Jehovapaj cꞌuyaica huiñaipajmari

1, 2. ¿Ñucanchijcuna llaquicunata charishpaca ima shinataj sintirinchij?

SHUJ barco jatun mama cuchapi cajta yuyai. Ñapish sinchi huaira jatarishpa yacuta caiman chaiman cuyuchishpami barcota caiman chaiman apasha nin. Chaimi barcota pushajcunaca huaira barcota ama apashpa richunca barcota charicuj fierrota yacuman shitancuna. ¿Cai ejemplomantaca imatataj yachai tucunchij?

² Ñucanchijca ima llaqui manaraj japijpica Jehová Dios cꞌuyashcata, ayudacushcatami seguros canchij. Shinapish llaquicuna japijpica yacu huajtajpi barco caiman chaiman rij shinami ñucanchijpish caita chaita yuyai callarinchij. Chaimi Jehová Dios ñucanchijta mana cꞌuyashcata ñapish yuyai callarinchijlla (Salmo 10:1; 13:1). Shinallataj shuj amigo animachij shimicunata nijpica cutinmi asha tiempota alli sintirinchij (Proverbios 17:17; 25:11). Shinapish qꞌuipaca Jehová Dios mana cꞌuyashcata yuyashpami cutin tigra llaquirinchij. Pero ¿Jehová Dios canta cꞌuyashcata, canta ayudashcata seguro cangapajca imatataj rurana cangui?

3. ¿Salmo 31:7 y 136:​1-pica Diospaj cꞌuyaimantaca imatataj yachachin? (Fotomantapish parlapai).

³ Ima shinami barco caiman chaiman ama cuyurichun barcota chariraj fierrota yacuman shitan. Chai shinallatajmi caita chaita ama yuyangapajca Jehová Dios mana tucurij cꞌuyaita ñucanchijman ricuchishcata yuyarina canchij (Salmo 31:7; 136:​1-ta liyipai). Jehová Diosca ñucanchijta “mana tucurij cꞌuyaihuan” cꞌuyashcamantami ñucanchijtaca mana nunca saquinga. Bibliapi nishca shinaca paica yallitaj cꞌuyaj, jatunta llaquijmi can (Éxodo 34:​6, 7; Salmo 86:5). Chaimantami llaquicuna japijpipish Jehová Dios ñucanchijta cꞌuyashcata yuyarina canchij. Chaita yuyarishpami ñaupajman cati tucushun (Salmo 23:4).

BIBLIAPIMI DIOS CꞌUYAJ CASHCATA CUTIN CUTIN YACHACHIN

4. a) ¿Bibliata yachai callarishpaca imacunallatataj yacharcangui? b) ¿Maijanpish chai yachashcacunaca mana ciertochu can nijpica imamantataj mana jahualla cringuiman?

⁴ Bibliapi can imacunallata yachai callarishcata yuyari. Bibliata estudiashpaca Diospaj shuti Jehová cashcata, Jesús Diospaj shujlla Churi cashcata, huañushcacunapaj alma ña mana causashpa catishcata, cai Allpa shuj Paraíso tucuna cashcata, gentecuna huiñai huiñaicama Paraíso Allpapi causana cashcatapishmi yachashcangui (Salmo 83:18; Eclesiastés 9:5; Juan 3:16; Apocalipsis 21:​3, 4). Chꞌican chꞌican versocunapi chaita alli yachashcamantami chai callari yachashcacunapica tucui shunguhuan cringui. Chaimantami maijanpish chai yachashcacunaca mana ciertochu can nijpica mana jahualla cringuiman. Chai shinallatajmi Bibliapaj chꞌican chꞌican versocunapica Jehová Dios canta de verdadtaj cꞌuyashcata yachachin. Chaitapishmi Bibliata yachai callarishpa yacharcangui. Chaimantami Bibliamanta callari yachashcacunapi tucui shunguhuan crij shinallataj Jehová Dios canta cꞌuyashcapipish tucui shunguhuan crina cangui. Bibliata imata yachachishcata yuyarishpami Diosca ñucata mana cꞌuyanchu, ñucamanta mana preocuparinchu nishpaca ña mana ashtahuan yuyangui.

5. ¿Panda crishcacunata saquingapajca imatataj rurarcagui?.

