1 Reyes
5 Tiro llajtata mandaj rey Hiramca siempremi Davidhuan alli amigocuna carca.* Chaimantami Salomonta paipaj yaya Davidpaj randi rey cachun agllashcata yachaj chayashpaca paita sirvijcunata cacharca. 2 Chaimi Salomonca Hiramman cashna nishpa huillachun cacharca: 3 “Canca allimi yachangui, ñuca yaya Davidca achca contracunahuan macanacushcamantami Jehová Diospaj shutita jatunyachingapaj shuj huasita* mana rurai tucurca. Pero cunanca Jehová Diosmi paicunata mishachun ayudashca. 4 Cunanca ñuca Jehová Diosca muyundij llajtacunapi tucui gentecunahuan tranquilo causachunmi ñucataca saquishca. Ñucapaj contraca pi mana tiyanchu, ima llaquipish mana tiyanchu. 5 Jehová Diosca ñuca yaya Davidmanca: ‘Cambaj churitami cambaj jatun tiyarinapica cambaj randi churasha. Paimi ñuca shutita jatunyachingapaj shuj huasita shayachinga’ nishcami carca. Chaimantami pai nishca shinaca ñuca Jehová Diospaj shutita jatunyachingapaj shuj huasita shayachisha nicuni. 6 Cunanca Líbano urcucunamanta cedro yuracunata ñucapaj pꞌitichun cambaj trabajadorcunata cachai. Ñucata sirvijcunaca canta sirvijcunahuanmi trabajangacuna. Can mañashcatami canta sirvijcunamanca pagasha. Sidón llajtamanta gentecuna shina yurata pꞌitijcunaca ñucanchijpurapica pi mana tiyanchu. Chaitaca canca allimi yachangui” nircami.
7 Hiramca Salomón nishca shimicunata uyashpaca achcata cushicushpami: “¡Cunanca Jehová Diosca alabashca cachun. Paica cai achca gentecunata mandachunca Davidmanca alli yachaj churitamari cushca!” nirca. 8 Chai qꞌuipami Hiramca Salomonmanca cashna nichun cacharca: “Can huillanaman cachashcataca chasquircanimi. Can imata munashcataca tucuitami rurasha. Cedro caspicunata, enebro caspicunatapishmi canmanca cusha. 9 Ñucata sirvijcunami chai caspicunataca Líbano urcucunamanta mama cuchaman uriyachingacuna. Can maiman cachachun nishcamanmi caspicunataca huatachishpa mama cuchata cachasha. Chaipimi can apachunca huatashcata pascachun mandasha. Cutin canca ñuca mañashca micunatami ñuca huasipi cajcunaman cungui” nircami.
10 Shinami Hiramca cedro caspicunata, enebro caspicunata Salomonmanca pai munashcata tucuita curca. 11 Salomonca cada huatami Hirammanca paipaj huasipi cajcunaman carachunca 20.000 coro* trigota, 20 coro alli aceite de olivata cuj carca. 12 Jehová Diosca pai cusha nishca shinallatajmi Salomonmanca alli yachaita curca. Hirampish, Salomonpish paicunapura sumajta causangapajmi shuj ari ninacuita* rurarcacuna. Chaimantami tranquilo causarcacuna.
13 Rey Salomonca sinchi trabajocunata rurachunca tucui Israelmantami 30.000 cꞌaricunata tandachirca. 14 Quillapica Líbano urcucunamanca cada grupopimi 10.000 cꞌaricunata cachaj carca. Chai cꞌaricunaca shuj quillatami Líbano urcucunapi pasajcuna carca, cutin ishqui quillacunataca paicunapaj huasicunapimi pasajcuna carca. Adonirammi sinchi trabajocunata rurachun tandachishca runacunata mandaj carca. 15 Salomonca 70.000 trabajadorcunatami* charirca. Shinallataj urcucunapica rumicunata pꞌaquij 80.000 runacunatami charirca. 16 Ashtahuanpish Salomonca 3.300 pushaj runacunatami charirca. Paicunami trabajadorcunataca ricujcuna carca. 17 Rey Salomonca Diospaj huasi cimientocunata labrashca rumicunahuan rurangapajmi minamanta* jatun rumicunata, achcata valij rumicunata llujshichichun mandarca. 18 Salomonpaj trabajadorcunapish, Hirampaj trabajadorcunapish Guebalmanta caj runacunahuanmi tandalla Diospaj huasita shayachingapaj rumicunata pꞌaquircacuna. Paicunaca caspicunatapish, rumicunatapishmi allichircacuna.