¿Huañuna yuyaita charijcunataca Bibliaca ima shinataj ayudan?

Bibliaca caitami yachachin

Diospaj Shimi cashcamantami llaquilla cajcunata, desanimarishcacunataca cushichi tucun (2 Corintios 7:6). Mana medicinamanta yachachishpapish Bibliaca mana causasha nij gentecunatapishmi ayudashca. Chaipi tiyaj consejocunapishmi canta ayudai tucun.

• ¿Bibliaca ima alli consejocunatataj cun?

• ¿Huañusha nij gentecunamantaca Bibliaca parlanchu?

• ¿Huañuna yuyaicunata charijpica Bibliamanta maijan versocunataj ayudai tucun?

• ¿Shuj amigo “ña mana causasha nini” nijpica imatataj rurai tucunchij?

• ¿Ñaupaman ñucallataj ña huañusha nishca cashpaca?

¿Bibliaca ima alli consejocunatataj cun?

• ● Can ima shina sintirishcata huillai

  Bibliaca caitami yachachin: Proverbios 17:17-pica: “Alli apanacuj runaca paihuan apanacujtaca, tucui causaipimi cꞌuyan. Ima llaqui japijpipish, quiquin huauqui shinami llaquin” ninmi.

  ¿Cai versoca imatataj nisha nin? Huañuna yuyaicunata charishpaca shujtajcunapaj ayudata minishtishcatami nisha nin.

  Can ima shina sintirishcata shujtajcunaman mana huillashpaca, chai llaquitaca canllaca mana ahuantai tucunguichu. Pero shujtajcunaman huillashpaca chai huañuna yuyaicunata ahuantashpa ña mana yallitaj sustaringuichu.

  

  Caita rurai: Cunanllataj shuj familiahuan o cambaj alli amigoman parlai.a Ashtahuanpish can ima shina sintirishcata escribi.

• ● Doctorpaj ayudata mashcai

  Bibliaca caitami yachachin: Mateo 9:12-pica: ”Mana ungushcacunata jambijtaca mana mashcanchu, ungushcacunallami mashcancuna” ninmi.

  ¿Cai versoca imatataj nisha nin? Ungushca cashpaca doctorpajmanmi rina canchij.

  Huaquinpica huañuna yuyaicunata charinaca ungushca cashcatami ricuchin. Ima shinami shuj ungüita charishpa mana pingaita charinchij. Shinallataj huañuna yuyaicunata charishpapish mana pinganachu canchij. Cai ungüicunapajca tratamiento tiyanmi.

  Caita rurai: Huañuna yuyaicunata charijcunata ayudaj doctorta mashcai.

• ● Diospaj ñaupajpi valishca cashcata yuyari

  Bibliaca caitami yachachin: Lucas 12:6, 7-pica: “¿Manachu pichca pajarocunata ishqui cullquipi cꞌatuncuna? Chashna cajpipish chai pajarocunataca Taita Diosca shujllatapish mana cungarinchu. Chaimanta amataj manchaichijchu. Cancunacarin achca pajarocunatapish yalli valijmi canguichij” ninmi.

  ¿Cai versoca imatataj nisha nin? Diospajca can valishca cashcatami nisha nin.

  Huaquinpica canlla sintirishpapish mana canllachu cangui. Can ima shina sintirishcataca Diosca allimi yachan. Huañuna yuyaita charijpipish Diosca canmantami preocuparin. Salmo 51:17-pica: “Taita Dioslla, shungu llaquirishca, mana jatun tucushca quiquinpajman cꞌuchuyajpica mana yanganchinguichu” ninmi. Cai versopi ricushca shinaca Jehová Diosca cantaca achcatami cꞌuyan. Chaimantami causashpa catichun munan.

  Caita rurai: Jehová Dios imamanta canta cꞌuyashcata Bibliapi mashcai. Chaipajca Acerquémonos a Jehová nishca libropi capítulo 24-ta ricui.

• ● Yaya Diosta mañai

  Bibliaca caitami yachachin: 1 Pedro 5:7-pica: “Diosmi cancunataca cuidacun. Chaimanta ima llaquicuna yuyailla canataca paiman mingaichij” ninmi.

  ¿Cai versoca imatataj nisha nin? Yaya Dios ñucanchij ima shina sintirishcataca paiman tucuita huillachun munashcatami nisha nin.

  Yaya Diosca tranquilo cachunmi ayudan. Ñaupajman catichunpishmi fuerzata cun (Filipenses 4:6, 7, 13). Chashnami paipajman cꞌuchuyajcunata ayudan (Salmo 55:22).

  

  Caita rurai: Cunanllataj Diospaj shutita utilizashpa mañai. Can ima shina sintirishcatapish huillai (Salmo 83:18). Ñaupajman catingapaj ayudachun mañai.

• ● Shamuj punllacunapi Yaya Dios alli causaita cugrishcapi yuyai

  Bibliaca caitami yachachin: Hebreos 6:19-pica: ‘Chai yuyaica barcota charicuj fierro shinami ñucanchij causaitaca sinchita charicun’ ninmi.

  ¿Cai versoca imatataj nisha nin? Ima shinami huaira shuj barcota caiman chaiman apan, chashnallatajmi huañuna yuyai shamujpica caita o chaita rurasha ningui. Pero Bibliapi yachachishca esperanzaca barcota charicuj fierro shinami alli cachun ayudan.

  Bibliapi huillashca esperanzaca pajtaringami. Ñallami Jehová Diosca ñucanchijta llaquichij tucui problemacunata tucuchinga (Apocalipsis 21:4).