⁵ Canca Bibliata manaraj estudiashpaca Jesús, Dios cashcatachari tucui shunguhuan crij carcangui. Chaimantachari chaita crinata saquinaca cambajca sinchi carca (2 Corintios 10:​4, 5). Shinapish ¿chaita crinata saquingapajca imatataj rurarcangui? Bibliapaj chꞌican chꞌican versocunata alli estudiashpami Jesús mana Dios cashcata yachaj chayarcangui. Ashtahuanpish Dios tucui imalla rurashcacunamanta Jesús punta Churi cashcata, Diospaj shujlla Churi cashcatami alli intindircangui (Colosenses 1:15; Juan 3:18). Chashnallatajmi Bibliapaj chꞌican chꞌican versocunata alli yachashcamantaca shujtaj panda crishcacunatapish saquircangui. Cunancarin Biblia yachachishcacunata alli yachashcamantami chai panda crishcacunahuanca pi ñucanchijta mana umai tucun (Filipenses 3:13).

6. Salmo 136-pica: ‘Jehovapaj cꞌuyaica huiñaipajmari can’ ninmi. ¿Chai Salmopi chai shimicunata cutin cutin ricushpaca imapitaj tucui shunguhuan cringui?

⁶ ¿Llaquicunata charishpa Dios mana cꞌuyashcata yuyai callarishpaca imatataj rurana cangui? Puntapica ciertotajchu Diosca ñucata mana cꞌuyan nishpami tapurina cangui. Chai qꞌuipaca Dios canta cꞌuyashcata o mana cꞌuyashcata yachangapajca Bibliapimi ricuna cangui. Por ejemplo, cai yachaipaj versopimi yuyana cangui. Chai Salmo 136:​1-pica: ‘Jehovapaj cꞌuyaica huiñaipajmari can’ ninmi. Ashtahuancarin cai shimicunaca Salmo 136-pica 26 cutincunami quillcashca can. ¿Cai tucui versocunata ricushpaca imatataj tucui shunguhuan crina cangui? Caipi yuyai. Jesús Dios cashcata crishpapish qꞌuipaca Bibliapaj yachaicunata cutin cutin ricushpami chaita crinata saquircangui. Chai shinallatajmi maipica Jehová Dios canta mana cꞌuyashcata yuyangui. Shinapish Jehová Dios paipaj pueblota cꞌuyaj cashcata Bibliapi cutin cutin ricushcamantami Jehová canta cꞌuyashcatapish tucui shunguhuan crina cangui.

7. ¿Jehová Dios canta cꞌuyashcata seguro cangapajca maijan versocunallatataj ricui tucungui?

⁷ Jehová Dios ñucanchijta cꞌuyashcataca Bibliapaj achca versocunapimi yachachin. Jesús ima nishcapi yuyashunchij. Paica paipaj discipulocunataca: “Cancunacarin cai tucui uchilla pajarocunatapish yalli valishcamari canguichij” nircami (Mateo 10:31). Dios ñucanchijta cꞌuyashcata mana seguro cashca cashpaca Jesusca: “Cancunaca cai tucui uchilla pajaritocunatapish yalli valishcachari canguichij” nishpami yachachinman carca. Shinapish Jesusca Dios ñucanchijta cꞌuyaj cashcataca seguromi carca. Jehová Diosllataj ima nishcapipish yuyashunchij. Paica paita sirvijcunataca: “Ñucami canman fuerzata cuj Taita Dios cani. Cantaca ayudacushallami. Ñuca alli maquipi cashcata rurajhuanmi cantaca charirasha” nircami (Isaías 41:10). Jehová Diosca paita sirvijcunata mana cꞌuyashca cashpaca mana chaita ninmanchu carca. Ashtahuanpish ñucanchijta cꞌuyashcamantami cancunataca ayudashami nirca. Chaimantami Jehová Dios canta mana cꞌuyashcata yuyai callarishpaca cai animachij versocunata yuyarina cangui. Can ima shina sintirishcatapishmi Jehová Diosman huillana cangui. Chaicunata rurashpaca canpish punta siglopi causaj Diosta sirvijcuna shinami ni tucungui. Paicunaca: “Ñucanchijca Dios cꞌuyashcatami yachaj chayashcanchij, chaitami crishcanchij” nircacunami (1 Juan 4:16).a

8. ¿Jehová Dios canta mana cꞌuyashcata yuyashpa catishpaca imatataj rurana cangui?

