‘Espiritupajta yuyashpaca cushillami causashun’

1, 2. ¿Romanos capítulo 8-pica ungidocunamantaca imatataj nin?

JESÚS huañushcata yuyaringapaj tandanacushpaca Romanos 8:15-17 versocunatachari leyircanchij. Cai versocunapica jahua pachaman rigrijcunata Jehová Dios paipaj espirituhuan agllashcatami huillan. Chashnami huaquin huauqui panicunaca ungidocuna cashcata yachancuna. Shinallataj Romanos 8:1-pica ungidocunaca ‘Jesushuan shujlla cajcunami’ ninmi. Pero ¿Romanos capítulo 8-pi ima nishcataca ungidocunallachu pajtachina can? ¿Manachu cai Allpapi causagrijcunapish pajtachina can?

² Romanos capítulo 8-taca ungidocunapajmi Diosca quillcachirca. Cai capitulopica ungidocunaca espirituta chasquishca qꞌuipaca paicunapaj aicha cuerpota saquishpami Diospaj huahuacuna tucunata shuyacuncuna ninmi (Romanos 8:23). Jesús huañushcamantami Diosca paicunapaj juchacunata perdonashca. Paipaj ñaupajpipish cashcata rurajcunami tucushcacuna. Chaimantami ungidocunaca jahua pachapi causarishpa Diospaj huahuacuna tucungacuna (Romanos 3:23-26; 4:25; 8:30).

3. ¿Imamantataj cai Allpapi huiñaita causanata shuyajcunapish Romanos capítulo 8-ta yachana can?

³ Romanos capítulo 4-pica Pabloca Abrahammantami parlarca. Jesús ñucanchijmanta manaraj huañujpimi Abrahamca ña causarca. Abraham mana ungido cajpipish Jehová Diosca ‘Abrahamca cashcata ruraj runami can’ nircami (Romanos 4:20-22-ta leyipai). Cunan punllacunapish Abraham shinami achca Diosta servijcunaca cai Allpapi huiñaita causanata shuyacuncuna. Paicunapish Jehová Diospaj ñaupajpica alli ricuri tucuncunami. Romanos capítulo 8-pi tiyaj consejocunaca paicunatapish ayudai tucunmi. Chaimantami chai capitulomanta yachana can.

4. ¿Romanos 8:21-ta leyicushpaca imatataj tapurina canchij?

⁴ Romanos 8:21-pica Jehová Diosca paita servijcunataca juchamanta huañuimantami quishpichinga. Paicuna ‘Diospaj huahuacuna cashcamantami sumajyachishpa cacharichishcacuna canga’ ninmi. Chaimantami paicunaca paraisopi sumajta causangacuna. Romanos 8:21-ta leyicushpaca “¿ñucapish paraisopi cashashu?” nishpami tapurina canchij. Cunanca paraisopi causangapaj imata rurana cashcata ricushun.

¿“AICHAPAJ MUNAITA YUYANACA” IMATATAJ NISHA NIN?

5. ¿Romanos 8:4-13-pica Pabloca ima laya gentecunamantataj parlarca?

⁵ (Romanos 8:4-13-ta leyipai). Romanos capítulo 8-pica Pabloca ishqui laya gentecunamantami parlarca. Paica ‘huaquincunaca aicha munaita rurajcunami can. Cutin shujtajcunaca espiritupaj munaita rurajcunami can’ nircami. Chashna nishpaca ¿Pabloca Diosta servijcunamantapish Diosta mana servijcunamantapishchu parlacurca? Mana. Paica ‘jucha illaj cachun cayashca crijcunamanmi’ cai cartata quillcarca (Romanos 1:7). Aicha munaita rurajcunapish espiritupaj munaita rurajcunapish Diosta servijcunami carca. Pero ¿imamantataj paicunaca chꞌican chꞌican shina ricurircacuna?

6, 7. a) ¿Bibliapica aicha nishpaca imatataj nisha nin? b) ¿Pabloca “aichallamanta cajcuna” nishpaca picunamantataj parlacurca?

⁶ Bibliapica ‘aichamanta’ parlashpaca huaquin yuyaicunatami nin. Huaquinpica gentepaj cuerpomantami parlan (Romanos 2:28; 1 Corintios 15:39, 50). Mana cashpaca familiapura cashcamantami parlan. Por ejemplo Bibliapica: ‘Jesusca aichamantaca Davidpaj huahua huahuamantami carca’ ninmi. Pablopish: ‘Judiocuna aichamanta ñuca familiami can’ nircami (Romanos 1:3; 9:3).

⁷ Romanos 8:4-13-pica Pabloca huaquincunaca ‘aichallamanta cajcunami’ can nircami. Chashna nishpaca ¿picunamantataj Pabloca parlacurca? Caita alli entendingapajca Pablollataj ima nishcata yuyarishun. Paica: ‘Aicha munaita rurashpa ñaupa causacujpica, ñucanchij aichapi imalla tiyajcunaca juchacunatami rurachicurca’ nircami (Romanos 7:5, QC, 1989). Ima shinami ricushcanchij ‘aichallamanta cajcunaca’ mapa munaicunamanta mana jarcarishpa paicuna munashca shina causaj gentecunami can.

