¿Diosca ñucanchij mañashcacunata cutichinchu?
Bibliaca caitami yachachin
Ari. Achca gentecunaca Diosman mañajpica paica cutichinmi nincunami. Bibliapipish chaitami yachachin. Salmo 145:19-pica: “Paita manchajcuna imata yuyarishcataca pajtachingami. Paicuna mañashcata uyangami. Paicunataca quishpichingami” ninmi. Pero Dios ñucanchij mañashcacunata cutichichunca pai munashca shinami mañana canchij.
¿Diostaca ima shinataj mañana canchij?
Jehová Diosllatami mañana canchij. Jesusta, Mariata, rurashcalla dioscunata, angelcunata, santocunatapish mana mañanachu canchij. Bibliapica Jehová Diosca ñucanchij ‘mañashcacunata uyajmi’ ninmi (Salmo 65:2).
Diospaj munaita, Bibliapi nishcacunata yuyaipi charishpami imatapish mañana canchij (1 Juan 5:14).
Jesuspaj shutipimi mañana canchij. Chashnami paitapish respetashcata ricuchinchij. Jesusca: “Yayapajmanca pi mana paillatajca chayai tucunchu” nircami (Juan 14:6).
Dios cutichinatami tucui shunguhuan crina canchij. Mana tucui shunguhuan crishpaca “ashtahuan crina yuyaita cuhuai” nishpami mañana canchij (Mateo 21:22; Lucas 17:5).
Imata mana pacashpa, humilde shunguhuanmi Diosta mañana canchij. Bibliapica: “Mandaj Diosca tucuita yalli jatunmi. Chashna cashpapish mana jatun tucushca mañashcatami uyaracun” ninmi (Salmo 138:6).
Cutin cutinmi Diosta mañana canchij. Jesusca: “Diostaca mañacuichijlla, paica cungami” nircami (Lucas 11:9).
¿Diosca imatataj mana ricun?
Diosca ñucanchijcuna maijan llajtamanta cashcataca mana ricunchu. ‘Pi cashpapish Taita Diospaj ñaupajpica tucuicuna chai shinallatajmi canchij. Maijan llajtapi causaj cashpapish Taita Diosta manchashpa allita rurajtami Taita Diosca alli nin’ (Hechos 10:34, 35).
Tiyarishpa, cumurishpa, cungurishca o shayarishca mañacushcataca Diosca mana ricunchu. Ima laya cashpapish Diosta mañai tucunchijllami (1 Crónicas 17:16; Nehemías 8:6; Daniel 6:10; Marcos 11:25).
Shimi ucullapi o sinchita rimashcataca mana ricunchu. Ñucanchij shungu ucullapi mañajpipish Diosca cutichingami (Nehemías 2:1-6).
Ñucanchij llaquicuna jatun cashcata o uchilla cashcataca Diosca mana ricunchu. Bibliapica: ‘Ima llaquicuna yuyailla canataca Diosman mingaichij’ nishpami animan (1 Pedro 5:7).