Ñucanchijllataj decidichun saquishcamanta Diosta pagui nishun

1, 2. a) ¿Decidinamantaca gentecunaca imatataj nincuna? b) ¿Decidinamantaca Bibliapica imatataj yachachin? c) ¿Cai temapica ima tapuicunamantataj yachashun?

SHUJ huarmica shuj decisiontami japina carca. Chaita rurana cashcamantami paipaj amigotaca cashna nirca: “Ñucallataj decidinataca mana munanichu, ñuca imata ruranata decidishpa cui” nircami. Cai huarmica paillataj decidinapaj randica shujtajcuna decidishpa cuchunmi munarca. Jehová Diosca cada uno imata ruranata decidichunmi rurashca. ¿Ñucanchijca? ¿Ñucanchijllataj decidinchijchu o shujtajcuna decidishpa cuchunchu shuyanchij? ¿Decidinamantaca ima cˈhican cˈhican yuyaicunataj tiyan?

² Huaquin gentecunaca ñucanchijllatajca mana decidi tucunchijchu, Diosmi imata ruranata ña destinashca nincunami. Shujtajcunaca ñucanchijllatajmi imatapish agllana canchij, pipish imata mana ninachu can nincunami. Bibliapica, Diosca huaquin cosascunata ñucanchijllataj alli yuyashpa agllachunmi rurashca ninmi (Josué 24:15-ta leyipai). Shinallataj Bibliaca cai tapuicunamantami yachachin: Jehová Dios ñucanchijllataj decidichun saquijpipish ¿tucui ñucanchij munashcatachu decidi pudinchij? ¿Ima shinataj decidina canchij? ¿Ñucanchij decisioncunahuanca ima shinataj Diosta cꞌuyashcata ricuchishun? ¿Shujtajcuna imata decidijpipish imatataj rurana canchij? Cai temapica cai tapuicunamantami yachashun.

¿JEHOVAPISH JESUSPISH IMA SHINATAJ DECIDINCUNA?

3. ¿Diosca ima shinataj decidin?

³ Jehová Diosllami tucuita decidi tucun. Pai ima shina decidij cashcata yachashun. Jehová Diosca tucui llajtacunamanta ‘ashtahuan alli pueblo cachunmi israelitacunataca agllarca’ (Deuteronomio 7:6-8). Abrahamman cusha nishcata pajtachingapajmi chashna rurarca (Génesis 22:15-18). Jehová Diosca cꞌuyaihuanmi imatapish alli ruran. Por ejemplo, israelitacuna pandarijpica Jehová Diosca cꞌuyaihuanmi disciplinarca. Juchata rurashca qꞌuipa shungumanta arrepintirijpica paicunataca llaquishpami perdonaj carca. Chaimantami israelitacunataca: ‘Cancuna cꞌariyashcataca ñucami alliyachisha. Ñuca munashcamantami cancunata cꞌuyasha’ nircami (Oseas 14:4). Ima shinami ricunchij, Jehová Diosca imata ruranata decidishpapish shujtajcunata ayudangapajmi chashna decidin.

4, 5. a) ¿Jesusca paillataj decidi tucushpapish imatataj decidirca? b) ¿Imatataj tucuicuna tapurina canchij?

⁴ Jehová Diosca angelcunatapish gentecunatapish paicunallataj decidichunmi rurarca. Manaraj imata rurashpami Jesustaca paiman rijchajta rurarca. Chaimantami Jesusca paillataj decidi tucurca (Colosenses 1:15). ¿Jesusca ima shinataj decidij carca? Jahua cielopica Diabloca Diospaj enemigomi tucurca. Shinapish Jesusca Diablota cazunapaj randica Jehová Diosta cazunatami decidirca. Cai Allpapi ña cashpaca Diablo pandachichunca mana saquircachu (Mateo 4:10). Shinallataj manaraj huañushpami paipaj Yayapaj munaita pajtachisha nishpa Jesusca cashna mañarca: “Ñuca Yayitu, ima shinamanta cai jayajta ubyana shina llaquita mana apana cajpica, ñucamanta anchuchipai. Ñuca chashna nijpipish ama ñuca munashcata rurapaichu, ashtahuanpish can munashca shina rurapai” nircami (Lucas 22:42). Jesusca Diosta jatunyachinata, paipaj munaita ruranatami decidirca ¿Ñucanchijpish Jesús laya decidi tucunchijchu?

