Jehová Diosmi ñucata yachachishca

ÑUCA YAYA MAMAPAJ EJEMPLOMANTAMI ACHCATA YACHARCANI

Casi 1960 huatapica Italiamanta Canadá llajtapi saquirij Kindersley llajtamanmi ñuca familiahuan rircanchij. Asha tiempo qꞌuipaca ñuca yaya mamaca Bibliamantami yachai callarircacuna. Qꞌuipacarin tandallami tucui shunguhuan Diosta sirvi callarircanchij. Ñuca uchillaraj cashpaca ñuca familiahuanca achca horascunatami huillashpa pasaj carcanchij. Chaimantami, “ñucaca ocho huatacunallata charishpami precursor auxiliar tucurcani” nishpa huaquinpica pugllashpa nini.

Ñuca yaya mamaca huajchacuna cashpapish Jehová Diosta sirvingapajmi achcata esforzarircacuna. Por ejemplo, 1963 huatapica Estados Unidospi tiyaj jatun tandanacuiman ringapajca paicunapaj achca charishca cosascunatami cꞌaturcacuna. Chashnami chai tandanacuiman ringapaj cullquita charircanchij. 1972 huatapica Canadallapitaj saquirij Trail llajtapi sirvinamanmi rircanchij. Chaiman chayangapajca achcatami viajana carcanchij. Chaipica italiano shimipimi huillanaman rircanchij. Ñuca yayaca shuj edificiota cuidashpa, pꞌichashpami trabajaj carca. Ashtahuan valishca trabajocunata paiman cusha nijpipish Diosta sirvinata punta lugarpi churangapajmi chai trabajocunata mana chasquirca.

Ñuca yaya mama ñucanchijman alli ejemplota saquishcamantami achcata agradicini. Paicunaca ñucatapish, ñuca huauqui panicunatapishmi Jehová Diosta alli sirvichun ayudarcacuna. Shinallataj Diosta sirvinata punta lugarpi churajpi pai ñucanchijta manataj saquinatami yachachircacuna. Chaitaca manataj cungarishcanichu (Mateo 6:33).

TIEMPO COMPLETOPI SIRVINACA SINCHIMI RICURIRCA

1980 huatapica Debbi shuti huarmihuanmi cazararcani. Paica sumaj, Diosta alli sirvij huarmimi carca. Ñucanchijca tiempo completopi Diosta sirvinatami munarcanchij. Chaimantami Debbica cazarashca quimsa quillacuna huashalla precursora tucurca. Cazarashca shuj huata qꞌuipaca shuj uchilla congregacionpi sirvinamanmi rircanchij. Chaipi achcata ayudachun minishtishcamantami ñucapish precursor tucurcani.

Tiempohuanca desanimarishpami congregacionmanta caruyanata decidircanchij. Shinapish chaita manaraj rurashpaca superintendente de circuitohuanmi parlarcanchij. Paica ñucanchijtaca cꞌuyaihuanmi: “Huauqui panicunapaj pandarishcacunallata ricunapaj randica paicunapaj alli ruraicunata valoraichijyari” nishpa consejarca. Chai consejoca achca valishcami carca (Salmo 141:5). Chai consejota uyashcahuanmi pajtachircanchij. Chaipica achca jovencitocunapish, mana Testigohuan cazarashca huauqui panicunapish Diosta ashtahuan sirvingapaj tucui pudishcata ruracujtami ricurcanchij. Jehová Dios congregación ucupi tucuita allichina cashcapipishmi confiarcanchij (Miqueas 7:7). Chaicunata pajtachishpaca cutinmi Jehová Diosta cushicuihuan sirvi callarircanchij.

Qꞌuipacarin punta cutinmi Escuela de Precursoresman rircanchij. Chaipi yachachijcunaca shujtaj llajtacunapimi sirvishcacuna carca. Paicunaca imalla llaquicunata charishcata, ima bendicioncunata charishcatapishmi fotocunapi ricuchircacuna. Chai fotocunata ricuchijpimi ñucanchijpish shujtaj llajtacunapi misionero shina sirvina munaita charircanchij.

