Cientificocunaca Reloj del Juicio Final nishcatami adelantashcacuna ¿Bibliaca imatataj yachachin?

24 de enero de 2023-pica cientificocunaca Reloj del Juicio Finala nishca chaupi tutaman ñalla chayagrishcatami nircacuna. Chashna nishpaca cai mundo ñalla tucurinatami intindichisha nircacuna.

“Reloj del Juicio Final nishcaca gentecuna paicunapaj culpallamantataj chingarina cashcatami nisha nin. Ucraniapi guerra tiyashcamanta, jatun bombacunahuan macanacui tiyanata gentecuna manchashcamanta, cai allpapi yalli calor, yalli chiri tiyashcamantapishmi martes punllataca cientificocunaca Reloj del Juicio Final nishcataca chaupi tutaman adelantarcacuna” (Servicio internacional de noticias de la agencia AFP).
“Martes punllataca cientificocunaca Reloj del Juicio Final nishcata chaupi tutapajca 90 segundocunalla faltachun churashcatami huillarcacuna. Gentecuna tucurina punllaca ashtahuan cꞌuchullapimi can” (ABC News).
“Chꞌican chꞌican llajtacunamanta cientificocunaca gentecuna paicunapaj culpallamantataj chingarigri tucushcatami advirtircacuna” (The Guardian).

¿Ñallachu gentecunapish, cai allpapish tucuringa? ¿Shamuj punllapi ima tucunataca manchanachu canchij? ¿Caimantaca Bibliaca imatataj yachachin?

¿Shamuj punllapica imashi tucushun?

Bibliapi nishca shinaca ‘cai pachaca manataj chingaringachu’. Ashtahuanpish chaipica gentecunaca ‘huiñai huiñaitami causangacuna’ (Eclesiastés 1:4; Salmo 37:29). Shinaca gentecunaca cai allpataca mana tucuchingachu. Paicunaca cai allpapimi causashpa catingacuna.

Shinapish Bibliapica millai ruraicuna, mana alli gentecunapish tucurina cashcatami yachachin (1 Juan 2:17).

Bibliapi cai pacha tucurinamanta parlashpa imata nisha nishcata yachangapajca “¿Cai mundoca tucuringachu? ¿Apocalipsis nishcaca imataj can?” nishca yachaita liyi.
Shamuj punllacunapi cai allpapi ima tucunata Biblia ima yachachishcata yachangapajca “¿Cuándo será el fin del mundo?” nishca yachaita liyi.

Mana manchashpa ñaupajman cati

Cai allpapi problemacuna tiyajpipish Bibliapi tiyaj yuyaicunami ama dimastij desanimarichun ayudan. ¿Ima shinataj ayudan?

Bibliapi tiyaj consejocunaca alli causachunmi ayudan (2 Timoteo 3:16, 17). Llaquicuna ricurijpipish tranquilo sintiringapaj Biblia ima shina ayudai tucushcata yachasha nishpaca “Qué puedo hacer para no preocuparme tanto” nishca yachaita liyi.
Bibliaca shamuj punllacunapaj shuj sumaj esperanzata charichunmi ayudan (Romanos 15:4). Bibliapica cai tiempopi, shamuj punllacunapipish ima tucunatami huillan. Caita yachanami cai sinchi punllacunapi tranquilo sintirichun ayudan.

Bibliamanta ashtahuan yachasha nishpaca ñucanchijhuan Bibliata estudiachunmi animanchij.

a “Gentecuna llaquichij tecnologiata rurashcamanta cai allpata tucuchigrishcata advirtingapajmi cai Reloj del Juicio Final nishcata rurashcacuna. Pero caica shuj chꞌimbapuraillami can. Cai chꞌimbapuraica cai allpapi causajcuna jatun problemacunahuan causana cashcatami ricuchin” (Bulletin of the Atomic Scientists [Boletín de Científicos Atómicos]).