⁵ Ari, ñucanchijpish Diosman rijchaj rurashcami canchij, chaimantami Jesús layallataj decidi tucunchij (Génesis 1:26). Shinapish mana tucuita decidi tucunchijchu ¿imamanta? Bibliapimi Diosca leycunata churashca. Chai leycunatami cazuna canchij. Yuyashun, huarmicunaca paicunapaj cusacunatami cazuna can. Huahuacunapish yaya mamacunatami cazuna can (Efesios 5:22; 6:1). Shinaca imata decidicushpapish, “¿Diospaj leycunata cazunichu?” nishpami tapurina canchij. Dios cushca leycunata cazushpaca huiñai huiñaitami causashun.

¿HUAQUINCUNACA IMA SHINATAJ DECIDIRCACUNA?

6. ¿Imamantataj leycunata minishtinchij?

⁶ Ñucanchijllataj mana tucuita decidi tucushpapish cushillami causai tucunchij. Dios cushca leycunaca ñucanchij allipajmi can. Yuyashun. Caru llajtaman carropi rinatami decidishcanchij. Pero carreterapi manejangapaj leycuna mana tiyajpi, gentecunapish maipishcachun manejashpa rijpica ¿canca tranquilo ringuillamanchu? Mana. Cai ejemplopi ricushca shinaca tucuicunami alli causangapajca, leycuna tiyachun minishtinchij. ¿Dios cushca leycunata imamantataj cazuna canchij? Bibliapi huaquin ejemplocunata ricushun.

7. a) ¿Animalcunaca imatataj mana rurai tucun? b) ¿Adanca imatataj decidina carca?

⁷ Jehová rurashca punta runaca Adanmi carca. Diosca angelcunata shinallatajmi Adantaca paillataj decidichun rurarca. Shinapish animalcunataca paicunallataj decidichunca Diosca mana rurarcachu. ¿Adanca imatataj decidina carca? Paica tucui animalcunata ima shutita churanatami decidina carca. Bibliapi nishca shinaca Jehová Diosca tucui animalcunata shutichichunmi Adanpajman pushamurca. Adán shutichishcataca Diosca mana cambiarcachu, ashtahuanpish animalcunaca Adán decidishca shutihuanmi saquirircacuna (Génesis 2:19).

8. a) ¿Adanca imata ruranatataj agllarca? b) ¿Adán mana alli decidishcamantaca imataj tucurca?

⁸ Diosca Adán cai Allpata shuj paraisota rurachunmi munarca. Chaimantami cashna nirca: “Huahuacunayuj tucushpa, alli huiñachishpa achcata mirarishpa cai pachapi jundarishpa cai pachata mandanguichij. Yacupi causaj animalcunatapish, huairapi purij alasyuj animalcunatapish, allpapi purij tucui animalcunatapish cancuna mandanguichij” nircami (Génesis 1:28). Shinapish ¿Adanca imatataj agllarca? Dios mandashca leycunata mana cazunatami agllarca. Chaimantami Adanca Dios ama micuchun nishca frutota micurca. Adán mana alli decidishcamantami tucuicuna llaquinaita causacunchij (Romanos 5:12). Adán mana alli decidishpa llaqui tucushcataca manataj cungarinachu canchij. Chashnami Jehová Dios mandashca leycunata cazushpa imatapish alli decidishun.

9. a) ¿Israelitacunaca imatataj paicunallataj agllana carca? b) ¿Israelitacunaca imatataj rurashun nircacuna?

⁹ Adán Evapish juchata rurashcamantami juchayujcuna canchij, huañunchijpish. Chashna cashpapish tucuicunami imata ruranata decidi tucunchij. Caita alli entendingapajca israelitacunata Jehová Dios ima shina tratashcata yuyarishun. Diosca israelitacunataca paipaj pueblo canata o mana canataca paicunallataj agllachunmi saquirca (Éxodo 19:3-6). Israelitacunaca Diospaj pueblo canata, paipaj leycunatapish cazunatami agllarcacuna. Chaimantami paicunaca: “Mandaj Dios tucui imalla nishcataca rurashunllami” nircacuna (Éxodo 19:8). Pero qꞌuipaca paicuna nishcata mana pajtachircacunachu. ¿Israelitacunamantaca imatataj yachanchij? Imata ruragrishpapish allimi decidina canchij. Chashnallataj Jehová Diosmanta mana caruyanachu canchij. Tucui pai mandashcacunata cazunami canchij (1 Corintios 10:11).

