¿Testigo de Jehovacunapaj Cuerpo Gobernanteca imataj can?

Cuerpo Gobernanteca testigo de Jehovacunapaj organizacionta pushaj huauquicunami can. Cai huauquicunaca sinchi feta charijcunami can. Paicunaca caicunatami rurancuna:

• Publicacioncunapi ricurij Bibliamanta yuyaicunatami rurancuna. Shinallataj tandanacuipi yachaicunatami preparancuna, testigo de Jehovacunapaj escuelacunapi imalla yachanacunatami rurancuna (Lucas 12:42).

• Muyundij Allpapi testigo de Jehovacunapaj imalla rurashcacunatami paicunaca ricuncuna. Por ejemplo, ima shina huillacushcata, gentecuna shungumanta cushca cullquita ima shina utilizacushcatami ricuncuna.

Cuerpo Gobernantepi sirvij huauquicunaca punta siglopi ‘apostolcuna, cunaj yuyajcuna’ imata rurashcatami catincuna. Paicunaca congregacionpajmi huaquin decisioncunata agllarcacuna (Hechos 15:2). Ñaupa tiempopi apostolcunapish, cunaj yuyajcunapish Diospaj organizacionta pushajcuna cashpapish paicunaca mana lidercuna shina cashcatachu sintircacuna. Cunan tiempopi Cuerpo Gobernantepi sirvij huauquicunapish Diospaj organizacionta pushaj cashpapish mana lidercuna shina cashcatachu sintincuna. Ashtahuanpish paicunaca imata rurana cashcata yachangapajca Bibliapi ima nishcatami alli ricuncuna. Shinallataj Jehová Dios Jesucristota congregacioncunapi uma cachun churashcatami reconocincuna (1 Corintios 11:3; Efesios 5:​23).

¿Cuerpo Gobernantepica picunataj sirvincuna?

Cuerpo Gobernantepi sirvij huauquicunaca caicunami: Kenneth Cook, churi, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane y Jeffrey Winder. Tucuicunami Warwick llajtapi saquirij central mundialpi sirvincuna.

¿Cuerpo Gobernanteca ima shinataj organizado can?

Diospaj organizacionpaj ruraicuna ima shina ñaupajman ricujta ricungapajmi Cuerpo Gobernanteca 6 comitecunata churashcacuna. Cuerpo Gobernantemanta cada shuj huauquimi cai comitecunapica trabajancuna.

• Comité de Coordinadoresca asuntos legalespi sirvij huauquicuna imalla ruracujtami alli ricuncuna. Shinallataj shuj jatun llaqui tiyajpi imalla rurana cashcatami paicunaca alli ricuncuna. Cashna llaquicunaca testigo de Jehovacunatapish llaquichijpimi cai comiteca imata rurana cashcata alli ricun. Huaquin llajtacunapica Jehová Diosta sirvichunca mana saquincunachu. Chashna tucujpimi cai asuntos legalespi trabajaj huauquicunaca paicuna imata rurana cashcata ricuchishpa ayudancuna.

• Comité de Personalca muyundij Allpapi testigo de Jehovacunapaj Sucursalpi sirvij huauqui panicunatami ricuncuna.

• Comité de Publicacionca Bibliamanta publicacioncunata impriminata, maiman cachanata, tandanacuna huasicunata, traducina huasicunata, Sucursal huasicunata shayachinatami ricuncuna.

• Comité de Servicioca ‘Diospaj Gobiernomanta alli huillaicunatami’ ñaupajman pushan (Mateo 24:14).

• Comité de Enseñanzaca tandanacuicunapi, escuelacunapi ima shina yachachinatami ricuchincuna. Shinallataj audio y videocunapaj programacunatami rurancuna.

• Comité de Redaccionca Bibliamanta japishca publicacioncunapi imalla ricurina yuyaicunatami allichincuna. Shinallataj ñucanchij página de Internetpi imalla ricurinatapishmi ricuncuna. Traducina huasicunapi imalla trabajota ruracujtapishmi alli ricuncuna.

Cuerpo Gobernantemanta huauquicuna cashna cada comitepi trabajashpapish semanapica shuj cutinmi tandanacuncuna. Cai tandanacuicunapica Diospaj organización imalla minishtishcacunatami ricuncuna. Bibliapi ima nishcatapishmi alli intindincuna. Shinallataj espíritu santo paicunata pushachunmi saquincuna. Shujlla decisionta agllangapajmi tucui pudishcata rurancuna (Hechos 15:25).

¿Cuerpo Gobernantepi sirvij huauquicunata ayudajcuna?

Cada comité del Cuerpo Gobernantepi ayudajcunaca Diosta alli sirvij, alli yachaj, comitecunapi ayudangapaj experienciata charij huauquicunami can (1 Corintios 4:2). Comitecunaca cada semanami shuj tandanacuita rurancuna. Comitecunapi ayudaj huauquicunaca cai tandanacuicunapi ima decisionta mana agllashpapish alli decisioncunata agllachunmi ima yuyashcata nincuna. Shinallataj chaipi ima decidishcatami pajtachincuna. Ima resultadocuna tiyashcatapishmi ricuncuna. Cai huauquicunatami Cuerpo Gobernantepi cajcunaca muyundij Allpapi caj shujtaj Testigocunata visitachun cachancuna. Shinallataj reuniones anuales, graduaciones de la Escuela de Galaadpi participachunmi mañancuna.