¿Cai Allpapica ima shinashi tranquilo causai tiyanga?

Bibliaca caitami yachachin

Shamuj punllacunapica alli causaitami charishun. Pero mana gentecunamanta, ashtahuanpish Diospaj Gobiernomantami alli causaita charishun. Cai Gobiernoca jahua pachapimi can. Chaipica Jesusmi mandacun. Chaimanta Biblia ima nishcata ricushun.

1. Diosca “tucui cai pacha macanacuicunata” tucuchingami. Shinami ‘cai pachapipish pai cꞌuyashpalla cushcata chasquijcunamanca sumaj causaita’ cunga (Salmo 46:9; Lucas 2:14).

2. Diospaj Gobiernoca tucui cai Allpatami mandanga. Chaipica shuj llajtahuan, caishuj llajtacunahuanca mana macanacungacunachu. Ashtahuanpish tucuicunami shuj familia shina causashun (Daniel 7:14).

3. Bibliapica Diospaj Gobiernopi Mandaj Jesustaca “sumaj causaita Mandaj”ninmi. Paimi tucuicuna huiñai huiñaita tranquilo causachun ayudanga (Isaías 9:6, 7).

4. Diosca “millaita ruranata cꞌuyajtaca pꞌiñanmi”. Chaimantami Diospaj Gobiernoca pꞌiñanacushpa causajcunataca tucuchinga (Salmo 11:5; Proverbios 2:22).

5. Diosca paita sirvijcunataca tranquilo causachunmi yachachin. Chaimantami Bibliapica: “Paicunapaj espadacunaca yapuna rejami tucunga. Paicunapaj lanzacunaca hocesmi tucunga. Caishuj llajtapi causajcunahuan, chaishuj llajtapi causajcunahuan macanacuica ña mana tiyangachu. Macanacuipaj yachachinapish, ña mana tiyangachu” nin (Isaías 2:3, 4).

Muyundij Allpapimi testigo de Jehovacunaca mana pꞌiñanacushpa causanata yachacuncuna (Mateo 5:9). Chaimantami 240 chꞌican chꞌican llajtacunapi causashpapish, chꞌican chꞌican rimaicunata charishpapish shujtajcunataca mana llaquichincuna.