8. ¿Pabloca imamantataj ungidocunataca aicha munaita ama rurashpa causanguichij nirca?

⁸ ¿Pabloca imamantataj ungidocunataca ‘aicha munaita ama rurashpa causanguichij’ nirca? Ungidocuna cashpapish mana ungidocuna cashpapish mana cuidarishpaca aicha munaicunatami rurai callarishun. Por ejemplo, Roma llajtamanta huaquin huauquicuna panicunaca paicunapaj munaitami rurashpa causarcacuna. Paicunaca, cꞌarihuan o huarmihuan chayarinata munashpalla, micushpalla, paicunapaj munashcata rurashpallami causajcuna cashcanga (Romanos 16:17, 18; Filipenses 3:18, 19; Judas 4, 8, 12). Corinto llajtapica, shuj huauquica paipaj “yayapaj huarmihuanmi” juchata rurashpa causacurca (1 Corintios 5:1). Chaita ricushpami Pabloca ‘ama aichapaj munaita rurashpa causanguichijchu’ nirca (Romanos 8:5, 6). Ñucanchijpish Pablopaj consejotami catina canchij.

9. ¿Romanos 8:6-ta leyishpaca imatataj mana yuyana canchij?

⁹ Cunan punllacunapipish Pablopaj consejotami cazuna canchij. Achca huatacunata Diosta servicushpapish mana cuidarishpaca aicha munaitami rurai callarishun. Pero Romanos 8:6-ta leyishpaca micuna, pugllana, trabajana, cusa huarmi cꞌuyanacuna mana alli cashcataca mana yuyanachu canchij. Tucuicunami chashna causanchij. Jesuspish micushpa, shujtajcunamanpish carashpami cushicurca. Huaquinpica samarinatami minishtirca. Ashtahuanpish Pabloca cusa huarmi chayarinaca allimi can nircami.

10. ¿Pabloca ‘aichapaj munaita yuyana’ nishpaca imatataj nisha nirca?

¹⁰ ¿Pabloca ‘aichapaj munaita yuyana’ nishpaca imatataj nisha nirca? Pabloca maijanpish imata munashpa, chaita ima shina charinata yuyashpalla causaj cashcatami nisha nirca. Shuj yachaj runapish cashnami nirca: “Pabloca aichapaj munaita yuyana nishpaca paicunallapi yuyashpa causajcunamanta, shujtajcunaman paicunallamanta parlashpa, paicuna munashcallata rurashpa causajcunamantami parlacurca” nircami.

11. ¿Mana cuidarishpaca imacunapitaj ashtahuan yuyai callarishun?

¹¹ Roma llajtamanta Diosta servijcunaca aichapaj munaita ruracushcata o espiritupaj munaita ruracushcatami ricuna carca. Ñucanchijpish imata ashtahuan yuyacushcatami ricuna canchij. Chaipajca ¿imacunamantataj ashtahuan parlanata munani? ¿imatataj ashtahuan ruranata munani? nishpa tapuri. Chaita tapurishpami huaquincunaca chꞌican chꞌican cosascunata yuyacushcata ricushcacuna. Por ejemplo, shujcunaca tucui laya vinocunatami ubyanata yuyacushcacuna. Shujtajcunaca huasita allichinata o ropata randinatami yuyacushcacuna. Cutin shujtajcunaca ashtahuan cullquita charinapaj imata ruranata o paseanaman rinatami yuyacushcacuna. Caicunata yuyanaca mana juchachu can. Tucuicunami chaita yuyanchij. Por ejemplo, vinomanta parlashpaca Jesusca yacutami vinota rurarca. Pablopish Timoteotaca: ‘Huijsa nanaihuan ungushca cashcamanta asha vinota ubyangui’ nircami (1 Timoteo 5:23; Juan 2:3-11). Pero Jesuspish Pablopish mana vinollapi yuyashpa causarcacunachu. ¿Ñucanchijca? ¿Imapitaj ashtahuan yuyashpa causanchij?

12, 13. ¿Aichapaj munaita rurashpalla causashpaca imashi tucushun?

¹² Pabloca: “Aichapaj munaita yuyanaca huañuimanmi apan” nircami (Romanos 8:6). Aichapaj munaita rurashpalla causashpaca Diosmanta caruyashunmi, huiñai causaitapish mana charishunchu. Pero aicha munaita ruranamantaca jarcari pudinchijmi. Chashna causacushpapish cambiai pudinchijmi. Por ejemplo, párrafo 8-pi parlashca huauquitaca juchata rurashcamantami congregacionmanta llujshichirca. Pero paica mapa causaita saquishpami Diosta cutin alli servi tucurca (2 Corintios 2:6-8).

