¿Manaraj cazarashpa ishqui causanaca allichu can?

Bibliaca caitami yachachin

Jehová Diosca tucui gentecuna chuya causachunmi munan. Chaimantami Bibliapica: “Huainayanamanta anchurichij” nin (1 Tesalonicenses 4:3). Bibliapica huainayana nishpaca, cazarashca jahua shujtaj cꞌarihuan, shujtaj huarmihuan huainayana, cꞌaripura huarmipura huainayana, manaraj cazarashpa huainayanatami nicun.

• ¿Jehová Diosca imamantataj shuj cꞌari, shuj huarmica cazarashpallami ishqui causana can nin?

• ¿Shuj cꞌari, shuj huarmi amañarishcata ricungapaj manaraj cazarashpa ishqui causanaca allichu can?

• ¿Cazarashcacunaca alli causangapajca imatataj rurana can?

¿Jehová Diosca imamantataj shuj cꞌari, shuj huarmica cazarashpallami ishqui causana can nin?

• Diosmi cazaranataca callarichirca. Jehová Diosmi punta cꞌari punta huarmita cazarachijpi cazarashpa causanaca callarirca (Génesis 2:22-24). Shuj cꞌari shuj huarmi manaraj cazarashpa ishqui causachunca Diosca mana munarcachu.

• Diosca gentecunapaj ima alli canataca allimi yachan. Diosca familiacuna cushilla causachunmi cazarashcacuna huiñaipaj tandallami cana canguichij nirca. Caipi yuyashun. Shuj muebleta rurangapaj piezacunata randishpaca chai muebleta ruraj cachashca guiatami alli liyina canchij. Chashnami tucui piezacunata churashpa chai muebletaca allita allichishun. Chashnallatajmi Jehová Diosca familiacuna cushilla causachunca Bibliapi tiyaj consejocunata cushca. Chai consejocunata cazushpaca familiacunaca allimi causanga (Isaías 48:17, 18).

  

• Cazarashca jahua shujtaj cꞌarihuan shujtaj huarmihuan chayarinacushpaca llaquicunatami charishun. Por ejemplo, mana munashcapi huahuayuj tucushun, millai ungüicunata chari tucushun, llaquilla, imapaj mana valishca shinachari sintirishun.

• Diosca cusa huarmicuna chayarinacushpa huahuacunata charichunmi rurarca. Chashna rurashpami shuj sumaj regalota curca. Causaica Diospajca valishcami can. Chaimantami pai cushca regalotaca ñucanchij cusallahuan, ñucanchij huarmillahuan pajtachina canchij. Chashnami cazaranataca valichishcata ricuchishun (Hebreos 13:4).

¿Shuj cꞌari, shuj huarmi amañarishcata ricungapaj manaraj cazarashpa ishqui causanaca allichu can?

Achca gentecunaca: “Manaraj cazarashpa ishqui causashpami amañarishcata o mana amañarishcataca ricushun. Amañarishpaca ishqui causashpa catishun. Mana amañarishpaca separarishunlla” nincunami. Pero chashna ruranaca alli matrimoniota charichunca mana ayudanchu. Cutin cusa huarmica matrimoniopi ari ninacushpami llaquicunata charishpapish ishquindijpura chꞌimbapurashpa ñaupajman catingacunaa (Mateo 19:6).

¿Cazarashcacunaca alli causangapajca imatataj rurana can?

Problemacuna illaj matrimonioca mana tiyanchu. Shinapish cazarashcacunaca Bibliapi tiyaj consejocunata pajtachishpami cushilla causangacuna. Huaquin consejocunata ricushun:

• Cazarashcacunaca paicunapaj cusa, o huarmi, minishtishcatarajmi ricuna can (1 Corintios 7:3-5; Filipenses 2:3, 4).

• Ishquindijpurami cꞌuyaita, respetota ricuchina can (Efesios 5:25, 33).

• Manaraj imatapish rimarishpami puntaca alli yuyarinaraj can (Proverbios 12:18).

• Pacienciata charina, perdonanami can (Colosenses 3:13, 14).