⁸ ¿Jehová Dios canta mana cꞌuyashcata yuyashpa catishpaca imatataj rurana cangui? Cambaj yuyaicuna maipica panda cashcatami yuyarina cangui. Cutin Biblia nishcacuna mana llulla cashcatami alli yuyarina cangui. Bibliapica Jehová Dios cꞌuyaj cashcata, cantapish de verdadtaj cꞌuyashcatami yachachin (1 Juan 4:8). Chai yachachishcacunaca mana llullachu. Chaimantami Dios canta mana cꞌuyashcata yuyashpa catishpaca Biblia mana llulla cashcata yuyarina cangui.

“ÑUCA YAYACA CANCUNATAPISH CꞌUYAN”

9, 10. ¿Juan 16:​26, 27-pi Jesús nishcacunamantaca imatataj yachai tucungui? (Fotomantapish parlapai).

⁹ Jesusca paita catijcunataca: “Ñuca Yayaca cancunatapish cꞌuyan” nircami (Juan 16:​26, 27-ta liyipai). ¿Jesusca imamantataj chaita nirca? ¿Paita catijcunata cushichisha nishpallachu chaita nirca? Mana. Ashtahuanpish Jesusca Diosta mañanamantami parlacurca. Jesús imata yachachisha nishcata alli intindishpami Jehová canta de verdadtaj cꞌuyashcata seguro cangui.

¹⁰ Jesusca paita catijcunahuanmi alli apanacushca carca. Chaimantami paicunaca Jesús causarishca huashaca Jesusca ñucanchijtaca achcatami cꞌuyan. Paimi ñucanchij mañashcacunataca uyangalla, chai qꞌuipaca paipaj Yayamanmi ñucanchij mañashcacunata pasachingalla nishpa yuyanman carcacuna (Juan 16:​23, 24). Shinapish paicuna ama chashna yuyachunmi pai manaraj huañushpa Jesusca chai punllaca ‘ñuca’ Yayatami ñuca shutipi mañanguichij. Shinapish cancunamanta ñucallataj mañana cashcataca mana nicunichu nirca. Ashtahuancarin Jesusca ñuca Yayaca cancunatapish cꞌuyashcamantami paillataj cancuna mañashcacunataca uyangalla nishpami yachachirca. Chaita yachashcamantami Jesusta catijcunaca Dios paicunapaj mañashcacunata cꞌuyaihuan uyanatapish seguros carcacuna. Canpish paicuna shinallatajmi Jesusta rijsishcamanta, paita cꞌuyashcamantaca Jesusta catij tucushcangui (Juan 14:21). Shinapish Bibliapica cutin cutinmi Dios ñucanchijta cꞌuyaj cashcata, ñucanchij mañashcacunata uyaj cashcatapish yachachin. Chaita yachashpami canpish Jehová Diosllata mañana cashcata alli intindishcangui. Shinaca ¿Jesús nishcacunamantaca imatataj yachai tucungui? Jehová Diosca canta achcata cꞌuyashcamantami can mañashcacunata uyangapaj listo can. Chaita siempre yuyarishpami Jehová Dios canta de verdadtaj cꞌuyashcata seguro cangui (1 Juan 5:14).

¿IMAMANTATAJ JEHOVÁ MANA CꞌUYASHCATA YUYAI CALLARINCHIJ?

11. ¿Diabloca Diospaj cꞌuyaita mana charishcamantaca imatataj ñucanchijtapish crichisha nin?

¹¹ Jehová Diosca ñucanchijta achcata cꞌuyashcamantami paipaj Churita cushpa quishpichirca (Hebreos 2:9). Cutin millai Diabloca Diospaj cꞌuyaitaca mana charinchu. Chaimantami Diabloca shuj león huacaricuj shina ñucanchijta millpusha nin. Ñucanchijta pandachingapajca juchayujcuna cashcamanta Jehová ñucanchijta mana cꞌuyashcata, mana quishpichisha nishcatami crichisha nin (1 Pedro 5:8; Efesios 6:11). Caita yuyai. ¿Shuj llaqui japijpi Dios mana cꞌuyashcata yuyashpa yallitaj llaquilla saquirijpica pitaj cushicun? Millai Diablomi cushicun. Paimi chashna yuyachun pandachisha nin. Caita intindishpaca Diablopaj contra shayarishpami pandachichunca manataj saquina canchij (Santiago 4:7).