¹³ Cai huauquica aichapaj munaita rurashpa causashcamanta jatun juchapi urmashpapish cambiarcami. Cunan punllacunapish shuj huauqui o pani paipaj munaita rurashpa causai callarishpapish cambiai pudinmi. Paica Pablopaj consejota yuyarishpami cambiangapaj fuerzasta charinga.

¿‘ESPIRITUPAJTA YUYANACA’ IMATATAJ NISHA NIN?

14, 15. a) ¿Aichapaj munaita yuyashpa causanapaj randica imapitaj yuyashpa causana canchij? b) ¿Romanos 8:6-ta leyishpaca imatataj mana yuyana canchij?

¹⁴ Aichapaj munaita yuyashpa causanamanta parlashca qꞌuipaca Pabloca: ‘Espiritupajta yuyashpami causana canguichij. Chashna causashpaca alli, sumaj causaitami charinguichij’ nircami. ¿Manachu chashna causanaca sumaj canga?

¹⁵ Romanos 8:6-pica: ‘Espiritupajta yuyashpami causana canguichij’ ninmi. Shinapish caita leyishpaca Jehová Diosllapi, Bibliallapi punlla entero yuyashpa causana cashcataca mana yuyanachu canchij. Por ejemplo, Jesusta punta catijcunaca tucui gentecuna layami causarca. Paicunaca trabajashpa, micushpa, ubyashpa, cazarashpa, huahuacunata charishpami causarcacuna (Marcos 6:3; 1 Tesalonicenses 2:9).

16. ¿Pabloca imatataj ashtahuan rurashpa causarca?

¹⁶ Pablopish shujtaj crijcunapish mana trabajashpalla, micushpalla, ubyashpallachu causarcacuna. Por ejemplo, Pablo carpa huasicunata rurashpa trabajashpapish mana trabajashpallachu causarca. Ashtahuanpish Jehová Diosta servishpami causarca. Chaimantami Diospaj Shimita huillashpa, yachachishpa purirca (Hechos 18:2-4; 20: 20, 21, 34, 35-ta leyipai). Roma llajtamanta crijcunapish Pablopaj ejemplotami catina carca. Ñucanchijpish Pablopaj ejemplotami catina canchij (Romanos 15:15, 16).

17. ¿‘Espiritupajta yuyashpaca’ ima shinataj causashun?

¹⁷ Espiritupajta yuyashpaca ‘alli, sumajtami causashun’ (Romanos 8:6). Dios ñucanchij yuyaita pushachun saquishpa, pai shina yuyanata yachashpaca espiritupajta yuyashpa causacushcatami ricuchinchij. Caita rurashpaca cunan punllacunapi cushillami causashun, shamuj punllacunapipish huiñai causaitami charishun.

18. ¿Espiritupajta yuyashpaca imamantataj sumajta causai pudinchij?

¹⁸ Apóstol Pabloca: ‘Espiritupajta yuyanaca sumaj causaimanmi apan’ nircami. Cunan punllacunapica asha gentecunallami sumajta causancuna. Pero ñucanchijca ¿espiritupajta yuyashpaca imamantataj sumajta causai pudinchij? Jehová Dios ayudashcallamantami sumajta causai pudinchij. Espiritupajta yuyashpaca ñucanchij familiahuan, congregacionpi huauqui panicunahuanpish sumajtami causashun. Pero juchayujcuna cashcamantami huaquinpica ñucanchij huauquicunahuan panicunahuan pꞌiñanacunchij. Chaipimi Jesús ima nishcata yuyarina canchij. Paica: ‘Cambaj huauquihuan alli tucunami cangui’ nircami (Mateo 5:24). Congregación ucupi tucuicuna ‘sumaj causaita cuj Diosta’ servicushcataca amataj cungarishunchijchu (Romanos 15:33; 16:20).

19. ¿Espiritupajta yuyashpaca ima shujtaj bendiciontataj charishun?

¹⁹ ¿Espiritupajta yuyashpaca ima shujtaj bendiciontataj charishun? Espiritupajta yuyashpaca “Dioshuanmi sumaj causaita charinchij”. Profeta Isaiasca: ‘Diosca paipi shunguta churajcunataca cuidangami, huiñaipajmi sumaj causaita cunga’ nircami (Isaías 26:3; Romanos 5:1-ta leyipai).

20. ¿Romanos capítulo 8-pi tiyaj consejocunata cazushpaca imatataj charishun?

²⁰ Jahua pachapi causanata shuyajcunapish cai Allpapi causanata shuyajcunapishmi Romanos capítulo 8-pi tiyaj consejocunata cazuna can. Paipaj Shimihuan ñucanchij munaita huashaman saquichun ayudashcamanta, paillata servichun animashcamantami Jehová Diosta pagui ninchij. Espiritupajta yuyashpa causashpaca ‘Mandaj Cristo Jesusmantami huiñai causaita’ charishun (Romanos 6:23).