  Caita rurai: Bibliapi huillashca esperanzamanta ashtahuan yachangapajca “La esperanza real de un mañana mejor” temata liyi.

• ● Can munashca cosascunata rurai

  Bibliaca caitami yachachin: Proverbios 17:22-pica: “Cushilla shunguhuan causanaca, aichapajpish alli jambimi” ninmi.

  ¿Cai versoca imatataj nisha nin? Ñucanchij munashca cosascunata ruranaca cushilla sintirichun ayudashcatami nisha nin.

  

  Caita rurai: Can munashca cosascunata rurai. Por ejemplo, alli sintichij musicata uyai, animachij librocunata liyi o shujtaj cosascunatapish rurai. Shinallataj shujtajcunata ayudashpami cushilla sintiringui (Hechos 20:35).

• ● Ejerciciota rurai

  Bibliaca caitami yachachin: 1 Timoteo 4:8-pica: “Aichata cuyuchinapish, asha allimi” ninmi.

  ¿Cai versoca imatataj nisha nin? Ejerciciota rurana, alli dormina, sano micuicunata micunaca alli cashcatami nisha nin.

  Caita rurai: 15 minutocunallatapish purinaman llujshi.

• ● Ñucanchij causai, ñucanchij sentimientocunaca cada punllami cambian

  Bibliaca caitami yachachin: Santiago 4:14-pica: ‘Caya punlla ima tucuna cashcata mana yachanguichijchu’ ninmi.

  ¿Cai versoca imatataj nisha nin? Ñucanchijta llaquichij problemacunaca tiempohuan chingarinatami nisha nin.

  Huaquinpica “ñuca charishca llaquicunaca mana nunca tucuringachu” nishpachari yuyanchij. Pero chai llaquicunaca mana tucui vidapajchu canga. Chaimantami ñaupajman catina cangui (2 Corintios 4:8). Ñucanchijta llaquichij problemacunaca tiempohuanca tucurinmi. Pero, shuj persona paillataj huañujpica chaitaca mana cambiai tucunchijchu.

  Caita rurai: Ñaupa punllacunapica Diosta sirvijcunapishmi huañuna yuyaita charircacuna. Pero tiempohuanca paicunapaj causaipishmi cambiarca. Paicunamanta Bibliapi liyi. Cunanca huaquin ejemplocunata ricushun.

¿Huañusha nij gentecunamantaca Bibliaca parlanchu?

Bibliapica huaquin huañusha nij gentecunamantami parlan. Diosca paicunahuan pꞌiñarinapaj randica paicunatami ayudarca. Cantapishmi ayudanga.

Elías

• ● ¿Eliasca pitaj carca? Eliasca mana manchaj runami carca. Pero huaquinpica llaquillami sintirirca. Santiago 5:17-pica “Eliasca, tucuipi ñucanchij shinallatajmi carca” ninmi.

• ● ¿Eliasca imamantataj huañusha nirca? Huaquinpica Eliasca paillami sintirirca. Chaimantami manchaita charishpaca ni imapaj mana valinichu nishpa yuyarca. Paica cashnami nirca: “Mandaj Dioslla, ñuca causaita quichuhuailla” (1 Reyes 19:4).

• ● ¿Eliastaca imataj ayudarca? Eliasca ima shina sintirishcatami Yaya Diosman tucuita huillarca. Jehová Diosca Eliasta ayudangapajmi paimanta achcata preocuparishcata, poderta charishcatapish ricuchirca. Shinallataj ñucapajca achca valishcami cangui nirca. Eliasta cuidangapajca shuj ayudajtapishmi curca.

• ▸ Eliasmanta liyi: 1 Reyes 19:2-18.

Job

• ● ¿Jobca pitaj carca? Paica charij runami carca. Shuj jatun familiatapishmi charirca. Jehová Diosta alli sirvijpishmi carca.

• ● ¿Imamantataj huañusha nirca? Mana yuyashcapimi Jobca jatun llaquicunata charirca. Paipaj tucui cosascunatami chingachirca. Paipaj huahuacunapishmi huañurca, millai ungüitapishmi japirca. Qꞌuipacarin huaquincunaca llullashpami Jobtaca canllatajmi tucui cai llaquicunamantaca culpata charingui nircacuna. Chashna nijpimi Jobca: ‘Ñuca causaita pꞌiñanayanmi, ña mana causasha ninichu’ nirca (Job 7:16).

• ● ¿Jobtaca imataj ayudarca? Jobca Jehová Diostami mañarca. Shinallataj pai ima shina sintirishcatami shujtajcunaman parlarca (Job 10:1-3). Elihuca Jobpaj alli amigomi carca. Paica Job charishca llaquicunapi ama yallitaj yuyachunmi ayudarca. Jobca Jehová Diospaj ayudata, consejocunatapishmi chasquirca.

• ▸ Jobmanta liyi: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisés

• ● ¿Moisesca pitaj carca? Ñaupa tiempopi Israel llajtata pushajmi carca. Shinallataj Diosta cazuj profetami carca.

• ● ¿Imamantataj huañusha nirca? Israelitacunaca Moisestaca cutin cutinmi pꞌiñachijcuna carca. Chaimantami Moisesca shaicushca sintirirca. Paica Yaya Diostaca: “Ñucamanca huañuita cuhuailla” nishpami rogarca (Números 11:11, 15).

• ● ¿Moisestaca imataj ayudarca? Moisesca Yaya Diosman ima shina sintirishcatami parlarca. Paiman ima mingashcata pajtachichun, ama shaicushca sintirichunmi Jehová Diosca paitaca ayudarca.

• ▸ Moisesmanta liyi: Números 11:4-6, 10-17.