¿Yacharcanguichu?

¿Imamantataj Jesusca imamantapish ari ninaca mana allichu can nirca?

MOISESMAN cushca leypi nishca shinaca huaquinpica ari ninaca allimi carca. Pero Jesuspaj punllacunapica achca israelitacunami imamantapish ari nijcunalla carca. Chashnami paicuna nicushcaca mana llulla cashcata ricuchijcuna carca. Jesusca cai panda yuyaitaca mana alli ricurcachu. Chaimantami “ari cajpica ari, mana cajpica mana ningui” nirca (Mateo 5:33-37; 23:16-22).

Talmud shuti libropica maijan ari nishcata pajtachinataj cashcatami parlan. Shinallataj huaquin ari nishcacunataca pꞌaquinalla cashcatami nin. Religionmanta parlaj shuj diccionarioca: “Chai libropi ricuchishca shinaca judiocunaca imamantapish ari nijcunallami carca” ninmi.

¿Jesusllachu imamantapish ari ninaca mana allichu can nirca? Mana. Por ejemplo, historiamanta parlaj Flavio Josefo runapish huaquin judiocunamantaca cashnami nirca: “Paicunaca yangamanta ari ninaca llullatapish yalli mana alli cashcatami yuyancuna. Chaimantami paicunaca imamantapish mana ari nincunalla. Paicunaca ‘maijan runa mana verdadta nicushcamantami ari ninata minishtin’ nishpami yuyancuna” nirca. Judiocunapaj rijsishca Eclesiástico libropica: “Imatapish ari nij runaca paipaj shungu ucupi millai runami can” ninmi (23:11). Jesusca utca imatapish ari nijcunatami mana allichu can nishpa rimarca. Tucuita mana llullashpa nicushpaca ari ninaca mana minishtirishca canchu.