Misionerocuna shina sirvingapajca 1984 huatapica Canadallapitaj saquirij Quebec llajtapi huillangapaj chaipi causanamanmi rircanchij. Chaiman chayangapajca achca punllacunatami viajana carcanchij. Chai llajtapica mushuj culturata, mushuj shimitapishmi yachana carcanchij. Shinallataj ashalla cullquitami charij carcanchij. Shuj cutinca micunata mana charishcamantami shuj vecinopajpi papata chꞌalanaman rircanchij. Papitacunallata charishcamantami ñuca huarmisitaca papitacunahuan tucui laya micunitacunata ruraj carca. Chai jarcaicunata charishpapish Jehová Dios ñucanchijta cuidacushcatami ricurcanchij. Pai cuidacushcamantami achca cushilla sintirircanchij (Salmo 64:10).

Shuj punllaca mana yuyashcapimi ñucanchijtaca telefonoman cayarcacuna. Chaipica Canadapi saquirij Betelpi sirvichunmi invitarcacuna. Shinapish ñucanchijca Escuela de Galaadman ringapajmi shuj solicitudta cachashca carcanchij. Chaimi Betelpi sirvichun invitashcamanta cushicurcanchij. Shinapish Escuela de Galaadman manaraj invitashcamantami asha llaquilla sintirircanchij. Betelman chayashpaca Comité de Sucursalpi sirvij huauqui Kenneth Littlehuanmi parlarcanchij. Paitaca: “¿Escuela de Galaadmanpish invitajpica imatataj rurashun?” nishpami tapurcanchij. Chaimi paica: “Chaimanta ama preocuparichijchu. Escuela de Galaadman ña invitajpimi imata ruranata decidinguichij” nirca

Shuj semana qꞌuipallami ñucanchijtaca Escuela de Galaadman invitarcacuna. Chaipimi Betelpi saquirinata o Escuela de Galaadman rinata decidina carcanchij. Huauqui Kennethca ñucanchijtaca: “Imata decidishpapish allimi canga. Maipica ‘caita o chaitami agllana carcanchij’ nishpachari yuyanguichij. Pero imata decidijpipish Jehová Diosca cancunatami bendicianga” nircami. Chaimi ñucanchijca Escuela de Galaadman rinatami decidircanchij. Ñucanchij causaipica huauqui Kenneth nishcacuna cierto cashcatami ricushcanchij. Chaimantami ñucanchij shina imata ruranata mana yachajcunamanca huauqui Kenneth nishcacunallatataj nishpa animanchij.

MISIONERO SHINAMI SIRVI CALLARIRCANCHIJ

Abril de 1987 huatapimi Escuela de Galaadpaj clase 83-pi carcanchij. Chai claseca Nueva Yorkpimi carca. Chaipica 24 yachacujcunami carcanchij. Ñucanchijtaca huauqui Ulysses Glass y Jack Redfordmi yachachircacuna. Paicuna alajata yachachishcamantami cinco quillacunaca rato pasashca carca. Chaimi 6 de septiembre de 1987-pi graduarircanchij. Graduarishca qꞌuipaca ñucanchijtapish, huauqui John Goodetapish, paipaj huarmisita Mariatapish Haití llajtapi sirvichunmi cacharcacuna

1962 huatapica misionerocunataca Haití llajtamantami llujshichishpa cachashcacuna carca. Chaimantami chai llajtaman misionerocunataca ña mana cachashcacuna carca. Graduarishca quimsa semanacuna qꞌuipami Haití llajtapi carcanchij. Chaipica 35 huauqui panicunahuanmi shuj uchilla congregacionpi sirvicurcanchij. Chai congregacionca urcucuna chaupipimi carca. Ñucanchij chuscullami misionerocunapaj huasipi carcanchij. Jovenraj cashcamantami ima experienciataca mana charircanchij. Chai llajtapica gentecunaca huajchacunami carca. Achcacunacarin liyinallatapish mana yacharcacunachu. Chai llajtaman chayashca qꞌuipallami caparinacuicuna, gobiernopaj contra jatarishca gentecuna, jatun acapanacunapish tiyarca.

