).

¹⁴ Ñucanchijpish ñucanchij yachacujcunamanca jarcaicunata charigrishcatami yachachina canchij (2 Timoteo 3:​12-ta liyipai). Yachacuj Bibliapi nishca shina causacushcamantachari vecinocunaca paimanta burlaringacuna. Shinallataj paipaj familiacunaca Bibliamanta yachachunca manachari munangacuna. Chaimantami yachacujmanca imata cutichinata, imata ruranata callarimanta yachachina canchij. Chashnami yachacujca alli allichirishca canga.

15. ¿Ñucanchij yachacujpaj familia jarcaicunata churajpica imatataj rurana canchij?

¹⁵ ¿Ñucanchij yachacujpaj familia jarcaicunata churajpica imatataj rurana canchij? Paimanca paipaj familia mana millaimanta chashna jarcacushcatami intindichina canchij. Paipaj familiaca Testigocunamantachari llullacunata uyashcanga. Chaimantachari paita pandachicushcata yuyancuna. Chaita cuentata cuchunmi yachacujta ayudana canchij. Jesuspaj familiapish tucuita mana intindishcamantami Jesús loco tucushcata yuyarcacuna (Marcos 3:21; Juan 7:5). Chaimantami yachacujca pacienciata charinata, paipaj familiahuanpish respetohuan parlanata alli yachana can.

16. ¿Ñucanchij yachacujcuna paipaj crishcacunamanta familiaman cꞌuyaihuan parlachunca ima shinataj ayudana canchij?

¹⁶ Yachacujpaj familiaca cambaj yachacuj imata yachacushcatachari yachasha ninga. Chaimantami yachacujpaj familia ama shaicurichunca alaja shimicunahuan, ashalla shimicunahuan, cꞌuyaihuan imata yachacushcata parlachun cambaj yachacujta animana cangui. Chashna parlajpimi yachacujpaj familiaca shujtaj punllacunapish Bibliamanta ashtahuan yachanata munanga (Colosenses 4:6). Shinallataj cambaj yachacujmanca paipaj familiacunaman jw.org paginamanta parlachunmi yachachina cangui. Chashnami yachacujpaj familiacunaca testigo de Jehovacunamanta ashtahuan yachasha nishpa, shujtaj tapuimantapish yachanata munashpaca jw.org paginaman yaicungacunalla.

17. ¿Yachacujpaj familiacuna o vecinocuna rurashca tapuicunata jahualla cutichichunca ima shinataj yachacujta ayudana canchij? (Fotomantapish parlapai).

¹⁷ ¿Yachacujpaj familiacuna o vecinocuna rurashca tapuicunata jahualla cutichichunca ima shinataj yachacujta ayudana canchij? Chaipajca jw.org paginapi “Gentecuna rurashca tapuicuna” nishca parteman yaicushpami chai tapuicunamanta yachachina cangui (2 Timoteo 2:​24, 25). Shinallataj Cushilla causai nishca libromanta yachachicushpaca huaquincuna imata nishcatapishmi ricuchina cangui. Chaipica crishcacunata cꞌuyaihuan difindichunmi paipaj familiahuan parlanacucuj shina cambaj yachacujhuan repasana cangui. Repasacui horas imapi mejorana cashcata ricushpaca cambaj yachacujman ninallami cangui. Chashnami yachacujca paipaj crishcacunataca jahualla difindinga.

18. ¿Cambaj yachacuj huillanaman llujshichunca ima shinataj ayudana cangui? (Mateo 10:27).

¹⁸ Jesusca paita catijcunataca tucui gentecunaman alli huillaicunata huillachunmi cacharca (Mateo 10:​27-ta liyipai). Yachacujca huasin huasin ñucanchijhuan huillai callarishpaca Yayitu Diospimi ashtahuan confiai callaringa. Paita ima shina ayudashcatapishmi ricunga. ¿Cambaj yachacuj ñucanchijhuan huillanaman llujshichunca ima shinataj ayudana cangui? Yachacujta animangapajca campaña tiyai horaspimi ñucanchijhuan huillanaman llujshichun animana cangui. Chaipimi publicador tucungapaj imallata rurana cashcata parlana cangui. Shinallataj tandanacuicunapi demostracioncunata cuchunmi animana cangui. Chaicunata pajtachishpaca paipaj crishcacunamantami shujtajcunaman jahualla parlai tucunga.

