1925 huatapica ¿imataj tucurca?

PAICUNA SHUYACUSHCACA MANA PAJTARIRCACHU

1925 huatapica huauqui panicunaca cai Allpa Paraíso tucuchunmi shuyacurcacuna. Paicuna imamanta chaita shuyacushcataca Cuerpo Gobernantepi caj huauqui Albert Schroedermi yachachirca. Paica: “Ñucanchijcunaca 1925 huatapi ungidocuna jahua pachaman rinatami shuyacurcanchij. Shinallataj Abrahanpish, Davidpish, Diosta alli sirvijcuna Paraíso Allpapi causarishpa Diospaj pueblota ñaupajman alli pushana cashcatami yuyarcanchij” nircami. Caicuna mana pajtarishcata ricushpami huaquin huauqui panicunaca llaquilla, desanimado sintirircacuna (Proverbios 13:12).

Chashna desanimarishpapish achca huauqui panicunaca asha ashami Jehová Diosmanta huillana ashtahuan valishca cashcata intindi callarircacuna. Chaimantami paicunaca cushicuihuan Bibliamanta yachachishpa catircacuna. Ashtahuan caru lugarcunapi huillashpa catingapajcarin radiotami utilizarcacuna.

CHꞌICAN CHꞌICAN EMISORACUNAPIMI HUILLARCANCHIJ

1924 huatapica achca gentecunami WBBR nishca emisorata uyarcacuna. Chashna achca gentecuna Bibliamanta uyashcamantami Chicago llajta cꞌuchullapica shujtaj emisorata shayachircacuna. Chai emisorataca WORD nishpami shutichircacuna. Radiocunapaj emisoracunata rurashpa ayudaj Ralph Leffler ingenieroca cashnami nirca: “Tamya, chiri tutacunapimi hasta caru lugarcunapi caj gentecunapish radiota uyajcuna carca” nircami. Por ejemplo, shuj familiaca Alaska caru caru llajtapimi chai emisorata uyashcacuna carca. Emisora tucurishca huashami chai familiaca Bibliamanta alajata yachachishcamanta agradicingapaj shuj cartata quillcarcacuna.

1 de diciembre de 1925 huatapica inglés shimipimi WORD emisoramanta parlaj shuj revista llujshirca. Cai revistapica: “Estados Unidos llajtamanta tucui emisoracunata yalli alli señaltaca cai emisorami charin. Cai radiotaca Estados Unidospaj inti llujshin ladomanta callarishpaca inti huashicun Cuba llajtacamami uyai tucuncuna. Shinallataj cai emisorataca hasta Alaska llajtapaj janaj ladocamami uyai tucuncuna. Chashnami caru llajtapi causaj gentecunapish Diospaj Shimita uyashpa ashtahuan yachasha nincuna” nircami.

Chai punllacunallapitajmi Canadá llajtapi causaj huauqui panicunapish Dios cushca alli huillaicunataca radiopi huillanata munarcacuna. Chaimantami 1924 huatapica Canadallapitaj saquirij Saskatoon llajtapi CHUC nishca emisorata paicunallataj shayachircacuna. Chai emisorapimi punta cutin chai llajtapica Diosmanta huillaj carca. Shinapish 1925 huatapica chai emisora uyarishpa catichunmi shuj ashtahuan jatun huasita minishtircacuna. Pushaj huauquicunaca Regent Building nishca shuj teatro huasitami Saskatoon llajtapi randishcacuna carca. Chaimantami paicunaca chai teatro huasita charishcamanta chai emisoratapish randircacuna. Chai emisorata chaiman pasachingapajmi chai teatro huasitaca alajata allichircacuna.

Emisora tiyashcamantami achca gentecunaca Diospaj alli huillaicunamanta punta cutin uyarcacuna. Chai alli huillaicunataca Saskatchewanpaj carupi caj uchilla comunacunacamami uyajcuna carca. Por ejemplo, McKague uchilla comunapi causaj Graham shuti huarmimi chai emisorata uyashca carca. Chai huarmica emisorata uyashca huashami Bibliamanta publicacioncunata mañangapaj chai emisorapi trabajajcunaman quillcarca. Huauqui George Naishca: “Chai huarmi rato ayudachuntaj mañashcamantami Estudios de las Escrituras nishcata tucuita cacharcanchij” nircami. Asha tiempo qꞌuipacarin chai huarmica caru comunacunapipishmi Diospaj alli huillaicunata huillacurca.