Haití llajtapi achca llaquicuna tiyajpipish huauqui panicunaca Jehová Diosta cꞌuyashcamantami huillashpa catircacuna. Shuj yuyajlla panica liyinataca mana yacharcachu. Shinapish paica 150 versocunatami de memoria yachaj carca. Huauqui panicunapaj alli ejemplota ricushpami achcata animarircanchij. Haití llajtapi achca llaquicuna tiyajta ricushpaca Diospaj Gobiernolla tucuita allichinatami yuyarircanchij. Chashnami ñuca huarmisitahuanca cushicuihuan alli huillaicunata huillashpa catircanchij. Ñucanchij punta yachacujcuna precursores regulares, precursores especiales, ancianocuna tucushcamantami achcata cushicunchij.

Haitipi sirvicushpaca Trevor shuti joventami rijsircani. Paica mormoncunapaj misioneromi carca. Paihuanca achca cutincunami Bibliamanta parlaj carcanchij. Huaquin huatacuna huashaca paica ñuca mana yuyashcapimi shuj cartata ñucaman cacharca. Chai cartapica paica: “Shamuj asambleapimi bautizarigrini. Haití llajtapi huillanamanmi tigrasha nini. Maipimi mormoncunapaj misionero carcani chai lugarllapitajmi precursor especial shina huillanaman risha nini” nishpami quillcashca carca. Paica achca huatacunatami paipaj huarmindij precursor especial shina sirvirca.

EUROPAMANTA AFRICAMANMI RIRCANCHIJ

Europapi tiyaj llajtacunapica huillangapajca mana tanto jarcaicunachu tiyarca. Chaimi Esloveniapi saquirij Liubliana nishca llajtapi huillachun ñucanchijta cacharcacuna. Ñuca yaya mamaca Liubliana cꞌuchullapimi huiñashcacuna carca. Qꞌuipaca Italia llajtapi causanamanmi rishcacuna carca. 1992 huatapica Yugoslavia llajtapica macanacuicunami tiyashpa catirca. Shinallataj Austriapi saquirij Betelmanta, Croaciapi saquirij Betelmanta, Serbiapi saquirij Betelmanta pushaj huauquicunaca Eslovenia y Yugoslavia llajtacunapi huillachunmi organizajcuna carca. Shinapish ñucanchijcuna Esloveniaman chayajpica cada llajtapi shuj Betel tiyachunmi nircacuna.

Eslovenia llajtapica mushuj shimita, mushuj culturatami yachana carcanchij. Chaipi causaj gentecunaca, “ñucanchij shimita rimanaca sinchimi can” nijcunami carca. Chaica ciertomi carca. Chai shimita yachanaca ñucanchijpajpishmi sinchi carca. Cada llajtapi shuj Betel tiyachun nijpica huauqui panicunaca chai cambiocunataca cushicuihuanmi chasquircacuna. Chaimi Jehová Dios paicunata bendiciacushcata ricurcacuna. Shinallataj minishtirishca horaspimi Jehová Dios cꞌuyaihuan cambiocunata rurashcata ricurcanchij. Esloveniapi saquirishca huatacunapica Jehová Dios ña yachachishcacunatami yuyarircanchij. Shinallataj paica ñucanchijmanca yachachishpami catirca.

