¿Yaya mamahuan alli apanacungapajca imatataj rurai tucuni?

Cai tapuicunapi yuyai

• ¿Pihuantaj ashtahuan pꞌiñanacungui?

  • Cambaj yayahuan

  • Cambaj mamahuan

• ¿Mashna tiempotataj pꞌiñanacunguichij?

  • Huaquinllapi

  • Ashallata

  • Cada rato

• ¿Sinchitachu pꞌiñanacunguichij?

  • Mana. Problemacuna ricurijpica rato, tranquilomi allichinchij.

  • Shina shinalla. Pero achca ratota pꞌiñanacushca huashami allichinchij.

  • Ari. Pꞌiñanacushpami catinchij. Mana imata allichinchijchu.

Cambaj yaya mamahuan mana alli apanacushpaca paicunami allichingapaj imatapish rurana can nishpachari yuyangui. Pero, cambaj yaya mamahuan ama cada rato pꞌiñanacungapajca catij yuyaicunata ricui.

¿Imamantataj problemacunaca tiyai callarin?

• Huiñacushcamantami canca ña mana huahua shina yuyangui. Cambaj propio yuyaita charishcamantachari cambaj yaya mamapaj yuyaicunaca mana alli shina ricuringa. Pero, Bibliapica: “Cambaj yayata cambaj mamata alli ningui” ninmi (Éxodo 20:12).

  Caita yuyari: Mana tucui experienciata charinguichu. Chaimantami mana pꞌiñarishpa cambaj yuyaicunata huillanata yachana cangui.

• Canllatajmi imatapish rurasha ningui. Huiñajpica cambaj yaya mamaca asha ashami imatapish rurachun saquin. Pero can munashca shina tucuita rurachunca mana saquingacunachu. Chaimantachari cambaj yaya mamahuan pꞌiñanacungui. Shinapish Bibliapica: “Cancunapaj yaya mamata cazuichij” ninmi (Efesios 6:1).

  Caita yuyari: Canllataj allita ruranata decidijpica cambaj yaya mamaca canpimi ashtahuan confianga.

Caitami rurana cangui

• Ima tucushcamanta cambaj yaya mamata culpanapaj randica can chaita allichingapaj imata rurai tucushcapi yuyai. Paicunahuan alli apanacungapajpish esforzari. Jeffrey shuti jovenca: “Cambaj yaya mamahuan pꞌiñarishpa parlajpimi problemacunaca callarin. Pero paicunahuan mana pꞌiñarishpa parlajpica problemacunaca mana miraringachu” ninmi.

  Bibliapica cashnami nin: “Cancuna tucuicunahuan alli cai tucushpaca, tucuicunahuan sumajta causaichij” (Romanos 12:18).

• Uyanata yachai. Samanta shuti jovenca, 17 huatatami charin. Paica: “Ñuca yaya mamata uyanaca sinchimi can. Pero paicunata uyajpica paicunapish ñucata uyangami” ninmi.

  Bibliapica cashnami nin: “Imatapish uyanataca alli uyaichij. Manaraj alli yuyarishpaca ama rimaichijchu” (Santiago 1:19).

  

• Shuj equipo shinami canguichij. Pꞌiñanacuicuna tenis pugllai shina cashcapi yuyai. Cambaj yaya mamataca mana malla huashapichu churanguiman. Cambaj problemacunatami malla huashapi churanguiman. Adam shuti jovenca caitami nirca: “Pꞌiñanacuicuna tiyajpica yaya mamacunaca huahuacunapaj ima alli cashcatami ricuncuna. Cutin huahuacunaca paicunapaj ima alli cashcallapimi yuyancuna. Shinaca yaya mamacunapish huahuacunapish chashnallatajmi yuyancuna”.

  Bibliapica cashnami nin: “Sumajta causashunchij” (Romanos 14:19, La Biblia. Traducción del Nuevo Mundo).

• Yaya mamacunata intindi. Sara shuti jovenca caitami nirca: “Ñucanchij shinallatajmi yaya mamacunapish sinchi problemacunahuan chꞌimbapurancuna”. Carla shuti jovenpish: “Ñuca yaya mama shina yuyangapajmi esforzarini. Chaimi ¿ñucapish shuj huahuata huiñachina cashpaca ima shinataj sintirinman? ¿Imataj paipajca ashtahuan alli canman? nishpa tapurini” ninmi.

  Bibliapica cashnami nin: “Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij” (Filipenses 2:4).

• Yaya mamata cazui. Bibliapica caitami rurachun nin (Colosenses 3:20). Cazuj cajpica tucuimi alli llujshinga. Karenca: “Ñuca yaya mamacunata cazushpaca allimi sintirini. Ashtahuanpish paicunaca ñucamantaca achca cosascunatami rurashcacuna. Chaita yuyaipi charishpami paicunata cazunaca mana sinchi ricurin” ninmi. Shinaca cazuj cashpaca pꞌiñanacuicunataca mana charishunchu.

  Bibliapica cashnami nin: “Yanta illajpica ninapish huañunllami” (Proverbios 26:20).

Caita rurai. Cambaj yaya mamahuan parlanacuna sinchi ricurijpica shuj cartata o celularpi shuj mensajeta escribi. Alyssa shuti solteraca: “Ñucaca parlanata mana munashpaca ima shina sintirishcatami escribini. Chashnami ñuca ima nisha nishcataca mana pꞌiñarishpa, tranquila parlani” ninmi.