BIBLIAPAJ YUYAICUNATAMI ASHTAHUAN ALLI INTINDIRCANCHIJ

Huauqui panicunaca Diablo demoniocunata mandacushcata, cai Allpapipish panda religioncunata, gobiernocunata, jatun empresacunatapish Diablo mandacushcataca allimi yacharcacuna. 1 de marzo de 1925 huatapimi inglés shimipica “Nacimiento de la nación” nishca revista llujshirca. Cai revistapimi “alli cazuj alli yuyaiyuj” huauquicunaca 1914 huatapi Diospaj Gobierno cielopi mandai callarishcatami intindichircacuna, jahua pachapipish shuj jatun macanacui tiyashcamanta Diablotapish, paita catij demoniocunatapish jahua pachamanta llujchishpa cai Allpaman shitashcatami intindichircacuna (Apocalipsis 12: 7-9). Shinallataj cai Allpapipish, jahua pachapipish Jehová Diosta sirvijcunaca tandalla paita sirvicushcatami intindichircacuna. Ashtahuancarin Diablopaj ruraicunapi mana chagrurina cashcata, millai gentecunatapish mana apoyana cashcatami yachachircacuna (Mateo 24:45).

Huaquin huauqui panicunapajca cai mushuj yuyaicunata intindinaca sinchimi carca. Chaimantami cai revistallapitaj: “Cꞌuyashca huauqui panicuna pi cai mushuj yachaicunahuan mana de acuerdo cashpaca pacienciata charichij, Jehová Diospi confiashpa paillata sirvishpa catichij” nishpami animarca.

Gran Bretañamanta Tom Eyre huauquica precursormi carca. Paica: “Apocalipsis 12-pi caj mushuj yachaita intindishpaca achca huauqui panicunaca cushicuihuanmi chasquircacuna. Shinallataj jahua pachapi Diospaj Gobierno mandacushcata intindishpa, Jehová Diospish shamuj punllacunapaj alli causaita apamunata intindishpami caicunamanta ashtahuan cushicushpa huillashpa catingapaj fuerzata japircanchij” nircami.

JEHOVAMANTA HUILLANA VALISHCA CASHCATAMI INTINDIRCANCHIJ

Isaías 43:​10-pica: ‘Cancunami ñuca testigocuna canguichij. Ari. Cancunaca ñucata sirvij, ñuca agllashcacunami canguichij’ ninmi. Ñaupa punllacunaca ñucanchij publicacioncunapica cai versotaca mana tanto utilizajchu carcanchij. Shinapish 1925 huatapica inglés shimipimi ña 11 revistacunapi Isaías 43:​10, 12-manta parlashca carcanchij. Shinapish cunan punllacunapicarin Isaías 43:​10-pi ima nishcataca allimi yachanchij.

1925 huatapaj agosto quilla ña tucuricujpimi huauqui panicunaca shuj jatun tandanacuita rurarcacuna. Cai jatun tandanacuitaca 8 punllacunatami Indianápolis llajtapi charircacuna. Huauqui panicunata alli chasquingapajmi huauqui Joseph Rutherfordca: “Cai jatun tandanacuimanca fuerzasta japingapaj, cushicushpa huillashpa catingapaj, animota chasquingapajpishmi shamushcanchij” nishpa cai jatun tandanacuipaj programapi quillcashca carca. Cai jatun tandanacuica maipi cashpapish Jehová Diosmanta huillashpa catichunmi animarca.