Qꞌuipaca shujtaj cambiocunapishmi tiyarca. Huata 2000-pica Africapi saquirij Costa de Marfil llajtapi sirvichunmi cacharcacuna. Shinapish noviembre de 2002 huatapica chai llajtapica caparinacuicuna, macanacuicunami paicunapurapi tiyarca. Chaimi Sierra Leona llajtaman ñapish rina carcanchij. Chai llajtapica 11 huatacunata shuj guerra tiyashpami ña tucurishca carca. Jehová Dios ñucanchijman yachachishcacunata yuyarishpami cushicuihuan chai llaquicunata ahuantarcanchij.

Sierra Leona llajtapica achca gentecunaca Diosmantami yachacurcacuna. Ñucanchij huauqui panicunaca guerra tiyai horaspica achca llaquicunatami charishcarcacuna. Chaimi paicunaca pobrecuna carcacuna. Chashnapish paicuna imata charishca cosascunata shujtajcunamanmi convidasha nircacuna. Shuj panica ñuca huarmisita Debbimanmi churanata convidasha nirca. Shinapish Debbica mana chai churanata japisha nircachu. Mana chasquisha nijpimi chai panica: “Guerra tiyai punllacunapica shujtaj llajtacunamanta caj huauqui panicunami ñucanchijta ayudarcacuna. Cunanca ñucanchijpishmi ayudashun ninchij” nirca. Chaita ricushpami ñucapish, ñuca huarmipish paicuna shina cashun nircanchij.

Tiempo qꞌuipaca Costa de Marfilmanmi tigrarcanchij. Shinapish cutinmi chai llajtapica caparinacuicuna, macanacuicuna callarirca. Chaimantami noviembre de 2004 huatapica helicopteropi churashpa ashalla cosascunahuan shujtaj ladoman cacharcacuna. Chai tutapica Franciamanta soldadocuna tiyan lugarpimi samarina carcanchij. Cayandij punllaca Suiza llajtamanmi aparcacuna. Suizapi saquirij Betelmanmi chaipi tutapi chayarcanchij. Chaipica Comité de Sucursalpi sirvij huauquicunapish, Escuela de Entrenamiento Ministerialpi yachachij huauquicunapish, paicunapaj huarmisitacunapishmi cꞌuyaihuan ugllashpa ñucanchijta chasquircacuna. Paicunaca cunujlla micunata, mishqui chocolatecunatapishmi ñucanchijman curcacuna. Chashna chasquishcamantami cushicushpa huacarcanchij.

Suiza llajtamantaca Ghana llajtapi asha tiempota sirvichunmi cacharcacuna. Chai huashaca Costa de Marfilpi caparinacuicuna ña mana tiyajpimi cutin tigramurcanchij. Huauqui panicuna cꞌuyaita ricuchishcamantami tucui chai llaquicunata ahuantarcanchij. Cunancamami ñucapish, ñuca huarmisita Debbipish huauqui panicuna chashna cꞌuyaita ricuchishcamanta Jehová Diosta siempre agradicinchij. Chai llaquicunata chari horaspipish Jehová Diosca ñucanchijmanca valishca yachaicunatami yachachirca.

ASIAPI TIYAJ LLAJTACUNAPIPISHMI SIRVIRCANCHIJ

2006 huatapica Asiapi saquirij llajtacunapi sirvichunmi cacharcacuna. Chai llajtacunapica politicacunamanta, religioncunamantami achca jarcaicuna tiyarca. Chai llajtacunapica chꞌican chꞌican shimicunata, chꞌican chꞌican culturacunatami yachana carcanchij. Chꞌican chꞌican shimicunapi parlaj congregacioncuna tiyashcata, huauqui panicunapish tandalla cashcata ricushpami achcata cushicurcanchij. Chai huauqui panicunaca familia ucupi, escuelapi, trabajopi, comunidadpi chꞌican chꞌican jarcaicunatami charijcuna carca. Chashnapish mana manchashpami Diosta sirvishpa catircacuna.Chaita ricushpami achcata cushicurcanchij.

