¿Mariaca Diospaj mamachu can?

Bibliaca caitami yachachin

Bibliapica Mariataca Diospaj mama o paita adorana nishpaca mana yachachinchu.a Catij yuyaicunata ricushun:

Mariaca ñucaca Diospaj mamami cani nishpaca mana nunca nircachu. Bibliapica Mariaca jahua pachapi caj Jatun Diospaj Churitami huacharca ninmi. Paica Diostaca mana huacharcachu (Marcos 1:1; Lucas 1:32).
Jesucristoca, “Mariaca Diospaj mamami can, paitami adorana canguichij” nishpaca mana nunca nircachu. Shuj cutinca shuj huarmica Mariataca: “¡Canta huachashpa chuchuchishpa huiñachij huarmica, cushichishcami canga!” nircami. Chaimi Jesusca cai huarmitaca: “¡Diospaj Shimita uyashpa cazujcunami, ashtahuan cushichishcacuna!” nirca (Lucas 11:27, 28).
Bibliapica Mariataca: “Diospaj mama” o “Diosta huachaj” nishpaca mana maipi yachachinchu.
Bibliapica “jahua pachata mandaj” nishca shimimi ricurin. Pero chai shimica mana Mariamanta parlanchu. Ñaupa tiempopi Diosta mana cazuj israelitacunaca “jahua pachata mandaj” yanga diosatami adorajcuna carca (Jeremías 44:15-19). Cai diosaca babiloniocunapaj Istar (Astarté) diosami cashcanga.
Historiamanta yachaj shuj runaca: “Jesusta punta catijcunaca Mariataca shuj diosata shinaca mana adorajcunachu carca. Paicunaca Mariata adorajcuna cashcata shina ricuchunca mana munajcunachu carca” ninmi (In Quest of the Jewish Mary).
Bibliapica Diostaca huiñaimanta huiñaicama tiyashca ninmi (Salmo 90:1, 2; Isaías 40:28). Pai siempre tiyashcamantaca mana shuj mamata chari tucunchu. Ashtahuanpish Bibliapica “jahua pachapish Dios causanapajca mana pajtaipajchu” ninmi. Chaimanta Mariaca paipaj huijsapica Diostaca mana apai tucunmanchu carca (1 Reyes 8:27).

Mariaca Jesuspaj mamami carca, mana Diospaj mamachu carca

Mariaca Judá llajtamantami carca. Paica Davidpaj huahua huahuacunamantami shamurca (Lucas 3:23-32). Mariaca Diospi feta charishcamantami paipaj ñaupajpi alli ricurirca (Lucas 1:28). Chaimantami Diosca Mariataca Jesuspaj mama cachun agllarca (Lucas 1:31, 35). Qꞌuipaca Mariaca Josehuanmi shujtaj huahuacunatapish charirca (Marcos 6:3).

Bibliapica Mariaca Jesuspaj discipulami tucurca ninmi. Pero paimantaca mana ashtahuan parlanchu (Hechos 1:14).

¿Mariataca imamantataj Diospaj mamami can nishpa crincuna?

Huata 400 manaraj tucujpimi huaquincunaca Mariata adorai callarircacuna. Chai tiempopica romanocunami catolicocuna tucurca. Huaquincunaca yanga dioscunata adoranata saquishpami Jesusta caticunchij nijcuna carca. Chai tiempopajca Iglesia Catolicapi yachachijcunaca Diospish Jesuspish espíritu santopish shujlla Diosmi can nishpami yachachijcuna carca. Chai yachachishcataca Trinidad nishpami rijsincuna. Pero chai yachachishcaca mana Bibliamantachu carca.

Catolicocunaca Trinidadta crishcamantami Jesustaca Diosmi can ni callarircacuna. Chaimi Mariaca Diospaj mamami can nishpa yuyarcacuna. Huata 431-pimi Concilio de Éfeso nishcaca “Mariaca Diospaj mamami can” nircacuna. Chai huashaca casi tucui ladocunapimi Mariallata adorai callarircacuna. Huaquincunaca diosacunatami adorajcuna carca. Pero, catolicocuna tucushpaca paicunapaj dioscunataca Virgen Mariapaj imagencunahuanmi cambiarcacuna (Ártemis diosaca romanocunapajca Diana diosami carca).

Huata 432-pica papa Sixto terceroca “Diospaj mamata adorangapaj” nishpami Romapica shuj iglesiata shayachichun mandarca. Chai iglesia cꞌuchullapimi romanocunapaj Lucina nishca diosata adorangapajca shuj templo tiyarca. Shuj quillcaj huarmica: “Chai iglesiapica Mariata adorangapajca Lucina diosata adorana costumbrecunatami catishpa adorajcuna carca” ninmi (Mary—The Complete Resource).

a Huaquin religioncunapica Mariataca Diospaj mamami can nishpami yachachincuna. Mariataca “jahua pachata mandaj” o “Diosta huachaj huarmimi” can nincunami (griego shimipica Theotokos nincunami).