Sábado 29 de agostotaca huauqui Rutherfordca “Una llamada a la acción” nishca discursotami curca. Paica: “Jehová Diosca cashnatajmi nin: ‘Cancunami ñuca testigocuna canguichij. Ari. Cancunaca ñucata sirvij, ñuca agllashcacunami canguichij. Shinallataj pueblocunapaj shuj señalta churaichij’ ninmi” nircami (Isaías 43:12; 62:10). Cai shimicunata nishpami Jehová Dios paipaj espíritu santohuan paipaj pueblota pushacushcamanta ñucanchijlla shujtaj gentecunaman Jehová Diosmanta huillai tucushcata intindichirca.

Chai conferenciata cushca huashami huauqui Rutherfordca “Mensaje de esperanza” nishca shuj documentota liyirca. Chaipica Diospaj Gobiernolla alli causaita apamuna cashcatami nirca. Caicunataca huauqui panicunaca cushicushpami chasquircacuna. Cai documentotaca tratadota shina achca shimicunaman traducishpami imprimircacuna. Caimantaca 40 millones copiacunatapishmi llujchircacuna.

Chai tiempopajca huauqui panicunataca testigo de Jehovacunata shinaca manaraj rijsircacunachu. Chai shutita manaraj charishpapish Jehová Diosmanta huillana ashtahuan valishca cashcatami intindircacuna.

GENTECUNATA VISITASHPA CATINGAPAJMI ESFORZARIRCANCHIJ

Muyundij Allpapica achca huauqui panicunami mirarirca. Chashna mirarishcamantami achca gentecunaman alli huillaicunata huillarcacuna. “Mensaje de esperanza” nishca tratadotapishmi saquircacuna. Chaimantami Diospaj organizacionta ñaupajman pushaj huauquicunaca Boletín nishca pꞌangapi shuj instruccionta curcacuna.a Chaipica cushicuihuan alli huillaicunata chasquij gentecunata, Mensaje de esperanza tratadota chasquij gentecunatapish visitashpa catichunmi animarca.

Texas llajtamanta shuj huauquica: “Chai comunacunallapitaj cutin cutin predicajpica gentecunaca ashtahuan allimi Diospaj Shimitaca chasquincuna. Chaita ricushpami achcata cushicunchij. Por ejemplo, cai último diez huatacunapica cinco cutincunallami shuj comunapi huillanamanca rishcanchij. Ñuca mama pani Hendrixhuan chai comunallapitaj cutin predicanaman rijpica gentecunaca allimi chasquircacuna. Chaimi punta cutincunatapish yalli achca librocunata saquircacuna” nircami. Cai shimicunaca enero de 1925 huatapaj Boletín nishca pꞌangapimi llujshirca.

Panamá llajtamanta shuj precursorca: “Achca gentecunaca paicunaman punta cutin predicajpica mana uyasha nircacunachu. Shinapish paicunallatataj cutin cutin visitashpa catijpica allimi chasquircacuna. Paicunata cutin cutin visitashcamantami paicunaca Bibliamanta yachana munaita ashtahuan charishcacuna. Paicunapaj causaipi cambiocunata rurangapajpishmi esforzarishcacuna. Chaicunata ricushpami cai huatapica paicunata ashtahuan visitashpa catingapaj tiempota surcushcani” nircami.

ASHTAHUAN HUILLANGAPAJMI ESFORZARIRCANCHIJ

Huata 1925 tucuricujpimi huauqui Rutherfordca precursor huauqui panicunata huillashpa catichun alajata animarca. Paica: “Cai huatapica cancunaca llaquilla caj gentecunata cushichishpami cancunapish dimastij cushilla sintirishcanguichij. Shamuj huatapipish cushicuihuan huillashpa catichij. Cancunalla Diosta alli sirvijcuna cashcata, paipaj Gobiernollata apoyaj cashcatapish ricuchichij. Chaimanta cꞌuyashca huauqui panicuna tucuicuna tandalla ñucanchij Mandaj Jehová Diosllata cushicuihuan alabashpa catishunchij” nircami.

1925 huata tucuricujpimi Nueva York llajtapica Brooklynpi Betelpaj ashtahuan jatun huasicunata shayachinata yuyacurcacuna. Chaimi 1926 huatapica Betelpaj jatun huasicunata shayachi callarircacuna.