12, 13. ¿Jehová Dios ñucanchijta mana cꞌuyashcataca imamantataj ñapish yuyai callarinchijlla?

¹² Juchaca cai pachaman yaicushpaca Diosmantami caruyachirca. Juchayujcuna tucushcamantami mana alli yuyaicunata, mana alli munaicunata, ungüicunatapish chari callarircanchij. Chaimi maipica mana munashpapish Jehová Dios ñucanchijta mana cꞌuyashcata ñapish yuyai callarinchijlla (Salmo 51:5; Romanos 5:12).

¹³ Juchapi urmashpaca culpables, llaquilla, manchaihuan, pingaihuanmi sintirinchij. Shinapish ¿juchapi mana urmashpapish imamantataj maipica Dios ñucanchijta mana cꞌuyashcata ñapish yuyai callarinchij? Jehová Diosca ñucanchij punta yaya mamataca jucha illajtami rurarca. Shinapish juchaca cai Allpaman yaicushpami ñucanchijtaca Jehová Diosmanta caruyachirca. Chaimi juchayujcuna cashcamantaca ñapish desanimachij yuyaicunata rato charinchijlla (Romanos 8:​20, 21). Caipi yuyashun. Shuj carropaj llanta bajarishpaca llanta bajarishca ladollamanmi carroca atishpa risha ninlla. Chaimi ñucanchij maita pushasha nishcata apanaca sinchi can. Chai shinallatajmi juchapish Dios mana cꞌuyashca yuyaicunahuan ñucanchijta atichisha ninlla. Chaimi chai yuyaicunamanta jarcarinaca ñucanchijpajca sinchi can. Shinapish chashna ama yuyangapajca Jehová Dios paita cꞌuyajcunamanpish, paita cazujcunamanpish mana tucurij cꞌuyaita ricuchij cashcatami yuyarina canchij (Nehemías 1:5).

14. ¿Ñucanchijcuna juchayuj cajpirajca Jehová Diosca imatataj rurarca? (Romanos 5:8) (“Pandachij yuyaicunamanta jarcarishunchij” nishca recuadrotapish ricui).

¹⁴ Juchayujcuna cashcamantami ñucanchijcuna Diospaj cꞌuyaita charingapajca imata mana rurai tucunchijman. Shinapish Jehová Diosca ñucanchijcuna juchayuj cajpirajmi ñucanchijta achcata cꞌuyashcamanta paipaj shujlla Churita ñucanchijmanta huañuchun curca (1 Juan 4:10). Shinallataj Jesusca juchayujcunamanta huañungapajmi shamurca (Romanos 5:​8-ta liyipai). Chaimantami Jehová Diosca ñucanchijcuna imapi ama pandarichunca mana shuyan. Paica ñucanchijcuna pandarijlla cashcataca allimi intindin. Jehová Dios ñucanchijta yallitaj cꞌuyashcata intindishcamantami achcata cushicunchij. Chaimi ñucanchij panda yuyaicunata mishangapajca tucui shunguhuan esforzarina canchij (Romanos 7:​24, 25).

DIOSMANTA AMATAJ CARUYASHUNCHIJ

15, 16. ¿Llaquicunahuan cashpapish imatataj mana cungarina canchij? (2 Samuel 22:26).

¹⁵ Sinchi huaira jatarishpa, yacuta cuyuchishpa, barcota caiman chaiman apaj shinami maipica sinchi llaquicunata charinchij. Chashnapish Jehová Diosca paimanta amataj caruyachunmi munan (Deuteronomio 30:​19, 20). Jehová Diosmanta mana caruyajpica paica mana tucurij cꞌuyaita ricuchishpami ñucanchijtaca manataj saquinga (2 Samuel 22:​26-ta liyipai).

¹⁶ Llaquicunata charishpaca maipica Dios ñucanchijta mana cꞌuyashcatami yuyai callarinchij. Chaimantami llaquicunahuan cashpaca barcota chariraj fierrota shitaj shina Jehová Dios ñucanchijta cꞌuyaj cashcata, ayudaj cashcatapish yuyarina canchij. Bibliapipish Diospaj cꞌuyai huiñaipaj cashcatami cutin cutin yachachin. Chaimantami Dios ñucanchijta cꞌuyashcata, tucui shunguhuan cringapaj, amataj cungaringapajpish esforzarina canchij.