Shuj uchilla cajitami huauqui panicuna sinchi feta charichun ayudan

Testigo de Jehovacunaca Diosmanta yachana achca publicacioncunata, videocunatami Internetmanta descargai tucunchij. Pero huaquin llajtacunapica ñucanchij huauqui panicunaca Internetta pagangapaj mana tanto cullquita charinchu. Cutin shujtaj ladocunapica Internetca mana alli funcionanchu o ni siquiera mana tiyanchu.

Shinapish achca huauqui panicunaca Internetta mana charishpapish ñami publicacioncunataca descargai tucuncuna. ¿Ima shina?

Internet mana tanto alli tiyan lugarcunapi caj congregacioncunamanmi JW Box nishca uchilla cajitacunata cachanchij. Cada cajitami shuj rúter nishcata charin. Shuj empresamanmi randircanchij. Shinallataj Betelmanta Departamento de Computacionmanta rurashca shuj programatami charin. Chaipimi jw.org paginamanta videocunata, publicacioncunata churanchij. Cada cajitami casi 75 dólares valin.

Tandanacuna Huasipica huauqui panicunaca paicunapaj teléfono o tabletatami JW Box nishcaman wifi-ta utilizashpa conectarincuna. Chashnami publicacioncunata, videocunata descargancuna. Mana último modelo teléfono o tableta cashpapish conectaringapaj funcionanllami. Pero shuj congregacionpi Internet mana tiyajpica ¿mushuj publicacioncuna JW Box-pi tiyachunca imatataj rurancuna? Sucursalmantami cunanlla llujshishca publicacioncunata, videocunata shuj memoria flash-pi churashpa cachancuna. Qꞌuipaca chaicunatami JW Box cajitapi churancuna. Shuj memoria flash-ca casi 4 dolaresmi valin.

¿JW Box cajitapi tiyaj informacionca ima shinataj huauqui panicunata ayudashca? República Democrática del Congo llajtamanta, Nathan Adruandra shuti yayaca: “Achca tiempotami Canpimi ñuca shunguta churani nishca videota, Lotpaj huarmi ima tucushcata yuyarichij nishca videota mana descargai tucurcani. Llaquillami carcani. Pero cunanca chai videocunata ñuca telefonopi ña descargai tucushpami chaicunahuan ñuca huahuacunamanpish yachachini” ninmi.

Nigeria llajtapi caj congregacioncunapi JW Box nishca cajitata instalashpa ayudaj shuj huauquica cashnami parlan: “Huauqui panicunaca JW Box cajitaca Jehová Diospaj regalo cashcatami yachancuna. Huillangapaj agllashca publicacioncunata, videocunata jahualla descargai tucushcamantami cunanca cushilla cancuna” ninmi.

África lado, Oceanía y Sudamérica ladopi caj congregacioncunamanca ñami 1.700 yalli JW Box cajitacunata cachashcanchij. Y ashtahuan cajitacunatami congregacioncunamanca cachashpa catishun. ¿Pero chaicunata rurangapajca maimantataj cullquita llujchishcanchij? Obra mundialman cushca cullquimantami japishcanchij. Achcacunami donate.jw.org paginapi shungumanta cullquita cuncuna. Cancuna shungumanta cullquita cushpa ayudashcamantami diosolopagui ninchij.