2012 huatapica Israelpi saquirij Tel Aviv llajtapimi shuj jatun tandanacuiman rircanchij. Huata 33-paj Pentecostés fiestapimi achcacuna tandanacurcacuna. Chai shinallatajmi 2012 huatapica chai jatun tandanacuipi achca gentecuna tandanacurcanchij. Chaipi canaca dimastij sumajmi carca.

Chai huatacunapica ñucanchijtaca jarcaicuna tiyan llajtata visitachunmi cacharcacuna. Chaimanca huauqui panicunapajmi publicacioncunata aparcanchij. Huauqui panicunahuanmi huillanaman, uchilla tandanacuicunamanpish rircanchij. Soldadocunaca achca armacunahuan tucui ladocunapimi siempre revisajcuna carca. Chaimantami achca cuidadota charircanchij. Huillangapaj, tandanacungapajpish uchilla grupocunapimi tandanacujcuna carcanchij.

AFRICAMANMI CUTIN TIGRARCANCHIJ

2013 huatapica Congopi saquirij Kinsasa llajtapaj Betelmanmi cacharcacuna. Chai llajtaca dimastij sumajmi carca. Shinapish chai llajtapica achca pobreza, guerracunapishmi tiyashca carca. Chaiman richun nijpica “Africataca allimi rijsinchij. Chaiman ringapajca listosmi canchij” nircanchijmi. Pero chai llajtapipish Jehová Diosca ñucanchijmanca valishca yachaicunatami yachachirca. Chai llajtapica carreteracuna, puentecuna mana tiyashcamantami viajanaca sinchi carca. Huauqui panicunaca cullqui illaj cashpapish cushicuihuanmi Diosta sirvijcuna carca. Huillanamanpish, tandanacuicunamanpish, jatun tandanacuicunamanpish ringapajmi esforzarijcuna carca. Jehová Dios bendiciashcamantami chai llajtapica achca gentecunaca Diosta sirvijcuna tucurcacuna. Chaicunata ricushpami achcata cushicurcanchij. Chai llajtapi tiyaj huauqui panicunapish ñucanchij familia shinami tucurcacuna.

2017 huatapica Sudafricapi caj Betelmanmi cacharcacuna. Chai sucursalca dimastij jatunmi can. Chaipica mushuj trabajocunatami pajtachina carcanchij. Chaipipish Jehová Diosca mushuj yachaicunatami ñucanchijman yachachirca. Shinallataj ña yachachishcacunata yuyarishpami chaicunata pajtachi tucurcanchij. 20, 30, 40 o ashtahuan huatacunata Diosta sirvij huauqui panicunatami achcata cꞌuyanchij. Betelpica chꞌican chꞌican culturacuna tiyajpipish Jehová Dios yachachishcamantami tandalla, cꞌuyaita ricuchinacushpa Diosta sirvishpa catinchij.

Ñucanchij causaipica ñucanchijmanca Jehová Diosca valishca ruraicunata pajtachichunmi mingashca. Chaimi mushuj culturacunata, chꞌican chꞌican shimicunatapish yachana carcanchij. Dios mingashcacunata pajtachinaca mana siempre facilchu cashca. Shinapish Jehová Diosca mana tucurij cꞌuyaitami ñucanchijman ricuchishca. Paica paipaj organizacionhuan huauqui panicunahuanpishmi ñucanchijta ayudashca (Salmo 144:2). Tiempo completopi Jehová Diosta sirvishcamantami valishca yachaicunata yachashcanchij.

Ñuca yaya mama alli ejemplota cushcamanta, ñuca huarmisita Debbipish ñucata ayudashcamanta, muyundij Allpapi caj huauqui panicunapish alli ejemplota cushcamantami achcata agradicini. Shamuj punllacunapipish Jehová Diosca ñucanchijmanca valishca yachaicunatami yachachishpa catinga. Chaicunata yachashpa catingapajmi listos canchij.