Tandanacuna Huasicunapi COVID-19 ungüihuan ama contagiarichunmi tucuita allichishcanchij

Marzo quillapaj callari punllacunapica jw.org paginapica cai noticiami ricurirca: “Cuerpo Gobernantepi sirvij huauquicunaca cada llajtapaj gobierno saquijpi 1 de abrilmanta huauqui panicuna cutin en persona tandanacuchunmi decidishcacuna”. Chaita uyashpaca mundo enteromanta testigo de Jehovacunaca achcatami cushicurcacuna. Shinapish COVID-19 ungüica manaraj chingarishcachu.a Chaimanta ¿tandanacuiman rijcuna ama contagiarichunca imata ruranata, imata randinatataj minishtishcanchij? ¿Tandanacuna Huasicunata casi ishqui huatacunata mana utilizashcamantaca chaipi cutin tandanacungapajca tucui allichirishcachu cashcanga?

Huauquicunaca huaquin quillacuna ñaupamantapachami Tandanacuna Huasicunapi cutin tandanacungapaj allichishpa shamucurcacuna.

Ima tiyashcacunahuanmi allichirircanchij

2020 huatapica en persona tandanacunata saquishca shuj quilla qꞌuipallami Warwick (Nueva York) llajtapi saquirij Departamento Mundial de Diseño y Construccionpi sirvij huauquicunaca COVID-19 ungüi tiyashcamanta Tandanacuna Huasicunapi tranquilo cangapaj imata ruranatami ricui callarircacuna.

Muyundij allpapi tiyaj Tandanacuna Huasicunata cutin utilizangapajca chꞌican chꞌican ruraicunatami pajtachina carcanchij. Departamento Mundial de Diseño y Construccionpi sirvij huauqui Matthew De Sanctisca: “Maijan lugarcunapica maquicunata maillana pushtucunaca mana tanto tiyanchu. Tandanacuna Huasicunapi yacu mana tiyajpica huauqui panicunaca yacutami randina can. Mana cashpaca riocunamanta o shuj pozomantami yacuta apamuna can. Huaquin llajtacunapicarin gobiernocunaca tandanacuna lugarcunapi aire acondicionado o huaira tiyachunmi mañashcacuna. Shinallataj saludta cuidangapaj imata rurana cashcatapish ricuchij letrerocuna tiyachunmi mañashcacuna” ninmi.

¿Maillangapaj yacuta charingapajca huauquicunaca imatataj rurarcacuna? Huauqui Matthewca congregacioncunapi jahualla, mana tanto gastashpa yacuta charingapajca huauquicuna imata ruranata yachaj chayashcatami nirca. Por ejemplo, Papúa Nueva Guinea llajtamanta huauqui panicunaca maquicunata maillangapajca grifocunata charij pomacunatami churarcacuna. Cada pomaca 20 litroscunatami charirca. Shinaca chai llajtapaj campopi tiyaj Tandanacuna Huasicunapi maillana pushtucuna tiyachunca 40 dolarescunallami minishtirirca. Shinallataj 6.000 apanalla lavamanos nishcacunatami randircacuna. Chaicunataca Asiamantami Africapi saquirij Tandanacuna Huasicunaman cacharcacuna.

Cutin huaquin Tandanacuna Huasicunapica limpio huaira ashtahuan tiyachunca ventiladorcunata o chai laya aparatocunatami churarcacuna o chaicunata allichircacuna. Cutin maijan congregacioncunapica microfonota ama pi japichunca pértiga nishca largo fierrocunapi shinami microfonota churarcacuna. Shinallataj grifocunata, chapacunata o maquihuan japina shujtaj cosascunata alli limpiangapajmi esforzarircacuna. Mana cashpaca chaicuna ama tanto tiyachunmi ricurcacuna. Cutin huaquin congregacioncunapica sensor nishcata charij grifocunatami churarcacuna. Chashnami grifota mana tupajpipish yacuca llujshinlla. Chile llajtapica cada Tandanacuna Huasicunapi cashna laya arreglocunata rurangapajca casi 1.400 dolaresmi minishtirirca.

Huauquicuna Tandanacuna Huasicunapaj tucui minishtirishcacunata charinata munashpapish huauqui panicuna cushca cullquita alli utilizangapajmi esforzarircacuna. Por ejemplo, huaquin llajtacunapica lavamanoscunamanta, microfonota chariringapaj largo fierrocunamanta pagangapajca gobierno cushca ayudatami aprovecharcacuna. Chꞌican chꞌican llajtacunamanta sucursalcuna tandalla trabajashpami al por mayor productocunata randircacuna. Chashnami cullquita ahorrai tucurcacuna. Sucursalcunapi, Departamento Mundial de Compraspi sirvij huauquicunaca fabricacunamantami productocunata randijcuna carca. Shinami productocunaca ashtahuan barato valirca. Shinallataj ratomi chaicunata cachajcuna carca.

“Chashna arreglocunata rurashcamantami tranquila sintirircani”

Tandanacuna Huasicunapi COVID-19 ungüimanta peligro ama tiyachun arreglocunata rurashcamantami huauqui panicunaca tranquilo sintirishcacuna. Perú llajtamanta Dulcine shuti panica Tandanacuna Huasicunapi cutin en persona tandanacugrishcata yachaj chayashpaca ashatami mancharirca. Paica: “Pandemia callarishca qꞌuipallami COVID-19 ungüita japircani. Chaimantami Tandanacuna Huasiman rishpa cutin contagiarinata mancharcani. Pero Tandanacuna Huasiman chayashpaca ancianocuna huaquin arreglocunata rurashcatami ricurcani. Por ejemplo, maquicunapaj desinfectantecunatami churashcacuna carca. Shinallataj microfonocunata ama japingapaj chaicunapi largo fierrocunatami churashcacuna carca. Tandanacui manaraj callarishpa o tandanacui tucurishca qꞌuipa Tandanacuna Huasita desinfectashpa limpiangapajpishmi arreglocunata rurashcacuna carca. Chashna arreglocunata rurashcamantami tranquila sintirircani” ninmi.b

Cunanca Zambia llajtapi causaj pani Saramantami parlashun. Paica: “Huaquin quillacuna huashamanca ñuca cusaca COVID-19 ungüihuanmi huañurca. Chaimantami, ‘tandanacuiman ñuca cusahuan ña mana rishpaca llaquillami sintirisha’ nishpa yuyarcani” ninmi. Pero ¿Tandanacuna Huasiman rishcamantaca pani Saraca ima shinataj sintirin? Paica: “Tandanacuna Huasipi en persona tandanacushcamantami Jehová Dios ñucanchijhuan cashcata ricui tucushcani. Chaipica ancianocunapaj, turi ñañacunapaj ayudata, cꞌuyaitapishmi chasqui tucushcani” ninmi.

Chꞌican chꞌican llajtacunamanta huauqui panicunaca Tandanacuna Huasicunapi cutin tandanacushcamantami achcata agradicincuna. Cancunataca shungumanta cullquita cushpa ayudashcamantami achcata agradicinchij. Achcacunaca donate.jw.org paginapimi cullquita cushpa ayudashcacuna. Cancuna cushca cullquihuanmi huauqui panicuna tranquilo, mana manchashpa tandanacuchun Tandanacuna Huasicunata allichi tucushcanchij.