10. ¿Hebreos capítulo 11-pi parlashca runacunamantaca imatataj yachanchij? (Página 9-pi tiyaj dibujota ricui).

¹⁰ Hebreos capítulo 11-pica Diosta alli servij 16 cꞌaricuna huarmicunamantami parlan. Paicunaca Dios cushca leycunata cazunatami agllarcacuna. Cashna alli decidishcamantami achca bendicioncunata chasquircacuna. Shinallataj qꞌuipa punllacunapi Dios cusha nishcatami shuyarcacuna. Por ejemplo, Diosca Noetaca: ‘Cambaj familiapish, cambaj huahua huahuacunapish quishpirichun shuj arcata rurai’ nircami. Noeca, Diosta tucui shunguhuan crishcamantami paita cazunata agllarca (Hebreos 11:7). Abrahampish Sarapish Diosta cazushcamantami paicunapaj llajtata saquishpa Dios cusha nishca llajtaman rircacuna. Paicunapaj llajtaman tigrai tucushpapish paicunaca mana tigrarcacunachu, ashtahuanpish Dios cusha nishcatami shuyarcacuna. Chaimantami Bibliapica, ‘tucuita yalli alli llajtatami mashcarcacuna’ nin (Hebreos 11:8, 9, 13, 15, 16). Moisesca Egiptopi charij canatami huashaman saquirca. Paica, “juchata rurashpa ashacama cushicushpa causanapaj randica, Dios agllashcacunahuan llaquita apanatami agllarca” (Hebreos 11:24-26). Cai runacunaca Diospimi tucui shunguhuan crircacuna, ñucanchijpish paicuna laya cashunchij. Dios ñucanchijllataj agllachun saquishcamanta pagui ningapajca, pai munashca shinami imatapish agllana canchij.

11. a) ¿Ñucanchijca imatataj decidi tucunchij? b) ¿Diosta adoranata decidishpaca imatataj ricuchishun?

¹¹ Imata runata o mana ruranata shujtajcuna decidishpa cuchunchari munanchij. Pero chaita rurashpaca ¿imatataj ñucanchijllataj mana decidi tucushun? Caita entendingapajca Bibliapi ricushun (Deuteronomio 30:19, 20-ta leyipai). Verso 19-pica israelitacunallataj imata ruranata decidichunmi Diosca saquirca ninmi. Cutin verso 20-pica paicuna alli decidishpaca Jehová Diosta tucui shungumanta cꞌuyashcatami ricuchinman carca ninmi. Ñucanchijpish Jehová Diosta adoranata o mana adoranatami decidi tucunchij. Diosta adoranata decidishpaca paita cꞌuyashcata, paita jatunyachisha nishcatapishmi ricuchishun.

ALLI DECIDISHUNCHIJ

12. Jehová Dios ñucanchijllataj decidichun rurashca cajpipish ¿imatataj mana rurana canchij?

¹² Yuyashun. Shuj alhaja regalota shuj amigoman cushcanchijman. Chai cushca regalota basurapi shitajpi o shujtajcunata llaquichingapaj utilizajpica ¿manachu llaquilla sintirinchijman? Diosca shuj regalota cuj shinami ñucanchijllataj decidichun saquishca. Chaimantami huaquin gentecuna mana alli decisioncunata japijpi o shujtajcunata llaquichijpica Diosca llaquilla sintirin. 2 Timoteo 3:1, 2-pi nishca shinaca tucuri punllacunapica mana pagui nijcunami tiyana carca. Ñucanchijca chai gentecuna laya mana casha ninchijchu. Pero Jehová Dios ñucanchijllataj decidichun rurashcamantaca ¿ima shinataj paita agradecishcata ricuchishun? Shinallataj ¿ima shinataj alli decidi tucunchij?

13. ¿Mana allita ruranapaj randica imatataj rurana canchij?

¹³ Ñucanchijllatajmi pihuan apanacunata, ima ropata churarinata, samacushpa imata ruranatapish agllai tucunchij. Shinapish Dios millanayachishcataca mana ruranachu canchij. Chashnallataj Diosta mana rijsijcuna rurashcataca mana catinachu canchij (1 Pedro 2:16-ta leyipai). Mana allita ruranapaj randica ‘tucui imata rurashpapish Diostami jatunyachina canchij’ (1 Corintios 10:31; Gálatas 5:13).

