Jatun llaquihuan cajcunataca minishtishcata cushpami ayudanchij

Huata 2020-pimi jatun llaquicuna tiyarca. COVID-19 millai ungüipishmi callarirca. ¿Testigo de Jehovacunaca llaquihuan cajcunata ayudangapajca imatataj rurarca?

Año de servicio 2020-picaa Comité de Coordinadores del Cuerpo Gobernantepi sirvij huauquicunaca 28 millones de dólaresb shungumanta cushca cullquihuanmi 200 yalli chꞌican chꞌican llaquicunahuan sufricuj huauqui panicunata ayudachun aprobashca. Cai cullquihuanca COVID-19 millai ungüita charijcunata, acapanacuna llajtacunapi llaquichishcacunata, África llajtapi jatun tamyacuna llaquichishcacunata, Venezuela llajtapi jatun yaricaita charijcunata, Zimbabue llajtapi yallitaj usia tiyashcamanta llaquita apajcunatapishmi ayudarca. Cai cushca cullquimi micunapaj, yacupaj, churanapaj, remediocunata randinapaj, maipi dorminata charichunpish ayudarca. Shinallataj limpio cangapajpish huaquin minishtishca cosascunata randircacuna. Cutin huasicunata huasichingapaj, allichingapajpishmi cai cullquitaca utilizarcacuna. Huaquin llaquicunata ima shina ayudashcata ricushun.

COVID-19 pandemia ricurishcamantami muyundij Allpapi ñucanchij huauquicunaca cullqui illaj, sustarishca, ungushca saquirishca. Chaimantami 800 yalli Comités de Socorrocuna ayudacuncuna. Cai comitecunaca huauquicuna ima minishtishcatami Comité de Coordinadores huauquicunaman huillan. Paicunaca ima minishtishcata cachashpami ayudancuna.

Cai huatapica Comité de Socorro huauquicunaca micunacunata, yacuta, remediocunata, ima minishtirishcacunata cushpami ayudarcacuna. Huaquin llajtacunapica Comité de Socorro huauquicunaca ancianocunahuanmi trabajarcacuna. Chaimi cai huauqui panicunaca Gobierno cushca ayudata japircacuna.

Mana testigocunaca ima shina ñucanchij huauquicuna ayudashcatami ricushcacuna. Por ejemplo, Nakonde (Zambia) llajtapica policiacunata mandaj Field Simwinga runaca huauquicunataca: “Llaquilla caj familiacunata utca ayudashcamantami achcata agradicinchij” nircami.

Angola llajtapi micuna illashcamanta. COVID-19 ungüimantami Angola llajtapi micunacuna mana tiyarca. Chaimantami micunacunata randingapajca achca cullqui minishtirirca. Ñucanchij huauquicunapajca micunacunata randingapajca ashtahuan sinchimi carca.

Chaimantami sucursal de Brasil huauquicunata Angola huauquicunaman micunata cachachun mañarcacuna. Shungumanta cushca cullquita alli utilizangapajca huauquicunaca maipi, ima shina randinatami alli mashcarcacuna. Shinami achcata randingapaj decidircacuna. Angola llajtaman cachashca cada fundami arroz, poroto, aceiteta charirca. Chaimi cada fundaca casi 20 kilos (44 libras) carca. Shinami cada fundata randishpa tigra cachashpapish 22 dolaresllata gastarcacuna. Caicamaca 33.544 fundacunatami cachashcacuna. Totalca 654 toneladas (721 toneladas americanas). Tucui cai cachashcacunahuan, shujtaj cosascunahuanca 50.000 gentecunaman carangapajmi ayudashca.

¿Ñucanchij huauquicunaca ima shinataj sintirin? Angola ladoman causaj Alexandreca: “Jehová Dios ñucata cꞌuyashcata, mana ñucalla cashcata, Jehová Diospaj organizacionpaj achca valishca cashcatami cuentata cuni” ninmi. Shinallataj shuj huahuata charij Mariza shuti soltera panica: “Jehová Dios ñuca mañashcata uyashcamantami paita, paipaj organizaciontapish achcata agradicini” nircami.

Zimbabue llajtapi yalli usiashcamanta. Año de servicio 2020-pica Zimbabue llajtapi yalli usia tiyashcamanta, jatun yaricai tiyashcamantami millón gentecuna casi huañurcacuna. Achca huauquicunaca micunapaj mana charircacunachu.

Huauquicunaman micunata chayachingapajca 5 Comités de Socorromi ayudarcacuna. Achca publicadorcunami micunacunata allichishpa, carroman llujshichishpa, carrota mañachishpapish ayudarcacuna.c Año de servicio 2020-pica 22.700 yalli gentecunaman carangapajmi 691.561 dolaresta utilizarcacuna.

Ayuda chayangacamaca maijan huauqui panicunapajca ñami micunacuna tucurishca carca. Chaimi huauqui panicunaca Jehová Diosta pagui nircacuna, maijancunacarin cantocunata cantashpa agradicircacuna.

ONG organizacionmanta shuj ayudata cusha nijpimi ishqui viuda panicunaca paicunapaj comunapi shuj tandanacuiman rircacuna. Pero chai ayudata japingapajca politicapi chagrurina cashcata panicunaca cuentata cushpami mana paicuna munashcata rurashun nishpa rircallacuna. Paicuna ña rijpica tucuicunami burlarircacuna. Burlarijcunaca chai huashaca ama micunata mañaj shamunguichijchu nircacunami. Pero ishqui semana huashalla manaraj ONG ayuda chayajpimi huauquicunaraj chai llajtamanca micunahuan ña chayarcacuna.

Zimbabue llajtapi ayudashcacunata ricushpaca gentecunaca Jehová Diostami jatunyachircacuna. Pani Prisca ima tucushcata ricushun. Paica shuj uchilla pueblopimi causan. Chai pueblopi yacu mana tiyajpipish llaquicunata, charishpapish, yapuna punlla chayamujpipish panica cada miercolesta, viernesta huillanaman llujshirca. “Predicashpa purishpaca cambaj familiata yaricaihuan huañuchigrin” nishpami gentecunaca burlarircacuna. Pani Priscaca: “Jehová Diosca paita sirvijcunataca mana nunca saquishcachu” nishpami cutichirca. Asha punllacuna qꞌuipallami ñucanchij organizacionca micunata chayachirca. Maijan vecinocunaca Diosca mana saquij cashcata ricushpaca mancharishcami saquirirca. Chaimi: “Chai Diosmantami ashtahuan yachashun ninchij” nircacuna. Cunanca pani Priscapaj 7 vecinocunami radiopi tandanacuita uyancuna.

Tucuri punllacuna chayamujpica ashtahuan llaquicunatami charishun (Mateo 24:3, 7). Tucuicunatami donate.jw.org paginapi tucui shungumanta cullquita cushcamantaca achcata agradicinchij. Chai cullquica llaquicunata charij huauqui panicunapajca achca valishcami can.