CAMBAJ YACHACUJPI CONFIASHCATA RICUCHI

19. a) ¿Jesusca paipaj discipulocunapi confiashcataca ima shinataj ricuchirca? b) ¿Jesuspaj ejemplota catingapajca imatataj rurana canchij ¿

¹⁹ Jesusca jahua pachaman manaraj rishpaca paipaj discipulocunataca: ‘Cancuna jahua pachapi ñucahuan cachunmi cancunataca pushashpa risha’ nircami. Chaita nijta uyashpami Jesusta catijcunaca pai ima nisha nishcataca mana intindircacuna. Paipaj discipulocuna mana intindijpipish Jesusca paicuna Jehová Diosta tucui shunguhuan sirvishpa catinatami seguro carca (Juan 14:​1-5, 8). Jesusca paipaj discipulocuna pai nishcacunata alli intindingapaj tiempota minishtishcataca allimi yacharca. Chashnami Jesusca paicunapi confiashcata ricuchirca (Juan 16:12). Ñucanchijpish Jesús shinallatajmi ñucanchij yachacujcunapi confiashcata ricuchina canchij. Shinallataj ñucanchij yachacujcuna Jehová Diosta sirvina munaita charishcapipishmi confiana canchij.

20. ¿Pani Teresaca paipaj yachacujpi confiashcataca ima shinataj ricuchirca?

²⁰ Ñucanchij yachacujcuna cambiocunata ruranapimi siempre confiana canchij. Malaui llajtamanta pani Teresamanta yachashun.b Paica Andrea shuti joven huarmimanmi Bibliamanta yachachi callarirca. Andreaca catolicami carca. Shuj punllaca Cushilla causai nishca libropaj yachai 14-tami yachacurcacuna. Chaimi pani Teresaca: “¿Yayitu Diosta adorangapajca santocunatachu utilizana canchij?” nishpa tapurca. Andreaca achcata colerashpami: “Chaitaca cada unomi decidina canchij” nishpa cutichirca. Chaita uyashpami pani Teresaca Andrea ña mana ashtahuan yachashpa catinata yuyarca. Shinapish chai panica pacienciahuanmi Bibliamanta yachachishpa catirca. Shinallataj Andrea tiempohuanca santocunata ña mana adoranapimi confiarca. Huaquin quillacuna qꞌuipaca yachai 34-ta yachachicushpami pani Teresaca shuj tapuita rurarca. Paica: “¿Bibliamanta yachana, Jehová Diosta ashtahuan rijsinaca ima shinataj cantaca ayudashca?” nishpami tapurca. Chashna tapujpica Andreaca: “Testigocunaca alajatami yachachincuna. Paicunaca Biblia nishcatami pajtachincuna” nircami. Asha tiempo huashacarin Andreaca santocunata adoranatami saquirca, bautizarinatapishmi decidirca.

21. ¿Ñucanchij yachacujcuna Jehová Diosta sirvichunca ima shinataj ayudana canchij?

²¹ Shuj plantitata huiñachij shinami Jehová Diosca yachacujcuna ñaupajman catichun ayudanga. Shinallataj ñucanchijpishmi yachacujcunataca Jehová Diosta sirvichun ayudai tucunchij (1 Corintios 3:7). Chaimantami yachacujcunamanca Jehová Dios imata rurachun munashcata yachachina canchij. Jehová Diosta tucui shunguhuan cꞌuyashcamanta cambiocunata rurachunpishmi ayudana canchij. Llaquicunata charijpipish Jehová Dios ayudanapi confiachunmi yachachina canchij. Ashtahuancarin ñucanchij yachacujcunapi confiashcatami ricuchina canchij. Chashnami paicunapish Jehová Diosta sirvi tucushcata seguros cangacuna.