14. ¿Alli decisioncunata japingapajca imamantataj Diospi shunguta churana canchij?

¹⁴ Jehová Diosca: “Ñucaca Mandaj Diosmi cani. Cambaj allipaj yachachij cambaj Diosmi cani. Can catina ñanta yachachij Diosmi cani” ninmi (Isaías 48:17). Alli decisioncunata japingapajca Diospimi shunguta churana canchij, pai cushca leycunatapish cazunami canchij. Shinallataj mana jatun tucushpami Jeremías 10:23-pi nishcata yuyarina canchij. Chaipica: “Runapaj causaica mana paipajchu. Pipish quiquin causaitaca mana mandai tucunchu” ninmi. Adanpish, mana cazuj israelitacunapish Dios cushca leycunataca mana cazurcacunachu, paicunalla yuyashcatami rurarcacuna. Ñucanchijcuna paicuna laya canapaj randica Diospimi tucui shunguta churana canchij (Proverbios 3:5).

SHUJTAJCUNA DECIDISHCATA RESPETASHUNCHIJ

15. ¿Gálatas 6:5-pi nishca shimicunaca imatataj yachachin?

¹⁵ ¿Imamantataj shujtajcuna decidishcata respetana canchij? Diosca tucuicunatami cada uno decidichun saquishca. Chaimantami shujtajcunaca mana ñucanchij laya tucuipi chashnallataj decidincuna. Ñucanchij causaipi imata ruranata, Diosta servingapaj imata ruranatapish mana tucuicunachu chashnallataj decidincuna. Chaimantami Bibliapi nishcata yuyarina canchij (Gálatas 6:5-ta leyipai). Cai versopi nishca shinaca imata decidishpapish cada unomi chaillatataj japinga. Caita alli entendishpaca shujtajcuna imata decidishcatami respetashun.

16, 17. a) ¿Corinto llajtapi huauqui panicunaca imataj tucurca? b) ¿Pabloca paicunata ima shinataj ayudarca? c) ¿Ñucanchijpish imatataj rurana cashcanchij?

¹⁶ ¿Shujtaj huauquicuna panicuna decidishcataca imamantataj respetana canchij? Bibliapi shuj ejemplota ricushun. Corintopi llajtapica rurashcalla dioscunaman cushca aichatami mercadopi cꞌatujcuna carca. Huaquin crijcunaca, rurashcalla diosca mana ima canchu nishpami chai aichata micujcunalla carca. Cutin shujtaj crijcunaca ñaupa punllacunapi rurashcalla dioscunata adorajcuna cashcamantami, chai aichata micunaca rurashcalla diosta adoracuj shinami can nishpa mana micujcuna carca (1 Corintios 8:4, 7, NM). Chashna chꞌican chꞌican yuyaicunaca Corintopi causaj huauqui panicunataca chꞌicanyachinmanmi carca. ¿Caita ricushpaca Pabloca imatataj rurarca?

¹⁷ Pabloca chai aichata mana micushpa o micushpapish mana Diospajman ashtahuan cꞌuchuyanguichijchu nircami (1 Corintios 8:8). Qꞌuipaca, aichata micushpapish o mana micushpapish manaraj sinchi crijcunataca ama nitcachinguichij nircami (1 Corintios 8:9). Cutin manaraj sinchi crijcuna cashcamanta aichata micujcunataca ama juchachichun nircami (1 Corintios 10:25, 29, 30). Caipi ricushca shinaca Corinto congregacionpica Diosta servingapaj imata ruranamantami chꞌican cˈhican yuyaicuna tiyarca. Cada unomi imata ruranatapish decidina carca. ¿Manachu shujtaj huauquicuna panicuna imata ruranata decidijpipish respetana cashcanchij? (1 Corintios 10:32, 33).

18. ¿Dios ñucanchijllataj decidichun saquishcamantaca ima shinataj pagui nina canchij?

¹⁸ Jehová Diosca ñucanchijllataj decidichun saquishpami sumajta bendiciashca. Chashna bendiciashcamantami huatashca shinamanta cacharichishca canchij (2 Corintios 3:17, NM). Alli decidishpami Jehová Diosta mashnata cꞌuyashcata ricuchinchij. Shinallataj imata rurashpapish Diosta jatunyachingapaj decidishunchij, shujtajcunapaj decisioncunatapish respetashunchij. Chashna rurashpami ñucanchijllataj decidichun saquishcamanta Jehová Diosta achcata pagui nishun.